Venni ɓaarɛ́ kísú
20
1 Nyuutɩna Wɩɩsɛ bʋ́l Moyizi rí a bʋlɛ́: 2 «Bʋl pá Ɩzɩrayɛl nɩɛ: Ɩzɩrayɛl bio ná wuu, ɛ́ rá má nɩhʋɔrɔ ná wuu há kenú bio ɔsɛ vʋk pá veno ná há ká Mɔlɔkɛ, ɓaá ɓʋ́ tɩ́na nɛ́. Tɔ́ɔ́ nɩɛ sɩ́ pa dɔ́wʋ́ɔ́ yósú ɓʋ́. 3 Ŋ má tɩɩ sɩ́ cɛ́ tɩ́na mɛ́, a lɩ́sʋ́ ʋ duo sɩɛrʋ. Ʋ há kenú bio ɔsɛ vʋk pá Mɔlɔkɛ wɩ́ɛ́; a tɩŋ ɛ́ mɛ́ hé busunnu ŋ táŋtɛ cémejaa mɛ́, ká lɔ́rɩ́ŋ yɩr ná há kɔ́ʋ́ dʋŋɔ. 4 Rɩ tɔ́ɔ́ nɩɛ nɩ́ wɩ báálɔ ná há ɓʋ́ʋ́ bio pá Mɔlɔkɛ ɓʋ́ɩ́ có, ká tɔ́ sɩ́ɛ́ anɛ ɓa wʋ́ʋ́ néé, 5 ŋ é sɩ́ cɩ́nʋ́ mɛ́, a lɩ́sʋ́ rɩ́rʋ́ dunɩɛ wuu Ɩzɩrayɛl nɩɛ sɩɛrʋ. Ŋ sɩ́ lɩ́sʋ́ rɩ́ nɩɛ ná wuu há ɔ́sɛ́ ɛ́ vʋka aá pá Mɔlɔkɛ.6 Nɛrɔ ná wuu há kenú tɩɩ cɔ́ vʋra mɛ́, aá bɔsɛ lɛlɛ, ŋ sɩ cɛ́ tɩ́na mɛ́, a lɩ́sʋ́ Ɩzɩrayɛl nɩɛ sɩɛrʋ. 7 Ɩ́ lɩ́sɩ́wa tɩɩ rɩ́ busunnu ká rɩ́ŋ tɩ́llɩ́wa, ŋ nɛ́ ká Nyuutɩna Wɩɩsɛ ná há kɛ́ɩ́wa Wɩɩsɛ.
8 Ɩ́ sáŋɩ́ŋ kíŋse, aá tɩ́ŋwɔ́. Ŋ nɛ́ ká Nyuutɩna Wɩɩsɛ ná há tɩ́ɩ́wa.
Wɩ́kíse náŋa
9 Rɩ nɛrɔ bʋ́l bɔ́ŋbɔ́ŋ cáásʋ́ áná rɩ́rʋ́ maá, ɓaá ɓʋ́ tɩna nɛ́; ʋ há bʋ́l bɔ́ŋbɔ́ŋ cáásʋ́ áná rɩ́rʋ́ máá, ʋ sʋʋ kɔ́ʋ́ tɩɩ nyúú wɩ́ɩ́ nɛ́.
10 Rɩ báálɔ kenú nɔ́ŋɔ háálɔ pɛ́, ɓaá ɓʋ́ʋ́sɩ́wɔ́ wuu bɛllɛ nɛ́; bácɔrmɔ ná rɩ́ hácɔrmɔ ná wuu.
11 Rɩ báálɔ kenú áná háála nɔ́ŋɔ pɛ́, ʋ hɩ́ɩ̄́sʋ́ áná, ɓaá ɓʋ́ʋ́sɩ́wɔ́ wuu bɛllɛ nɛ́; ɓa sʋʋ kɔ́wɔ́ tɩɩ nyúú wɩ́ɩ́ nɛ́.
12 Rɩ báálɔ kenú bihál pɛ́, ɓaá ɓʋ́ʋ́sɩ́wɔ́ wuu bɛllɛ nɛ́; ɓa á nɩlaŋwɩ́ɩ́, ɓa sʋʋ kɔ́wɔ́ tɩɩ nyúú wɩ́ɩ́ nɛ́.
13 Rɩ báálɔ pɩ́nʋ́ bánɔ́ŋɔ anɛ ɓa háá pɛ́ háálɔ ɛ́, ɓaá ɓʋ́ʋ́sɩ́wɔ́ wuu bɛllɛ nɛ́; ɓa há ɔ́ʋ́ ná ká wɩ́ɩ́ ná há lɔ́rɛ́ nɛ́. Ɓa sʋʋ kɔ́wɔ́ tɩɩ nyúú wɩ́ɩ́ nɛ́.
14 Rɩ nɛrɔ já háálɔ, a jɔ́ʋ́ háálɔ ná maá má, ʋ á nɩlaŋwɩ́ɩ́; ɓaá kɛ́sɩ́wɔ́ wuu botoro rɩ́ hé níŋ mí ní, a makɛ rɩ́ nɛ́ŋ báá sʋ́ʋ́ nɔ́ŋɔ a ɩ́ sɩɛrʋ.
15 Rɩ báálɔ tɔ́wɛ́ pʋna, ɩ́ ɓʋ́ tɩ́na, a ɓʋ́ pʋna ná má. 16 Rɩ háálɔ lóó rɩ́ pʋna zɩ́nʋ́, ɩ́ ɓʋ́ háálɔ ná rɩ́ pʋna ná wuu; ɩ́ ɓʋ́ʋ́sɩ́wɔ́ wuu; ɓa sʋʋ kɔ́wɔ́ tɩɩ nyúú wɩ́ɩ́ nɛ́.
17 Rɩ báálɔ pɩ́nʋ́ nátoló, ʋ rɩ́rʋ́ há tʋ́ŋ áná mɛ́ ɛ́ ráá má maá mɛ́, a múúlú hɩ̄ɩ̄sɛ kɔ́ʋ́ má nóú hɩɩ̄sɛ, ʋ ɛ́ ká hɩ̄wɩ́ɩ́ rɛ́. Ɩ́ lɩ́sɩ́wɔ́ nɩɛ wuu sɩ́ɛ́ mɛ́, ɓa duo sɩɛrʋ a tá; ʋ há ɛ́ɛ́ ʋ nátoló hɩɩ̄sɛ nyɩɩsɛ, ʋ wɩɩla kɔ́ʋ́ tɩɩ nyúú wɩ́ɩ́ nɛ́.
18 Rɩ háálɔ hóú tɩŋa ká rɩ́ báálɔ pɩ́nʋ́ ɛ́ tɛ́ŋ mɛ́, a nóú hɩɩ̄sɛ, ʋ há bélú cɛ́l há tɩ́ŋ ráŋ ná aá lɛ, kɔ́ʋ́ má saŋ pɔ́ʋ́ wɩ́ɛ́, ɩ́ lɩ́sɩ́wɔ́ wuu bɛllɛ ɓa dunɩɛ sɩɛrʋ tá.
19 Ɩ wɩ mɔhɛ̄́ rɩ́ɩ́ pɩ́nɩ́ maá lɩkápá rɩ́rʋ́ máálá; ɩ wɩ mɔhɛ̄́ rɩ́ɩ́ bélí yálá hɩɩ̄sɛ, ʋ rɩ́rɩ́ áná há tɩ́ɩ́nɛ́ wɩ́ɛ́; nɩɛ ná há tʋ́ŋ ɛ́, ɓa wɩɩla kɔ́wɔ́ tɩɩ nyúú wɩ́ɩ́ nɛ́.
20 Rɩ nɛrɔ kenú áná máálá háálɔ pɛ́, ɛ́ rá má ʋ aŋwie háálɔ, a bélú hɩɩ̄sɛ, ɓa wɩɩla cɩ́ɩ́nɩ́wɔ́ tɩɩ nɛ́. Ɓa sɩ́ ko sʋsɛ, rɩ ɓa wɩ bíí lʋ́lɛ́. 21 Rɩ nɛrɔ lɔ́ʋ́ máálá ɛ́ rá má ʋ maábio háálɔ ja, ʋ kéŋ busunnu. Ɓa sɩɛ́ wɩ bíí wuu lʋl, ʋ há bélú maábinɔ́ŋɔ hɩɩ̄sɛ ná wɩ́ɛ́.
22 Ɩ́ sáŋɩ́ŋ kíŋse rɩ́rɩ́ŋ wɩ́máŋsɛ, aá tɩ́ŋwɔ́; a makɛ rɩ́ tɔ́ɔ́ ná ŋ há keníwa aá mʋ́ rɩ́ŋ bil, rʋ́ʋ́ sɩ́ɩ́wa tʋ́ɔ́sɩ́ tá. 23 Tɔ́nɛ ná nɩɛ ŋ há sɩ́ kiri ká laa pɛ́ɩ́wa, ɩ́ sɩ́wɔ́ kíŋse tɩ́ŋʋ́. Ɓa tʋ́ŋ ɛ́ tʋtʋmɛ́ nɛ́ ŋ sɩɛrʋ lɩ́wɔ́. 24 Ɛ́ nɛ́ ŋ sɛ́: ɩ́ sɩ́ ko tɩ́llɩ́wɔ́ tɔ́ɔ́, ŋ tɩɩ nɛ́ sɩ́ lɔ́wɔ́ tɔ́ɔ́ pɛ́ɩ́wa.
Ɓa tɔ́ɔ́ ná nɛ'ɩ́l rɩ́ tʋʋ há mɩŋ ráŋ kɩ́káŋ. Ŋ nɛ́ ká Nyuutɩna Wɩɩsɛ ná há kɛ́ɩ́wa Wɩɩsɛ, a lɩ́sɩ́wa ká tá duusi ná náŋa. 25 Ɩ́ zɩŋ pʋsɛ ná há wɩ busunnu kené a káŋwɔ́ nɛ́ ko aá páŋ, a rɩ́wɔ́ ná há kéŋ busunnu rɩ́rɩ́ŋ pɛ́ɛ́; a zɩŋ diíwiisi ná há wɩ busunnu kené rɩ́rɩ́ŋ pɛ́ɛ́, a rɩ́wɔ́ ná há kéŋ busunnu rɩ́rɩ́ŋ pɛ́ɛ́; ɩ́ cáksɩ́wɔ́ náŋá mɛ́. Ɩ́ sɩ́ ɓa ná há kéŋ busunnu mí tɩ́kʋ́ rɩ́ɩ́ zʋ busunnu; pʋsɛ, diíwiisi, rɩ́ tíé tútuure wuu sɩɛrʋ. Ɩ́ bélwó é wuu rɩ ɓa wɩ busunnu kené.
26 Ɩ́ sɩ́ busunnu kánʋ́ rɩ́ŋ tɩ́llɩ́wa, bee wɩ́ɛ́ ŋ é Nyuutɩna Wɩɩsɛ wɩ busunnu kené. Ŋ lɩ́sɩ́wa duo ná náŋa mɛ́, rɩ́ŋ nɛ́ tɩ́llɩ́wa.
27 Rɩ nɛ́ŋ mɩ́nɩ́wa sɩɛrʋ aá yɩ́rɛ lɛlnʋʋsɛ, rʋʋ ká bál, rʋʋ ká hál, ɩ́ ɓʋ́ tɩ́na. Ɩ́ yosi ɛ́ nɩɛ duo mí rɩ́ dɔ́wʋ́ɔ́ ɓʋ́ʋ́sɛ. Ɓa sʋʋ kɔ́wɔ́ tɩɩ nyúú wɩ́ɩ́ nɛ́.