Náŋá pɩ́nɛ ɛ́ ná háá kísé
18
1 Nyuutɩna Wɩɩsɛ bʋ́l Moyizi rɩ́ bʋlɛ́: 2 «Bʋl wɩ́ɛ́ nyáŋ pá Ɩzɩrayɛl nɩɛ bʋlɛ́: Ŋ nɛ́ ká Nyuutɩna Wɩɩsɛ, ɩ́ Wɩɩsɛ. 3 Ɩ́ fa há mɩŋ Ezipiti mí a ná wɩ́ɛ́ ná rɩ ɓaá a, ɩ́ sɩ́wɔ́ á; ŋ háá kánɩ́wa rɩ́ mʋ́ʋ́ hé Kanaŋ mɛ́, rɩ́ɩ́wa ná wɩ́ɛ́ ná rɩ ɓa máá á, ɩ́ sɩwɔ́ á; ɩ́ sɩ́ ɛ́ tɔ́nɛ nɩɛ wɩ́'állɛ tɩ́ŋʋ́. 4 Ɩ́ zízílíŋ kíŋse, aá tɩ́ŋɩ́ŋ wɩ́máŋsɛ. Bee wɩ́ɛ́ ŋ nɛ́ ká Nyuutɩna Wɩɩsɛ, ɩ́ Wɩɩsɛ. 5 Ɩ́ zílíŋ wɩ́máŋsɛ rɩ́rɩ́ŋ kíŋse. Nɛrɔ ná háá zílwó sɩ́ tɩ́ŋwɔ́ mɛ́ a ná waana. Ŋ nɛ́ ká Nyuutɩna Wɩɩsɛ.6 Ɩ́ oro wuu wɩ mɔhɛ̄́ rʋ́ʋ́ kánʋ́ nɩtɩ́na pɛ́, a nóú hɩɩ̄sɛ. Ŋ nɛ ká Nyuutɩna Wɩɩsɛ.
7 Sɩ́ gɛrɔ káá wúri káá múúlí maá mʋ́l, rɩ́ɩ́ pɩ́nʋ́. Ʋ ɛ́ kɛ́ɩ́ áná hɩɩ̄sɛ nɛ́. Ɩ maá nɛ́, ɩ wɩ mɔhɛ̄́ rɩ́ɩ́ nóú mʋ́l, a hɩɩ̄sʋ́. 8 Sɩ́ɩ́ maá hánɔ́ŋɔ káá pɛ́; ɩ áná hɩɩ̄sɛ nɛ́, ʋ mʋ́l nɩ́ɩ́ bel ɛ́. 9 Ɩ nátolo ɩ rɩ́rʋ́ há tʋ́ŋ maá mɛ́, sʋ́ʋ́ pɩ́nʋ́; ɩ nátolo há kɛ́ɩ́ maá hánɔ́ŋɔ toló, sʋ́ʋ́ pɩ́nʋ́. Rɩ ɓa wʋ́ʋ́ jaa sɩɛrʋ lʋ́lɛ́ ká rʋ́ʋ́ wa pʋmmɔ má, sʋ́ʋ́ pɩ́nʋ́. 10 Sɩ́ɩ́ bio toló pɩ́nʋ́, sɩ toló má toló pɩ́nʋ́. Ɩ tɩɩ hɩɩ̄sɛ́ nɛ́ ɛ́. 11 Ɩ maá hánɔ́ŋɔ rɩ́rɩ́ áná há lʋ́l toló, sʋ́ʋ́ pɩ́nʋ́, ɩ nátoló ní. 12 Sɩ́ɩ́ áná nátoló káá pɛ́, bee wɩ́ɛ́ ʋ rɩ́rɩ́ áná tɩ́ɩ́nɔ́ rɛ́.
13 Sɩ́ɩ́ maá maábio, ɛ́ rá má, ʋ máálá pɩ́nʋ́; beewɩ́ɛ́ ʋ rɩ́rɩ́ maá tɩ́ɩ́nɔ́ rɛ́.
14 Sɩ́ɩ́ áná máálá, ɛ́ rá má, ʋ maábio háálɔ káá pɛ́; ʋ kɛ́ɩ́ yálá nɛ́. 15 Sɩ́ɩ́ bihál pɩ́nʋ́, ɩ bio háálɔ nɛ́; sʋ́ʋ́ hɩ̄ɩ̄sɛ nyɩ́ɩ́sʋ́. 16 Sɩ́ɩ́ maábio háálɔ pɩ́nʋ́, ɛ́ rá má ɩ máálá háálɔ; ɩ maábinɔ́ŋɔ ná hɩ̄ɩ̄sɛ nɛ́ ɛ́. 17 Sɩ́ háálɔ pɩ́nʋ́, rɩ́ kánʋ́ toló má rɩ́ pɛ́. Sɩ ɛ́ háálɔ bio toló káá pɛ́, a sʋ́ʋ́ toló má toló káá pɛ́, rɩ́ múúlíwó mʋ́ʋ́la; ɓa tɩ́ɩ́nɔ́ rɛ́. ʋ ɛ́ ká nɩlánnɛ nɛ́. 18 Sɩ́ɩ́ háálɔ maábio ɛ́ rá má ʋ máálá já, rʋ́ʋ́ ɛ́ɩ́ háálɔ; rɩ́ɩ́ múúlú mʋ́l, rɩɩ háálɔ ha mɩ́nɔ́, ɓa sɩ́ dídí hánɔŋɩ́ náŋá mɛ́.
19 Rɩ háálɔ kúó hóú tɩŋa, ɩ sʋ́ʋ́ pɩ́nʋ́, bee wɩ́ɛ́ ʋ kéŋ busunnu.
20 Sɩ́ɩ́ kénninɔ́ŋɔ háálɔ káá pɛ́, rɩɩ á ɛ́, ɩ zʋ́ busunnu.
21 Sɩ́ɩ́ bio wuu káá ɔsɛ vʋk rɩ́ɩ́ pá veno ná ɓa háá yɩrɛ Mɔlɔkɛ; ɩ wɩ mɔhɛ̄́ rɩ́ɩ́ lɔ́rɩ́ Wɩɩsɛ yɩr. Ŋ nɛ́ ká Nyuutɩna Wɩɩsɛ.
22 Sɩ́ɩ́ bánɔ́ŋɔ pɩ́nʋ́ anɛ ɓa háá pɛ́ háálɔ ɛ́; ɛ́ ká nɩlánnʋ nɛ́.
23 Sɩ́ pʋna tɔ́wʋ́; rɩɩ á ɛ́ ɩ zʋ́ busunnu. Háálɔ wɩ mɔhɛ̄́ rʋ́ʋ́ lo rɩ́ pʋna zɩ́nʋ́; ʋ ɛ́ ná ká wɩ́ɩ́ ná há lɔ́rɛ́ nɛ́.
24 Ɩ́ sɩ́ wɩ́tɩɛnnɛ nyáŋ oro wuu á, rɩ́ɩ́ zʋ busunnu; Duo ná wuu nɩɛ ŋ há kíré ɩ́ sɩ́ɛ́, ɓa tʋ́ŋ ɛ́ wɩ́tɩɛnnɛ nɛ́ a zʋ busunnu. 25 Ɓa tɔ́ɔ́ wuu fa mɩŋ busunnu sɩɛrʋ, ŋ bɛ́ŋsʋ́ ʋ wɩ́nyɔ́rkɛ wuu yɩr mɛ́, ɛ́ nɛ́ ʋ tʋ́ɔ́sʋ́ bɛlɛ tá.
26 Ɛ́ wɩ́ɛ́, ɩ́ é saŋɩ́ŋ kíŋse rɩ́rɩ́ŋ wɩ́máŋsɛ, ká sɩ́ wɩ́lɔrɛ́ nyáŋ oro wuu á. Tɔ́birwo rɩ́ zʋ́zʋʋlɛ́ ná má há mɩ́nɩ́wa sɩɛrʋ, ɩ́ wɩ mɔhɛ̄́ rɩ́ɩ́wa tʋŋ ɛ́. 27 Nɩɛ ná fa há lɛ́ɩ́wa sɩ́ɛ́ mɩŋ tɔ́ɔ́ né mí, ɓa tʋ́ŋ ɛ́ tʋtʋ́ŋlɔrɛ́ nɛ́, ɓa tɔ́ɔ́ wuu mɩŋ busunnu mí. 28 Ɩ́ má báá sɩ́ busunnu áá hóú mí, rʋ́ʋ́ tʋ́ɔ́sɩ́wa tá, anɛ ʋ há tʋ́ɔ́sɛ nɩɛ ná há lɛ́ɩ́wa sɩ́ɛ́ tá ɛ́. 29 Bee wɩ́ɛ́, nɩɛ ná wuu háá tʋŋ ɛ́ wɩ́laama, ɓa sɩ́ lɩ́sɩ́wɔ́ tá Ɩsɩrayɛl dunɩɛ sɩɛrʋ.
30 Ɩ́ tɩ́ŋɩ́ŋ wɩ́máŋsɛ, ká, wɩ́laama ná fa háá a tɔ́ɔ́ né mí, rɩɩ́wa ha wɩ kúé, ɩ́ sɩ́wɔ́ tɩ́ŋʋ́, rɩ́ɩ́ a busunnu nɩ́ɛ́. Ŋ é Nyuutɩna Wɩɩsɛ nɛ́ kɛ́ɩ́wa Wɩɩsɛ.