Hásʋɔna busunnu mʋ́ʋ́rɛ wɩ́ɛ́
12
1 Nyuutɩna Wɩɩsɛ bʋ́l Moyizi rɩ́ bʋlɛ́: 2 «Bʋl pá Ɩzɩrayɛl nɩɛ bʋlɛ́: rɩ háálɔ kéŋ puo a ko lʋl heŋbóle, ʋʋ́ mɩŋ busunnu mí tápʋlɛ balpɛ nɛ́, anɛ ʋ háá nóú tɩŋa a mɩŋ busunnu mí ɛ́. 3 Ɓa sɩ́ fɩ́ɩ́lɛ ɛ́ bio tápʋlɛ córí kal. 4 Ʋ há lʋ́lɛ́ cɛ́l ná bɩ́sɛ wɩ́ɛ́, ʋ zʋ́ busunnu a kaá ja tápʋlɛ mɛrɛ́ rɩ́ fí rí botoro. Ɛ́ tɛ́ŋ mɛ́, ʋ wɩ mɔhɛ̄́ rʋ́ʋ́ tɩkɛ céme táŋtɛjaa óŋ wuu mí, ʋ wɩ mɔhɛ̄́ rʋ́ʋ́ zʋ céme táŋtɛjaa sɩɛrʋ, rɩ ɛ́ tápʋlɛ nʋɔ wɩ césé. 5 Ká rʋʋ lʋ́l toló, ʋʋ́ zʋ busunnu yɔɔsɛ bɛllɛ nɛ́, anɛ ʋ há nóú tɩŋa; káá dɛllɛ tápʋlɛ mɛɛ́sɩbotoro rɩ́ balgo, ká zɩŋ lɛ ʋ lʋlɛ́ cɛ́l busunnu mí. 6 Rʋʋ lʋlɛ́ busunnu mʋ́ʋ́rɛ tɛ́ŋ ná nɛ́ dáárɛ́, háálɔ ná mɔhɔ̄́ rʋ́ʋ́ ka bɩna balá pieŋso ní mʋ́ céme táŋtɛjaa, a pá vʋk' ɔɔsɔ, rʋ́ʋ́ laa ɔsɛ vʋkfísi; ká rʋ́ʋ́ ja kʋ́dɔɔlɩ́ arɩ́ baka kʋ́ma kaa ko pɔ́ʋ́, rʋ́ʋ́ laa ɔsɛ wɩ́bɔmɔ vʋk. 7 Vʋk'ɔɔsɔ sɩ́ lɔ́wɔ́ wuu a ɔsɛ pá Nyuutɩna Wɩɩsɛ, ká mʋ́ʋ́rɛ háálɔ ná busunnu, anɛ ɛ́ ʋ há mɔhɛ̄́ rʋ́ʋ́ a. Ɛ́ har rɩ́ mɛ́, ʋ lʋlɛ́ cɛ́l busunnu ténnó.Wɩ́ɛ́ ná ɩ há sɩ́ máŋsɛ pá háála ɓa lulɛ́ har rɩ́ mɛ́ nɛ́ ɛ́; rʋʋ lʋ́l heŋbóle ɛ́ nɛ́, rʋʋ lʋ́l toló má ɛ́ nɛ́. 8 Rɩ hásʋɔnɔ ná kúó rʋʋ wɩ pieŋso wuó ná, ʋ ja kʋ́sɛ bɛllɛ, ɛ́rá má kʋ́dɔ́llɛ bɛllɛ a kaa mʋ́; kʋ́ma ná nɔ́ŋɔ nɩ́ɩ́ la pieŋso nyúú mí, rɩ́wɔ́ pii ɔsɛ vukfísi, ká rɩ́ nɔ́ŋɔ má ɔsɛ suúri vʋk; ká rʋ́ʋ́ sɩɛ́ lɛ busunnu mí.