Aarɔŋ bɛlɛ bɛllɛ sʋʋ naasɛ
10
1 Aarɔŋ bɛlɛ, Nadaabɛ rɩ́ Abiyu, ɓa oro wuu púú tulaalényɩ́krɩ́'omo a tɔkɛ níhúó hé, a pi áŋsáŋsɛ sakɛ, a físi pá Nyuutɩna Wɩɩsɛ. Ká ʋ wɩ ɛ́ mákɛ́ pɔ́wɔ́. 2 Ɛ́ nɛ́ níŋ de lɛ Nyuutɩna Wɩɩsɛ rɩ́ a tuwi díwó, ɓa sʋsɛ Nyuutɩna Wɩɩsɛ sɩ́ɛ́. 3 Ɛ́ nɛ́ Moyizi bʋl Aarɔŋ rɩ́ bʋlɛ́: «Nyuutɩna Wɩɩsɛ fa cáánɩ́wa a bʋlɛ́: ‹Ŋ có rɩ́ nɩɛ ná wuu há túé aá péríŋ, rɩ́wɔ́ zɩŋ rɩ́ŋ káŋ dʋŋɔ,
ká rɩ́wɔ́ pípíŋsíŋ jamáŋ wuu sɩ́ɛ́ mɛ́.›» Aarɔŋ de hiīni. 4 Ɛ́ nɛ́ Moyizi yɩ́rɛ Aarɔŋ aŋwie Ʋzɩɛl bɛlɛ, Mɩkayɛlɛ rɩ́ Ɩlisafaŋ, a bʋ́lwɔ́ rɩ́ bʋlɛ́: «Ɩ́ ko pɛ́ɩ́wa bɛlɛ nyáŋ lɛlɛ a kaa lɛ ká tá Wɩɩsɛ dɩmɩnɩ́, a kaa lɛ púl ná har rɩ́.» 5 Ɛ́ nɛ́ ɓa tuuperi, a pɔ́wɔ́ rɩ́wɔ́ tʋtʋ́nnɛ gɛnnɛ wuu kaa lɛ púl har rɩ́, anɛ ɛ́ Moyizi há mákɛ́. 6 Ká Moyizi sɩɛ́ bʋl Aarɔŋ rɩ́rʋ́ bɛlɛ Ɩlɩyazarɛ rɩ́ Ɩtamarɛ dɩhɩ̃́ bʋlɛ́: «Ɩ́ sɩ́ɩ́wa nyúpʋsɛ vɛ́ɛ́ tá, a sɩ́ɩ́wa gɛnnɛ cɔ́nnʋ́, anɛ yúó mí ɓa háá a ɛ́; rɩɩ́wa a ɛ́, ɩ́ɩ́ sʋ́sʋ́ nɛ́, ká rɩ́ Wɩɩsɛ cɔwɩɩlɔ́ tuwi Ɩsɩrayɛl nɩɛ wuu nyúú. Nɩɛ nyáŋ Nyuutɩna Wɩɩsɛ há ɓʋ́ɛ́ arɩ́ níŋ, ɩ́ lo rí Ɩzɩrayɛl nɩɛ wuu ní wíwó yúó. 7 Ɩ́ tɩɩ sɩ́ céme táŋtɛjaa né mí lɛ́, rɩɩ́wa lɩ́ɔ́, ɩ́ɩ́ sʋ́sʋ́ nɛ́; bee wɩ́ɛ́ Nyuutɩna Wɩɩsɛ lɩ́sɛnʋʋ ná ɓa há ɔ́ŋsɛ́ héíwa mɛ́, ʋ nɛ́ tɩ́ɩ́wa.» Aarɔŋ rɩ́rʋ́ bɛlɛ a ɛ́ ná Moyizi há bʋ́lɛ́.
Sɩduoru wɩ́ɛ́
8 Nyuutɩna Wɩɩsɛ bʋ́l Aarɔŋ rí bʋlɛ́: 9 «Rɩɩ́wa já rɩ́ɩ́wa zʋ céme táŋtɛjaa, ɩ rɩ́rɩ́ bɛlɛ, ɩ́ sɩ́ dɩvɛ́ŋ nyɔ́, a sɩ́ sɩdúó oro wuu nyɔ́, a makɛ rɩ́ Wɩɩsɛ sɩ́ɩ́wa ɓʋ́ʋ́sʋ́. Ʋ ká wɩ́bilí rí a pɛ́ɩ́wa, a waá giri bɩná rɩ́ bɩná wuu. 10 A makɛ rɩ́ɩ́wa zɩŋ Wɩɩsɛ ɓɩɛ, rɩ́ oŋyɔ́ɔ́wa kaa caksɛ náŋá mɛ́; a zɩŋ omo ná há wɩ busunnu kené Wɩɩsɛ sɩ́ɛ́ rɩ́rʋ́ ná há kéŋ busunnu Wɩɩsɛ sɩ́ɛ́ aá caksɛ náŋá mɛ́. 11 Ká wólli wɩ́makɛ́ ná Nyuutɩna Wɩɩsɛ há tɩ́ŋ Moyizi mí máŋsɛ́ pɔ́wɔ́, pi aá kármɛ́ Ɩzɩrayɛl nɩɛ.»
Vʋk'ɔɔsa namɩɛ ker wɩ́ɛ́
12 Moyizi bʋl Aarɔŋ rɩ́rʋ́ bɛlɛ Ɩlɩyazarɛ rɩ́ Ɩtamarɛ rɩ́ bʋlɛ́: «Vʋk onni ná ɓa há lɩ́sɛ Nyuutɩna Wɩɩsɛ ker a físi pɔ́ʋ́, ká ɓa ná káánɛ, ɩ́ pɔ́wɔ́ kaa ké koro laka a dí, ká sɩ́ sɩbʋ́r hé. Ʋ ká Wɩɩsɛ dʋŋɔ léŋ ker ná wɩ́ɛ́ há fɩɛ́mɔ́ nɛ́. 13 Ɩ́ sɩ́wɔ́ káá mʋ́ dɩhúó wuu rɩ́ dí, rɩ dɩhɩ̄́ ná ɓa há lɩ́sɛ raá. Ɩ́ ker ní ɛ́ Nyuutɩna Wɩɩsɛ vʋka onni sɩɛrʋ. Nʋɔ ná ʋ há páŋ nɛ́ ɛ́. 14 Pʋsɛ ná Ɩsɩrayɛl bɛlɛ há kené ko ɔsɛ tɛŋfɩ́ɛ́l vʋk a pá Nyuutɩna Wɩɩsɛ, ɓa béŋtunni rɩ́wɔ́ húṍ ná ɓa há píé cáánɛ Wɩɩsɛ, ɩ rɩ́rɩ́ bɛlɛ rɩ́rɩ́ tolé, ɩ́ káŋwɔ́ ké dɩhɩ̄́ ná há wɩ busunnu kené Nyuutɩna Wɩɩsɛ sɩ́ɛ́ mɛ́, a dí; ɩ́ nɛ́ tɩ́wɔ́. 15 Ɩzɩrayɛl nɩɛ háá ka húĩ́ ná rɩ́ beŋtúú ná ko, ɓa pii súúrí nannʋnnɛ ná mɛ́ a cáánɛ Nyuutɩna Wɩɩsɛ ká pɔ́ʋ́, ɩ rɩ́rɩ́ bɛlɛ nɛ́ tɩ́wɔ́; ɩ́ ker ní ɛ́ Nyuutɩna Wɩɩsɛ há mákɛ́.»
16 Moyizi bɔ́sɛ́ wɩ́bɔmɔ vʋk buŋgboko ná wɩ́ɛ́; ɓa sɛ́ ɓa físú. Ɛ́ nɛ́ ʋ cɔ́ɛ́ isi Aarɔŋ bɛlɛ ná bɛllɛ há káánɛ́, Ɩlɩyazarɛ rɩ́ Ɩtamarɛ nyúú. Ʋ bɔ́sɩ́wɔ́ bʋlɛ́: 17 «Béé rí ɩ́ wɩ wɩ́bɔmɔ vʋk pʋna ná namɩɛ, há ká Wɩɩsɛ ker díé, dɩhɩ̄́ ná há wɩ busunnu kené Nyuutɩna Wɩɩsɛ sɩ́ɛ́ mɛ́ sɩɛrʋ? Nyuutɩna Wɩɩsɛ púú pɛ́ɩ́wa, a makɛ rɩ́ɩ́wa la jamáŋ ná wɩ́zɔkɛ́ nɛ́ cɩ́ɩ́nɛ, káá héwó wɩ́bɔmɔ suúri. 18 Ɓa há wʋ́ʋ́ cɛ́l kené zʋ Wɩɩsɛ dɩmɩnɩ́ sɩɛrʋ; ɩ́ mɔhɔ̃́ rɩ́ɩ́wa dúú namɩɛ dɩhɩ̄́ ná há wɩ busunnu kené Nyuutɩna Wɩɩsɛ sɩ́ɛ́ mɛ́, a nɛ ɛ́ ŋ há bʋ́lɛ́ pɛ́ɩ́wa.» 19 Aarɔŋ lɩ́sɛ nʋɔ pá Moyizi bʋlɛ́: «Zaa nɛ́ ŋ bɛlɛ ɔ́sɩ́wɔ́ tɩɩ wɩ́bɔmɔ vʋk arɩ́wɔ́ vʋkfísi a pá Nyuutɩna Wɩɩsɛ; wɩ́ɩ́ ná há péríŋ ɛ́ har rɩ́ mɛ́, rɩŋ fa dí wɩ́bɔmɔ vʋk namɩɛ né zaa, ʋ sɩ́ a wérí Nyuutɩna Wɩɩsɛ sɩ́ɛ́ mɛ́?» 20 Moyizi zésú nʋlɩ́sɔ́ ná ʋ ɛ́ tɔ́rʋ́ sɩɛrʋ.