Aarɔŋ rɩ́rʋ́ bɛlɛ púl vʋka ɔsɛ́
9
1 Tapʋlɛ córí kal, Moyizi yɩ́rɛ Aarɔŋ rɩ́rʋ́ bɛlɛ, córí kal, ɓa rɩ́ Ɩzɩrayɛl nɩhɩɛ̃́sɛ. 2 A bʋl Aarɔŋ rɩ́ bʋlɛ́: «Ja nɔwie ná ɩ há sɩ́ kaa ɔsɛ wɩ́bɔmɔ vʋk, a ja peɓala má ɩ há sɩ́ kaa ɔsɛ vʋkfísi, a káŋwɔ́ wuu ko ɓʋ́ pá Nyuutɩna Wɩɩsɛ. Sɩ́ ló rɩ́ dɩkɔsɔ mɩ́ŋwɔ́ oro wuu mí. 3 Ká bʋl pá Ɩsɩrayɛl bɛlɛ, rɩ́wɔ́ ja buŋgboko a kaa ko ɔsɛ wɩ́bɔmɔ vʋk, ká rɩ́wɔ́ ja nɔwie arɩ́ bɩná balá pewie, rɩ́ dɩkɔsɔ sɩ́wɔ́ oro wuu mí mɩ́nʋ́, a káŋwɔ́ ko ɔsɛ vʋkfísi. 4 A ja nɔɓala rɩ́ peɓala, a ŋmʋsɛ míŋ rɩ́ nʋʋ súúri, a kaa ko ɔsɛ tɛŋfɩ́ɛ́l vʋk, a pá Nyuutɩna Wɩɩsɛ. Bee wɩ́ɛ́ zaa nɛ́ rɩ́ Nyuutɩna Wɩɩsɛ mákʋ́ tɩɩ cáánɩ́wa.» 5 Ɓa sɩɛ́ ja ɓɩɛ ná wuu Moyizi há sɩ́ rɩ́wɔ́ ja, a kaa ko cɛme táŋtɛjaa sɩ́ɛ́. Ɩzɩrayɛl nɩɛ ná wuu isi tuuperi a cɛ́ dahá Nyuutɩna Wɩɩsɛ sɩ́ɛ́. 6 Ɛ́ nɛ́ Moyizi sɛ́: «Ŋ sɩ́ makɛ Nyuutɩna Wɩɩsɛ há có rɩ́ɩ́wa á wɩ́ɩ́ ná, ká rʋ́ʋ́ píŋ nyɩ́ɩ́sɩ́ɩ́wa mɛ́.» 7 Ká bʋl Aarɔŋ rɩ́ bʋlɛ́: «Tuuperi koro a la sɩ́ɛ́ ɔsɩ́ suúri vʋk arɩ́rɩ́ vʋkfísi ná, a mʋ́ʋ́rɩ́ tɩɩ busunnu arɩ́ jamáŋ wuu busunnu; ká la púl ná má pálɔ ɔsɛ vʋk pɔ́ʋ́, a mʋ́ʋ́rɩ́wɔ́ busunnu, anɛ́ ɛ́ Nyuutɩna Wɩɩsɛ há mákɛ́.»8 Ɛ́ nɛ́ Aarɔŋ peri koro, a kɔ́rkɛ nɔwie ná ʋ tɩɩ wɩ́bɔmɔ yɩr mɛ́. 9 Aarɔŋ bɛlɛ ka cɛ́l pɔ́ʋ́, ʋ púú néníwie takɛ a hé koro keŋe ná há nɩhɩ̃́ nyɩ́sɛ mɛ́, ká pi káánɛ bɩ́sɛ hé koro mʋ́kur mí. 10 Ká pa pʋsɛ ná nʋnnɛ, cúcowíé rɩ́ cɔ́ɛ́gɛrɔ́ daha nʋʋ, a físi koro daha anɛ ɛ́ ná Nyuutɩna Wɩɩsɛ há mákɛ́ pá Moyizi. 11 A pa naŋkáánɛ rɩ́ kɛnɔ lɛ tɔ́ɔ́ har rɩ́ a nyɩkɛ. 12 Ʋ kɔ́rkɛ vʋkfisi pʋna; ʋ bɛlɛ cakɛ cɛ́l pɔ́ʋ́, ʋ laa gaarɛ koro kíŋkere. 13 Ɓa pa naŋbɩ́ɛ́sɛ rɩ́ nyúú má pɔ́ʋ́, ʋ la a físi koro daha. 14 Ʋ sɛ́sɛ́ sɩɛrʋ ɓɩɛ arɩ́ naasɛ, a físíwó má súúri namɩɛ ná mɛ́.
15 Ká Aarɔŋ sɩɛ́ pa jamáŋ oŋkaakoolé ná, ɔsɛ vʋk pá Nyuutɩna Wɩɩsɛ. Ʋ pí jamáŋ suúri buŋgboko ná ɓʋ́ a ɔsɛ vʋk, anɛ ʋ há pí nɔwie má a ɛ́. 16 Ʋ ɓʋ́ʋ́sɛ vʋkfísi pʋsɛ ná bɛllɛ, a ɔsɛ vʋk, ʋ ɛ́ ná há cɛ́rɛ́ mɛ́. 17 Ʋ pa pállɛ ná má ɔsɛ vʋk; ʋ a míŋ nɛ́cɛ́ sɩ́ɩ́ a físi koro daha, a súúri cʋ́cʋɔ vʋkfísi mí. 18 Ʋ ɓʋ́ nɔɓala ná rɩ́ peɓala ná a ɔsɛ tɛŋfɩ́ɛ́l vʋk jamáŋ yɩr mɛ́. Aarɔŋ bɛlɛ pi cɛ́l pɔ́ʋ́ ʋ laa gaarɛ koro lʋ́lɔ́ŋsɛ. 19 Nɔɓala ná rɩ́ peɓala ná náŋnʋnnɛ dɩhɛ̄́ wuu: múdunni, nʋʋ ná há tɔ́ lowíé mí, cucówíé rɩ́ cɔ́ɛ́gɛrɔ́ nʋʋ, 20 ɓa pɔ́wɔ́ súúri beŋtunni mí a pɔ́ʋ́, ʋ laa físi koro daha. 21 Aarɔŋ pá beŋtunni ná rɩ́ néduu húī́ ná, a kaa cáánɛ Nyuutɩna Wɩɩsɛ, a nɛ ɛ́ Moyizi há máŋsɛ́. 22 Aarɔŋ há ɔ́sɛ́ vʋka ná wuu tenni : suúri vʋka, vʋkfíse, tɛŋfɩ́ɛ́l vʋka, ʋ kenú nɛ́ŋsa ɓɔ́ a caasɛ jamáŋ ná ká hé bárka pɔ́wɔ́. Ká sɩɛ́ lɛ koro daha tuwi.
23 Moyizi rɩ Aarɔŋ zʋ́ céme táŋtɛjaa. Ɓa há bɩ́rɛ́ lɛ, ɓa hé bárka pá jamáŋ ná wuu. Ɛ́ nɛ́ Nyuutɩna Wɩssɛ píŋ tuwi nyɩɩsɛ nɩɛ ná wuu sɩ́ɛ́ mɛ́. 24 Níŋ de lɛ Nyuutɩna Wɩɩsɛ rɩ́ a tuwi dí vʋka ná rɩ́wɔ́ nʋnnɛ ná wuu koro daha, ɓa físi. Jamáŋ wuu ná ɛ́, a cáási satɔrɔ́ cááse, ká káŋwɔ́ sɩ́ɛ́ cú tíé.