Wɩɩsɛ dʋ́ŋdʋ́ʋ̄́ vʋk'ɔɔsa bilé wɩ́ɛ́
8
1 Nyuutɩna Wɩɩsɛ bʋ́l Moyizi rí bʋlɛ́: 2 «Yɩ́rɛ Aarɔŋ rɩ́rʋ́ bɛlɛ, a pa vʋk'ɔ́ɔ́sɛ́ gɛnnɛ ná, a pi lɩ́sɛnʋʋ ná ɓa há ɔ́ŋsɛ́ aá hé nyúú mí, a kɛsɛ suúri vʋk nɔɓala rɩ́ peɓallɛ ná bɛllɛ, a pi sɩbʋ́rtoó dɩpɛ́ŋ fʋ́yaakɔ́ sɩ́ɩ́ ná, 3 a kaa mʋ́ céme táŋtɛjaa dánnʋɔ, ká yɩ́rɛ Ɩzɩrayɛl púl nɩɛ wuu rɩ́wɔ́ ko róŋ.» 4 Ɛ́ nɛ́ Moyizi a ɛ́ ná Nyuutɩna Wɩɩsɛ há sʋ́ʋ́ a. Ʋ yɩ́rɛ Ɩzɩrayɛl nɩɛ wuu ɓa ko céme táŋtɛjaa dánnʋɔ. 5 Ʋ bʋl pɔ́wɔ́ bʋlɛ́: «Ɩ ná Nyuutɩna Wɩɩsɛ há sɩ́ ráá ɔ́ʋ́ ná.» 6 Ká Moyizi sɩɛ́ a Aarɔŋ rɩ́rʋ́ bɛlɛ tuuperi, ʋ a nyii fówó. 7 Moyizi pi gɛluŋo su Aarɔŋ, a pi yɛ́wɛ suu súúri, a pi pɛ́nɛ vɔ́wʋ́ anɛ báltɛ, a pi yɛ́wɛ daha gɛwie suu sakɛ, ká ka gɛwie ná zʋɔsa nʋrɛ báltɛ ná mɛ́. 8 A baa pi baŋcɩtɔ́lɔ má, ɓa há pá dɔ́wpɛ́rsɛ ná ɓa háá yɩ́rɛ Urimi rɩ́ tumimi cɔ́ʋ́ mɛ́, a súú. 9 A pi nyúbálɔ́ bá Aarɔŋ nyúú; a pi salmɛ pɛ́rsɛ cɔ́ tule rí, ʋ ná daha ɓa há pʋ́ŋsɛ́ bʋlɛ́ Nyuutɩna Wɩɩsɛ nɛ́ tʋ́ʋ̄́; anɛ ɛ́ Nyuutɩna Wɩɩsɛ há sʋ́ʋ́ a. 10 Moyizi baa pi nʋʋ ná má, a ɔ́ŋsɛ hé céme táŋtɛjaa ná rɩ́rʋ́ sɩɛrʋ onni wuu mí, rɩ́ Wɩɩsɛ nɛ́ tɩ́llɩ́wɔ́. 11 A a mɩ́sɛ koro naasɩ́ balpɛ, ká ɔ́ŋsɛ nʋʋ ná hé koro rɩ́rʋ́ daha cɩksɛ wuu mí, a hé hɔɔ naŋtaŋa ná rɩ́rʋ́ dɩsakɩ́ wuu mí, a makɛ rɩ́ Wɩɩsɛ nɛ́ tɩ́llɩ́wɔ́. 12 Ʋ ɔ́ŋsɛ nʋʋ ná cuuri Aarɔŋ nyúú mí, a bílú rʋ́ʋ́ a Wɩɩsɛ vʋk'ɔɔsɔ. 13 Moyizi a Aarɔŋ bɛlɛ má tuuperi, ʋ pa gɛluŋe ná súwo, a ka vɔɔ́sɛ vɔsɛ, a pa nyúbállɛ báwɔ́ nyunni mí, anɛ ɛ́ Nyuutɩna Wɩɩsɛ há mákɛ́ pɔ́ʋ́. 14 Ʋ a ɓa ka suúri vʋk nɔɓala ná peri, Aarɔŋ rɩ́rʋ́ bɛlɛ pɔ́wɔ́ nɛ́ŋsa tɩ́kʋ́ nyúú mí. 15 Ká Moyizi kʋ́ŋ baŋ, a cakɛ cɛ́l. A kánʋ́ néníwie takɛ cɛl ná a hé koro lʋ́lɔ́ŋsɛ wuu mí, a mʋ́ʋ́rʋ́ busunnu, ká pi káánɛ bɩ́sɛ hé koro mʋ́kur mí; rɩ́ Wɩɩsɛ nɛ́ tɩ́llʋ́, ká rɩ́wɔ́ ʋ́'ɔsɛ vʋka ʋ daha. 16 Moyizi pi sɩɛrʋ ɓɩɛ daha nʋʋ ná ɓa há dɩ́ɛ́rɛ, arɩ́ cɔ́ɛ́gɛrɔ́ ná há tɔ́ cɔ́ɛ́ mɛ́, arɩ́ cúcówíé ná bɛlɛ rɩ́wɔ́ daha nʋʋ, a físíwó wuu koro ná daha. 17 Ká Moyizi a ɓa pi namɩɛ ná káánɛ, a súúri bɩna rɩ́ kɛnɔ mɛ́, a kaa lɛ tɔ́ɔ́ har rɩ́, a físíwó wuu anɛ ɛ́ Nyuutɩna Wɩɩsɛ há maŋsɛ́ pá Moyizi.
18 Ʋ baa a ɓa ka vʋkfísi peɓala ná má ko, Aarɔŋ rɩ́rʋ́ bɛlɛ pá nɛ́ŋsa tɩkɛ nyúú mí. 19 Ká Moyizi kʋŋ baŋ, a ka cɛ́l gaarɛ koro lʋ́lɔ́ŋsɛ wuu. 20 Ʋ bɩ́ɛ́sɛ piẽso ná wuu, a pi nyúú rɩ́ nʋnnɛ wuu súúri, a físíwó wuu. 21 Ká pa sɩɛrʋ ɓɩɛ arɩ́ naasɛ wuu sɛsɛ, a físíwó má súúri; pieŋso ná pírmí wuu físi koro daha, anɛ ɛ́ Nyuutɩna Wɩɩsɛ há maŋsɛ́ pá Moyizi. Ʋ sɔ́ŋ a wérí a zɛ́ aá yakɛ Nyuutɩna Wɩɩsɛ mɛ́.
22 Ʋ baa a ɓa ka peɓala ná nɔ́ŋɔ má ko, ʋ ná ɓa há ɓʋ́ a nyʋɔsɛ vʋk'ɔɔsa ká ɓa púl vʋka ɔsɛ́. Aarɔŋ rɩ́rʋ́ bɛlɛ pa nɛ́ŋsa tɩkɛ nyúú mí, 23 ká Moyizi ɓʋ́ a cakɛ cɛ́l. A a hé Aarɔŋ néduu dɩllɛ mɛ́, a tákʋ́ néduu néníbál mɛ́, a tákʋ́ nédúú naa má néníbál mɛ́. 24 Moyizi a Aarɔŋ bɛlɛ má tuuperi, ʋ a cɛ́l ná héwó má néduu dɩlla mɛ́, arɩ́wɔ́ néduu nénibáála mɛ́, rɩ́wɔ́ naasɛ néníbáála mɛ́. Ká sɩɛ́ pi cɛ́l ná káánɛ mɩ́sɛ koro lʋ́lɔ́ŋsɛ wuu. 25 Moyizi cónnú nannʋnnɛ dɩhɛ̃́ wuu, múdúŋ, nʋʋ ná há tɔ́ lowíé mí, cɔ́ɛ́ daha cɔ́ɛ́gɛrɔ́, cúcowíé ná bɛllɛ rɩ́wɔ́ nʋʋ, arɩ́ néduu húĩ́. 26 A lɩ́sɛ sɩbʋ́rtoó gatóó balá, rɩ́ gatóó ná ɓa há ŋmʋ́sɛ́ rɩ́ nʋʋ a pʋʋrɛ balá, arɩ́ ŋmɔmʋ́ má balá, sɩbʋ́rtoó dɩpɛŋ fʋ́yaakɔ́ ná há bíl Nyuutɩna Wɩɩsɛ sɩ́ɛ́, sɩɛrʋ; a pii súúri nannʋnnɛ ná rɩ́ néduu húĩ́ ná mɛ́. 27 A píwó wuu hé Aarɔŋ rɩ́rʋ́ bɛlɛ nɛ́ŋsa mɛ́, ká a ɓa kaa cáánɛ Nyuutɩna Wɩɩsɛ anɛ ɓa háá a ɛ́ vʋk ɔsɛ́ mɛ́, ká pii pɔ́ʋ́. 28 Ká Moyizi bɩrla ɛ́ onni ɓa nɛ́ŋsa mɛ́, a sakɛ koro daha, vʋk naŋfísi ná nyúú, a físíwó wuu; ɓa bilé vʋk nɛ́ ɛ́, a ka sɔ́ŋ wero a pá Nyuutɩna Wɩɩsɛ. 29 Moyizi pi pieŋso ná beŋtúú a kaa ɓɔ́ cáánɛ Nyuutɩna Wɩɩsɛ; ɛ́ beŋtúú ní ká Moyizi má ker anɛ Nyuutɩna Wɩɩsɛ há máŋsɛ ɛ́ pɔ́ʋ́.
30 Moyizi pi nʋʋ ná ɓa há ɔ̃́sɛ́ aá hé nyúú mí, arɩ́ koro daha cɛ́l má mʋɔ́, a mɩ́sɛ hé Aarɔŋ rɩ́rʋ́ gɛnnɛ mɛ́, a mɩ́sɛ Aarɔŋ bɛlɛ má rɩ́wɔ́ gɛnnɛ; ɛ́ nɛ́ ká Aarɔŋ rɩ́rʋ́ bɛlɛ bilé, ɓa rɩ́wɔ́ gɛnnɛ wuu, rɩ́wɔ́ a Wɩɩsɛ nɩtɩ́llɛ.
31 Moyizi bʋl Aarɔŋ rɩ́rʋ́ bɛlɛ rɩ́ bʋlɛ́: «Ɩ́ pi hatɩ́ŋnɛ́ piẽso ná namɩɛ cɔ́ céme táŋtɛjaa dánnʋɔ mɛ́, a dúú ráŋ; ɩ́ dúú arɩ́ dɩpɛ́ŋ ná ɓa há kené ko ɔsɛ vʋk. Anɛ ɛ́ ŋ há máŋsɛ́ a bʋlɛ́: «Aarɔŋ rɩ́rʋ́ bɛlɛ nɛ́ tʋ́ʋ́ rɩ́wɔ́ dí.» 32 Rɩɩ́wa dí namɩɛ ná rɩ́ dɩpɛ́ŋ ná ká káánɛ, ɩ́ pii hé níŋ mí rɩ́wɔ́ físi. 33 Ɩ́ ké céme táŋtɛjaa ná dánnʋɔ, tápʋlɛ balpɛ; rɩ́ɩ́wa bilé vʋk'ɔsɛ tápʋlɛ balpɛ nʋɔ cesi. 34 Tʋtʋmɩ́ né á zaa há tʋ́mɛ́, Nyuutɩna Wɩɩsɛ pá nʋɔ rá a ɛ́ nɛ́, a makɛ rɩ́ɩ́wa wɩ́bɔma suúri hé. 35 Ɛ́ tápʋlɛ balpɛ, ɩ́ mɩŋ ráŋ wɔhɔ rɩ́ tɩ́taŋ wuu. Ɛ́ nɛ́ ká rɩ́ɩ́wa tʋŋ aá pá Nyuutɩna Wɩɩsɛ, a makɛ rʋ́ʋ́ sɩ́ɩ́wa ɓʋ́ʋ́sʋ́. Wɩɩsɛ há sɛ́ rɩ́ŋ a wɩ́ɛ́ ná nɛ́ ɛ́.» 36 Nyuutɩna Wɩɩsɛ há tɩ́ŋ Moyizi mí a máŋsɛ wɩ́ɛ́ ná pá Aarɔŋ rɩ́rʋ́ bɛlɛ, ɓa sáŋɔ́ a a ɛ́ wɩ́ɛ́ wuu.