Ŋ zɔ́kɔ́ vʋk wɩ́ɛ́
7
1 Ná vʋk ná há mɔhɛ̃́, rɩ nɛ́ŋ á wɩ́ɩ́ zɔkɛ rʋ́ʋ́ ɔsɛ: Wɩɩsɛ nɛ́ tɛ ɛ́ vʋk onni wuu. 2 Ɓaá ɓʋ́ ŋ zɔ́kɔ́ vʋk pʋna, vʋkfisi pʋna dɩɓʋ́ɩ́ nɛ́. Rɩ́ vʋk'ɔɔsɔ cákʋ́ cɛ́l a hé koro lʋ́lɔ́ŋsɛ wuu. 3 Ká conni nannʋnnɛ dɩhɛ̃́ wuu pá Wɩɩsɛ: múdúŋ, nʋʋ ná há tɔ́ lowíé mí, 4 cúcówíé ná bɛllɛ rɩ́wɔ́ nʋʋ, tɩŋa nʋʋ, cɔ́ɛ́gɛrɔ́ ná há tɔ́ cɔ́ɛ́ mɛ́, ɓaá lɩ́sʋ́ rɩ́ cúcówíé ná nɛ́ hé náŋá mɛ́. 5 Rɩ́ vʋk'ɔɔsɔ lɔ́wɔ́ wuu a físí koro daha a pá Nyuutɩna Wɩɩsɛ. Ŋ zɔ́kɔ́ vʋk nɛ́ ɛ́. 6 Vʋk'ɔɔsa jaa báála dʋŋɔ nɩ́ɩ́ dúú namɩɛ. Ɓaá dúú wuolo ná sɩɛrʋ nɛ́, ráŋ ná ɓa há lɩ́sɛ́ ɛ́ wɩ́ɛ́. Wɩɩsɛ ker ní. 7 Ɛ́ vʋk ɔsɛ́ rɩ́ suúri vʋk wɩ́ɛ́ wuu ní balá. Vʋk'ɔɔsɔ ná há ɔ́sɛ́ ɛ́ vʋk, a mʋ́ʋ́rɛ busunnu, ʋ nɛ́ tʋ́ʋ́ namɩɛ. 8 Vʋk'ɔɔsɔ ná há ɓʋ́ vʋkfísí pʋna pá Wɩɩsɛ, ʋ nɛ́ tɛ ɛ́ pʋna kɛnɔ. 9 Pállɛ ná é wuu ɓa há kené ko pá Wɩɩsɛ, rɩ ɓa wásɛ́ fúúri mí ní, rɩ ɓa hál naŋtáŋŋa mɛ́ nɛ́, rɩ́ ɓa pʋ́ʋ́rɛ́ táásɩcɔ́l mɛ́ nɛ́, vʋk'ɔɔsɔ ná há lɛ́ɛ́ pá Wɩɩsɛ nɛ́ tɩ́wɔ́. 10 Pálɔ ná é wuu há ká míŋ ɓa ŋmʋsɛ rɩ́ nʋʋ, ɛ́rá má oŋbíé, Aarɔŋ bɛlɛ sɩ́ kaa ɓa rɩ́wɔ́ mɔ náŋá, rɩ́wɔ́ pa.
Tɛŋfɩ́ɛ́l vʋk ɔsɛ́ wɩ́ɛ́
11 Tɛŋfɩ́ɛ́l vʋk ná ɓa há ɔ́sɛ́ aá pá Nyuutɩna Wɩɩsɛ, ʋ wɩ́máŋsɛ nɛ́ nyɛ́: 12 Rɩ tɛŋfɩ́ɛ́l vʋk siile ní rɩ́ nɛ́ŋ kaa ko rʋ́ʋ́ ɔsɛ, pʋna nɩ́ɩ́ la sɩ́ɛ́, rɩ́wɔ́ pʋʋrɛ ɓáfurótu ká sɩ́ sɩbʋr ráŋ hé; a hé ŋmɔmʋ́ ká sɩ́ sɩbʋ́r ráŋ hé. Ká pi nʋʋ ŋmʋsɛ míŋ náŋa a hal, a sɩɛ́ súúri pʋna ná mɛ́. 13 A baa súúri sɩbʋ́r dɩpɛ́ŋ, a káŋwɔ́ wuu ko ɔsɛ ɛ́ tɛŋfɩ́ɛ́l vʋk. 14 A lɩ́sɩ́wɔ́ balá baláwa a pá Nyuutɩna Wɩɩsɛ. Vʋk'ɔɔsɔ ná há cákɛ́ cɛ́l a hé koro kíŋkere, ʋ nɛ́ tɛ Nyuutɩna Wɩɩsɛ ker ná. 15 Ɛ́ vʋk namɩɛ waá cɔ́. Ɓaá dúú wuu, ʋ kal ɓʋ́ʋ́lɛ ná nɛ́. 16 Ká rɩ́ satɔ́ɔ́rɛ vʋk nɛ́, ɛ́rá má nʋlɩ́sɔ vʋk pʋna nɛ́ ríwɔ́ ɓʋ́, rɩ́ dúú namɩɛ ɛ́ kal tɩɩ ká rʋ́ʋ́ káánɛ, ɓa wóú pi aá bil rɩ́ tɔ́ɔ́ pʋl rɩ́wɔ́ pii dí. 17 Rʋ́ʋ́ pérí tápʋlɛ botoro é, ɓa báá wʋ́ʋ́ dí. Ɓaá pii físi ní. 18 Rɩ nɛ́ŋ dí ɛ́ namɩɛ tápʋlɛ botoro kal, Wɩɩsɛ wɩ ɛ́ vʋk tɩ́ná saŋ. Wɩɩsɛ waá gieli rʋʋ ká vʋ́k ʋ ɔsɛ. Ɛ́ namɩɛ báá wɩ cɛ́rɛ́ rɩ́ wɩ́ɩ́ wuu ɛɛ; ká nɛrɔ ná há dúú, ʋ zɔ́kɔ́ a ja wɩ́ɛ́ cɩ́ɩ́nʋ́ tɩɩ. 19 Rɩ namɩɛ ná tɩ́kɛ́ busuunu omo mí, ɓa báá wʋ́ʋ́ dí, ɓaá píí físi ní.
Ɛ́ namɩɛ, nɛrɔ ná há wʋ́ʋ́ tɩɩ sólé, ʋ ní wóú aá dí. 20 Rɩ wɩ́bɔmɔ sól nɛ́ŋ, ká rʋ́ʋ́ dí tɛŋfɩ́ɛ́l vʋk namɩɛ ná ɓa há ɓʋ́ɛ́ pá Nyuutɩna Wɩɩsɛ, ɓaá lɩ́sʋ́ Ɩzɩrayɛl duo wuu sɩɛrʋ nɛ́. 21 Nɛrɔ ná má há tɩ́kɛ́ omo ná (há to paar) Wɩɩsɛ ra há wʋ́ tɛ mɛ́, rɩ nibííno ní, rɩ pʋna nɛ́, rɩ omo ná háá kísé ní, ká rʋ́ʋ́ tɩ́na di tɛŋfɩ́ɛ́l vʋk pʋna ná ɓa há ɓʋ́ɛ́ pá Nyuutɩna Wɩɩsɛ, ɓaá lɩ́sʋ́ Ɩzɩrayɛl duo nɩɛ sɩɛrʋ nɛ́.»
Wɩɩsɛ kíŋse náŋa má
22 Nyuutɩna Wɩɩsɛ baa bʋl Moyizi rɩ́ a bʋlɛ́ : 23 « Bʋl pá Ɩsrayɛl bɛlɛ, rɩ́wɔ́ sɩ́ nɔɔ rɩ́ pieŋso, rɩ́ bʋʋnɔ nannʋʋ dí. 24 Rɩ́wɔ́ sɩ́ pʋna há sʋ́wʋ́ tɩɩ mɛ́ nannʋʋ dí, a sɩ́ pʋna ná nacik tɩ́na há ɓʋ́ɛ́ má nannʋʋ dí. Ɓa taŋa wówó nʋʋ pi aá tʋŋ tʋtʋmɩ́ nɔ́ŋ é wuu. 25 Pʋna ná há ká rɩ́wɔ́ físi pá Nyuutɩna Wɩɩsɛ nɛ́, rɩ nɛrɔ dúú nannʋʋ, ɓaá lɩ́sʋ́ ʋ duo sɩɛrʋ nɛ́. 26 Ɩ́ dɩmɩnɩ́ wuu, ɩ́ sɩ́ diíwie cɛ́l dí, a sɩ́ pʋna má cɛ́l dí. 27 Rɩ nɛrɔ dí omo wuu cɛ́l, ɓaá lɩ́sʋ́ ʋ duo nɩɛ sɩɛrʋ nɛ́.» 28 Nyuutɩna Wɩɩsɛ baa bʋl Moyizi rɩ́ bʋlɛ́ : 29 «Bʋl Ɩsrayɛl bɛlɛ rɩ́ bʋlɛ́: Rɩ nɛrɔ wuu kúó ɔsɛ tɛŋfɩ́ɛ́l vʋk pá Nyuutɩna Wɩɩsɛ, rʋ́ lɩ́sɛ ráŋ ná há ká Nyuutɩna Wɩɩsɛ ker pɔ́ʋ́. 30 Ʋ tɩ́na tɩɩ nɛ́ mɔhɛ̃́ rʋ́ʋ́ ka Nyuutɩna Wɩɩsɛ kere ná há ká ɓɩfíse, rɩ́rʋ́ nɛ́sɛ kaa ko; namɩɛ ráŋ ná wuu há kéŋ nʋʋ, arɩ́ beŋtúú, rʋ́ʋ́ kaa ko rɩ́wɔ́ laa cáánɛ Nyuutɩna Wɩɩsɛ. 31 Rɩ́ vʋk'ɔɔsɔ pa nannʋnnɛ ná é wuu físi. Ká rɩ́ Aarɔŋ rɩ́rʋ́ bɛlɛ pi beŋtúú ná. 32 Ká rɩ́ɩ́wa lɩ́sɛ tɛŋfɩ́ɛ́l vʋk pʋna wuu néduu huī́ pá vʋk'ɔɔsɔ. 33 Aarɔŋ bio ná wuu há cákɛ ɛ́ pʋna cɛ́l, a lɩ́sɛ nannʋnnɛ físi pá Wɩɩsɛ, ʋ ker ní ká huī́ ná. 34 Ɩzɩrayɛl nɩɛ há sɩ́ ko ɔsɛ tɛŋfɩ́ɛ́l vʋka, rɩ́ ɓʋ́ʋ́sɛ pʋsɛ ná wuu, ɓa beŋtunni rɩ́wɔ́ nédu huṍ wuu, vʋk'ɔɔsɔ Aarɔŋ rɩ́rʋ́ bɛlɛ nɛ́ tɩ́wɔ́, a kaá mʋ́ wuu. 35 A dee kaa pɔ́ kal ná ɓa há sɩ́ bil Aarɔŋ rɩ́rʋ́ bɛlɛ rɩ́wɔ́ tʋŋ aá pá Wɩɩsɛ, a ɔsɛ vʋkfíse aá pá Nyuutɩna Wɩɩsɛ, ɓa ker ní ɛ́. 36 Ker ná Nyuutɩna Wɩɩsɛ há sɩ́ rɩ́ Ɩzɩrayɛl nɩɛ lɩ́sɛ pá Aarɔŋ rɩ́rʋ́ bɛlɛ, kal ná ɓa há sɩ́ bílwó vʋka ɔsɛ́ wɩ́ɛ́ nɛ́ ɛ́. Wɩɩsɛ makɛ́ nɛ́, ʋ waá giri bɩná rɩ́ bɩná.