Aarɔŋ rɩ́rʋ́ bɛlɛ tʋ́tʋ́mɛ́ wɩ́ɛ́
6
1 Nyuutɩna Wɩɩsɛ bʋ́l Moyizi rɩ́, 2 «Rʋ́ʋ́ bʋl pá Aarɔŋ rɩ́rʋ́ belɛ bʋlɛ́: ‹Ná vʋk físi ɛɛ nána: Ʋ pʋna naŋwasɩ́ ná sɩ́ sakɛ níŋ mí, koro daha tɩ́taŋ wuu rɩ́ tɔ́ɔ́ pʋl; ká rɩ́wɔ́ ɔsɛ níŋ aá hé. 3 Rɩ tɔ́ɔ́ pʋ́lɔ́, rɩ́ vʋk'ɔɔsɔ púú gepúwɩɛlwie gɛrɔ su, a púú gepuwɩɛlwie tɩ́ŋtɔlwie hé, a pa koro daha vʋkfísi tapʋmma ná, a bil koro laka. 4 Ká mʋ́ vurki ɛ́ gɛnnɛ tá ká pa gɛhúónní su, a pi tapʋmma ná kaa lɛ tɔ́ɔ́ sɩɛrʋ, a mʋ́ dɩkísí tá. 5 Koro daha níŋ ná wɩ mɔhɛ̃́ rʋ́ʋ́ dʋsɛ. Kál wuu cʋ́cʋɔ, vʋk'ɔɔsɔ sɩ́ lɩ́sɛ dagúlli hé níŋ mí, a la sɩ́ɛ́ wasɛ vʋkfísi namɩɛ ná kɛ́rɛ́ ʋ daha, ká sɩɛ́ wasɛ tɛŋfɩ́ɛ́l vʋka namɩŋsa rɩ́wɔ́ nʋnnɛ. 6 Koro daha nɩŋ ná waá dʋ́sɩ́ ná. Níŋdʋsɩ́rá nɛ́.» 7 Ná wɩ́bilí ná há tɩ́ɩ́nɛ́ oŋparɛ́ pálɔ lɩ́sɛ mɛ́: Aarɔŋ bɛlɛ nɛ́ lɔ́wɔ́ aá pá Nyuutɩna Wɩɩsɛ, koro sɩ́ɛ́. 8 Vʋk'ɔɔsɔ sɩ́ pi nʋʋ ŋmʋsɛ míŋ, a hé áŋsáŋsɛ, a lɔ́kwɔ́ nɛ́sɛ sɩ́ɩ́, a nɛ líísé, a píwó wuu súúri pálɔ ná mɛ́ a wasɛ, rʋ́ʋ́ a vʋk ná sɔ́ŋ há wéró a pá Nyuutɩna Wɩɩsɛ. 9 Aarɔŋ rɩ́rʋ́ bɛlɛ sɩ́ pa vʋk ná oŋkáánɛ a dí; rɩɩ ɓaá dí, ɓa wɩ sɩbʋ́r ráŋ hé. Ɓaá dúú céme táŋtɛjaa wuolo ná mɛ́ nɛ́, dɩhɩ̃́ ɓa há lɩ́sɛ́ ɛ́ wɩ́ɛ́. 10 Ɓa wɩ sɩ́bʋ́r píé hé oŋkáánɛ ná mɛ́ aá cɔ́ɔ́. Vʋka ná ɓa há ɔ́sɛ́ pá Nyuutɩna Wɩɩsɛ sɩɛrʋ, vʋk'ɔɔsa ker ní ɛ́. Ʋ ká wɩ́fɩ́ɛ́ŋ tɩɩ rɛ́, anɛ wɩ́bɔmɔ vʋk rɩ́ cʋɔla vʋk kere wɩ́ɛ́ há fɩ́ɛ́mɔ́ ɛ́. 11 Aarɔŋ duo sɩɛrʋ báála dʋŋɔ nɩ́ɩ́ díwó. Ɓa ker ní ɛ́ Wɩɩsɛ há pɔ́wɔ́ a kaá mʋ́ wuu. Omo ná wuu há tɩ́kwɔ́ mɛ́, Wɩɩsɛ nɛ́ tʋ́ʋ̄́ má.» 12 Nyuutɩna Wɩɩsɛ bʋ́l Moyizi rɩ́ bʋlɛ́: 13 « Rɩ́ ɓa kúó pi vʋk'ɔ́ɔ́sɛ́ nʋʋ cuuri Aarɔŋ rɩ́rʋ́ bɛlɛ kál ná, ɓa sɩ́ káŋwɔ́ pálɔ ko pá Nyuutɩna Wɩɩsɛ: ɓa sɩ́ ka míŋ kíló botoro vaa pɩ́pɔ́ʋ́; a pi fá pá cɩ́cʋɔ, ká pi fá má pá gbaanɛ. 14 Ɓaá ŋmʋsɛ míŋ ná arɩ́ nʋʋ nɛ́, a pii hé hɔɔ naŋtáŋŋa mɛ́ a hal, a ka míŋ halɩ́ ná conni, a pii pá Nyuutɩna Wɩɩsɛ, ɓa sɔ́ŋ ná zɛ́ aá tɔ́rʋ́ sɩɛrʋ. 15 Aarɔŋ bio ná wuu, ɓa há ɔ́ŋsɛ lɩ́sɛ nʋʋ hóú mí ʋ lɔ́ʋ́ mɛ́, ʋ mɔhɔ̃́ rʋ́ʋ́ tʋŋ ɛ́ nɛ́. Ʋ to wɩ́giri; ɓaá físíwó wuu ní a pá Nyuutɩna Wɩɩsɛ. 16 Vʋk'ɔɔsɔ tɩɩ vʋk omo é wuu ɓaá físi ní; ɓa wʋ́ʋ́ dí.
Suúri vʋk wɩ́ɛ́
«Suúri vʋk ɔsɛ́ naasɛ nɛ́ nyɛ́: Ráŋ ná ɓa háá ɓʋ́ʋ́sɛ vʋkfísi pʋsɛ, ráŋ nɛ́ rɩ́wɔ́ ɓʋ́ suúri vʋk pʋna má, Nyuutɩna Wɩɩsɛ sɩ́ɛ́ mɛ́. Wɩɩsɛ dʋŋɔ nɛ́ ɓa ɔsɛ ɛ́ vʋk aá pá. 19 Vʋk'ɔɔsɔ ná há ɓʋ́ɛ́, ʋ nɩ́ɩ́ dúú, cémé táŋtɛjaa wuolo sɩɛrʋ, dɩhɩ̃́ ná ɓa há lɩ́sɛ́ ɛ́ wɩ́ɛ́. 20 Omo ná wuu há tɩ́kɛ́ ɛ́ namɩ́ɛ́ mɛ́, Wɩɩsɛ nɛ́ tʋ́ʋ́. Rʋʋ cɛ́l hé gɛ́r mɛ́, ɓaá sɛsɛ ɛ́ gɛrɔ dɩhɩ̃́ ná ɓa há lɩ́sɛ́ ɛ́ wɩ́ɛ́ mɛ́ nɛ́. 21 Rɩ́ cʋ́ʋ́ vie mí ní rɩ́wɔ́ pi hé cɔ́, ɓaá céŋŋi ɛ́ vie ní. Rɩ hɔɔ vie ni rɩ́wɔ́ pii cɔ́, wɔ́ gɛ́rʋ́ wérí, a tíísú wérí arɩ́ nyii, rʋ́ʋ́ lɛ. 22 Ɛ́ namɩɛ ká Wɩɩsɛ ker ní; vʋk'ɔ'ɔɔsa rɩ́rʋ́ jaa báála dʋŋɔ nɩ́ɩ́ dúú. 23 Vʋk pʋna ná wuu ɓa há cákʋ́ cɛ́l a kaa zʋ céme táŋtɛjaa a sʋl suúri, ʋ namɩɛ to ɓɩdíílí, ɓaá púú é wuu físi ní.