Suúri vʋka náŋa wɩ́ɛ́
5
1 Rɩ nɛrɔ ká dáŋsɩ́ɛ́ wɩ́ɩ́ mɛ́, rɩɩ ɓa kúó yɩ́rʋ́ rʋ́ʋ́ ko bílú nʋɔ sarɩ́ya mɛ́, rʋ́ʋ́ vɔ́ɔ́ rʋ́ʋ́ mʋ́ bʋl wɩ́ɩ́ ná ʋ há ɩ́ɔ̃, ɛ́rá má ʋ há nɩ́ɛ́, ʋ ká wɩ́zɔkɩ́ rɛ́ ɛ́, ʋ pii cɩ́ɩ́nʋ́ tɩɩ. 2 Rɩ nɛrɔ wɩ ɛ̃ ká tɩkɛ omo wuu há kéŋ busunnu mí, rɩ baka pʋsʋwɩ́ há kéŋ busunnu mí ní, rɩ zʋ́ɔ́lɔ ɓɩsʋwɩ́ há kéŋ busunnu mí ní, rɩ tíé tútuuro oŋsʋwɛ há kéŋ busunnu mí ní, ʋ má tɩ́na zʋ́ busunnu. Ʋ ɛ́ ká wɩ́ɩ́ rɛ́ a cɩ́ínʋ́.3 Rɩ nɛrɔ wɩ ɛ̃ ká tɩkɛ nibííno ná tɛŋ dihɩ̃́ há kéŋ busunnu, há wo nɩɛ aá daarɛ, ká ko zɩŋ rʋ́ʋ́ tɩ́kɛ́ busunnu nɛ́ŋ mɛ́, ʋ ɛ́ ká wɩɩ rɛ́ a cɩ́ɩ́nʋ́. 4 Rɩ nɛrɔ wɩ ɛ̃ ká bʋl wɩ́fórke wɩ́ɩ́ wuu mʋ́l mɛ́, rʋʋ ŋmɩ́ɛsɔ́ rʋ́ʋ́ a wɩ́wero ɛ́rá má wɩ́bɔ́mɔ́ nɛ́, rʋ́ʋ́ ko zɩŋ ɛ́ mɛ́, ʋ ká wɩ́ɩ́ rɛ́ a cɩ́ɩ́nʋ́. 5 Rɩ nɛrɔ zʋ́ɔ́ ɓal wɩ́ɛ́ nyáŋ oro sɩɛrɔ, ʋ́ sɩ́ cesi wɩ́ɩ́ ná ʋ há zɔ́kɛ́, 6 ká mʋ́ ja pʋna, pemaá ɛ́rá má bʋmaá, a kaa ko ɔsɛ vʋk pá Nyuutɩna Wɩɩsɛ, ʋ wɩ́zɔkɩ́ ná yɩr mɛ́, ká rɩ́ vʋk'ɔɔsɔ mʋ́ʋ́rʋ́ wɩ́bɔmɔ busunnu tà.
7 Rɩ tɩ́na wɩ óŋ kené rʋ́ʋ́ yɔwɛ pemaá ɛ́rá má bʋmaá, ʋ wo kʋ́sɛ bɛllɛ ɛ́rá má kʋ́dɔɔlɛ bɛllɛ kaa ko ɔsɛ vʋk aá pá Nyuutɩna Wɩɩsɛ, ʋ wɩ́zɔkɩ́ ná wɩ́ɛ́. Ʋ sɩ́ pi nɔ́ŋɔ ɔsɛ suúri vʋk, ká pi nɔ́ŋɔ ɔsɛ vʋkfísi. 8 Ʋ́ káŋwɔ́ wuu bɛllɛ ko pá vʋk'ɔɔsɔ, rʋ́ lasɩ́ɛ́ pi nɔ́ŋɔ ɔsɛ suúri vʋk ná. Vʋk'ɔɔsɔ sɩ́ lɔkɛ lime wúri, ká sɩ́ nyúú wuu káá vúri; 9 a ka cɛ́l waasɛ koro nʋɔ kílo wuu, ká pi káánɛ waasɛ koro mʋ́kur má. Suúri vʋk ɔsɛ́ nɛ́ ɛ́. 10 Ká rʋ́ʋ́ pi kʋ́ma ná nɔ́ŋɔ, a ɔsɛ vʋkfísí, a nɛ ɛ́ há mákɛ́. Ká a ɛ́ ɓa há ɛ́ɛ́ aá mʋ́ʋ́rɛ wɩ́bɔmɔ busunnu, a hóú mí, rɩ́ Wɩɩsɛ hóú wɩ́bɔmɔ suúri.
11 Rɩ nɛrɔ kúó rʋ́ʋ́ wɩ kʋ́sɛ ná bɛllɛ, ɛ́rá má kʋ́dɔɔlɛ́ ná bɛllɛ wʋó ná, rʋ́ʋ́ ká míŋ kíló botoro ko tá tapummɔ ʋ wɩ́bɔmɔ súúri wɩ́ɛ́. Ʋ wɩ nʋʋ rɩ́ áŋsáŋsɛ ráŋ kuosi. Bee wɩ́ɛ́ wɩ́bɔmɔ sʋʋri vʋk nɛ́. 12 Ʋ sɩ́ káŋwɔ́ ko pá vʋk'ɔɔsɔ; rɩ́ vʋk'ɔɔsɔ a míŋ ná, a nɛ líísé, ʋ nɛ́sɛ sɩ́ɩ́, a pii hé níŋ mí, oŋwasɛ́ ná náŋa daha, rɩ́wɔ́ wuu físi a pá Nyuutɩna Wɩɩsɛ. Wɩ́bɔmɔ vʋk ɔsɛ́ nɛ́ ɛ́. 13 Vʋk'ɔɔsɔ sɩ́ a ɛ́ ná ɓa há ɛ́ɛ́ aá mʋ́ʋ́rɛ wɩ́bɔmɔ busunnu a hóú mí, a mʋ́ʋ́rɛ tɩ́na busunnu, ká rɩ́ Wɩɩsɛ hóú wɩ́zɔkɩ́ suúri. Vʋk'ɔɔsɔ sɩ́ tʋŋ ɛ́, ká pa káánɛ anɛ pálɔ.
Cʋɔla vʋk wɩ́ɛ́
14 Nyuutɩna Wɩɩsɛ bʋ́l Moyizi rí bʋlɛ́: 15 «Rɩ nɛrɔ wɩ ɛ̃ ká aa zɔkɛ Nyuutɩna Wɩɩsɛ mɛ́, a lɩ́sɛ óŋ Wɩɩsɛ kér sɩɛrʋ, peɓala ná há wɩ kɔsɔ kené ní rʋ́ʋ́ kaa ko cʋɔlɛ Nyuutɩna Wɩɩsɛ, ʋ zɔkɛ́ ná yɩr mɛ́. Rɩ́ peɓala ná cɛ́rɛ mɔ céme jaa meéwí ɛ́ ɓa há píé aá yɔwɛ pieŋso. 16 Ʋ há lɩ́sɛ omo ná Wɩɩsɛ ker sɩɛrʋ, ʋ sɩ́ ka ɛ́ meéwi ko pa Vʋk'ɔɔsɔ, a túŋ ɛ́ omo. Ʋ taŋa sɩ́ túŋ meéwi ná, bɔmmʋ́ɔ́ nyúú mi wuu bala, a dɔwɛ. Rɩ Vʋk'ɔɔsɔ la piẽ́so ná mʋ́ʋ́rʋ́ busunnu, ká rɩ́ Wɩɩsɛ hóú wɩ́zɔkɩ́ suʋ́ri.
17 Nyuutɩna Wɩɩsɛ wɩ́máŋsɛ ná sɩɛrʋ, ʋ há sɩ́ wɔ́ sɩ́ wɩ́ɛ́ ná a, rɩ nɛ́ŋ wɩ ɛ̃ má ká a oro, ʋ ká wɩ́zɔkɩ́ rɛ́ a cɩ́ɩ́nʋ́ tɩ́na.( ʋ zʋ́ wɩ́ɩ́) 18 Ʋ sɩ́ ka piɛŋso ná há sú sɩ́ɩ́, a wɩ kɔsɔ kené, ká cɛ́rɛ vʋk pieŋso, a kaa ko pá vʋk'ɔɔsɔ, rʋ́ʋ́ laa ɔsɛ ŋ zɔ́kɔ́ vʋk. Rɩ vʋk'ɔɔsɔ nɛ́ á ɛ́ ɓa há ɛ́ɛ́ aá mʋ́ʋ́rɛ busunnu hóú mí, Wɩɩsɛ sɩ́ hóú wɩ́zɔkɩ́ ná ʋ há wɩ ɛ̃ ká a, suúri. 19 Ŋ zɔ́kɔ́ cʋala vʋk nɛ́ ɛ́; Tɩ́na ɓɩ́ɛ́na fa ɔ́ɔ́ zɔkɛ Nyuutɩna Wɩɩsɛ mɛ́ nɛ́.» 20 Nyuutɩna Wɩɩsɛ bʋ́l Moyizi rí bʋ́lɛ́: 21 «Rɩ nɛrɔ a wɩzɔkɩ́ Nyuutɩna Wɩɩsɛ sɩ́ɛ́ mɛ́, ʋ há pí bɔ́ŋbɔ́ŋ ɔ́ʋ́ nɔ́ŋɔ mɛ́ wɩ́ɛ́, anɛ omo ɓa há kené ko pɔ́ʋ́ rʋ́ʋ́ bil, ʋ nyɛ nyɩɛrʋ bʋlʋ́ wɩ óŋ lɛ́ɛ́, ʋ há kɩ́ŋ omo ká bʋlʋ́ wɩ kɩ́mɛ́, anɛ ʋ há gá omo, ʋ há vɩ́rɛ́ nɛrɔ omo; 22 ɛ́rá má ʋ há pí nɛrɔ oŋyʋ́ksɛ́ káá báásɛ; ɛ́rá má ʋ há a wɩ́bɔ́ŋ oro ká ŋmɩ́ɛ́sɛ aá tɔ́. 23 Ʋ ɛ́ ká wɩ́bɔ́ŋ rɛ́ ʋ a cɩ́ɩ́nʋ́ tɩɩ. Ʋ mɔhɔ̃́ rɩ́ omo ná ʋ há gɛ́ɛ́, ʋ há vɩ́rɛ́, ʋ há mɔ́lɛ́, omo ná ɓa há píé tɛ rʋ́ʋ́ bíl, 24 omo ná wɩ́ɛ́ ʋ há ŋmɩ́ɛ́sɛ́ báásɛ, rʋ́ʋ́ túŋ ɛ́ omo wuu; rʋʋ nɛ́ ɩ́ɛ̃́ rʋ́ʋ́ há ɔ́ʋ́ ná ká vɩ́bɔ́ŋ. Ʋ taŋa sɩ́ túŋ bɔmmʋ́ɔ́ sɩɛrʋ bala, a sakɛ ɛ́ omo daha a pɔ́ʋ́ tɩ́na. 25 Ká rʋ́ʋ́ ka peɓala ná há wɩ kɔsɔ kené, aá sú sɩ́ɩ́, a cɛ́rɛ vʋk ɔsɛ́, a kaa ko pa vʋk'ɔɔsɔ rʋ́ʋ́ laa ɔsɛ zɔ́kɩrʋ́ vʋk pá Nyuutɩna Wɩɩsɛ.» 26 Vʋk'ɔɔsɔ sɩ́ cɛ́ Nyuutɩna Wɩɩsɛ sɩ́ɛ́, a mʋ́ʋ́rʋ́ busunnu, ká rɩ́ Wɩɩsɛ hé wɩ́ɩ́ ná wuu ʋ há ɛ́ɛ́ zɔ́kɛ suúri.