Suúri vʋka wɩ́ɛ́
4
1 Nyuutɩna Wɩɩsɛ bʋ́l Moyizi rí a bʋlɛ́: 2 «Bʋl pá Ɩzɩrayɛl nɩɛ a bʋlɛ́: Rɩ nɛrɔ wɩ ɛ̃ ká aa zɔkɛ Nyuutɩna Wɩɩsɛ wɩ́máŋsɛ ná oro wuu mí, a a wɩ́kísi, ɩ́ a nyɛ:3 Rɩ vʋk'ɔɔsɔ nɔhɔ̃́ nɛ́ a wɩ́bɔmɔ, rɩ́ ɛ́ wɩ́bɔmɔ wɩɩla cɩ́ɩ́nɛ jamáŋ wuu, ʋ mɔhɔ̃́ rʋ́ʋ́ ja nɔɓala ná há wéró a wɩ kɔsɔ wuu kené ní, a kaa ko ɔsɛ vʋk, a sʋ́lʋ́ ɛ́ wɩ́bɔmɔ suúri Nyuutɩna Wɩɩsɛ rɩ́. 4 Ʋ sɩ́ ka ɛ́ nɔɓala ko Nyuutɩna Wɩɩsɛ céme táŋtɛjaa daŋnʋɔ; a púú nɛ́sɛ tɩkɛ nyúú mi, ká kɔ́rkʋ́ Nyuutɩna Wɩɩsɛ sɩ́ɛ́. 5 Rɩ́ vʋk'ɔɔsɔ nɔhɔ̄́ cakɛ cɛ́l a kaa zʋ céme táŋtɛjaa, 6 Nyuutɩna Wɩɩsɛ sɩ́ɛ́, a púú néníwie takɛ cɛ́l ná, a kaa mɩ́sɛ hé Wɩɩsɛ sɩ́ɛ́ patɩ́ɩ́sazeno ná mɛ́, ʋ sɩ́ɩ́ ná há cáásɛ́ pʋmmɔ rɩ́, naasɩ́ balpɛ. 7 Ʋ sɩ́ ka cɛ́l ná mʋ́ tulaalé koro ná há mɩŋ céme táŋtɛjaa sɩɛrʋ, a hóú nyɩ́sɛ mɛ́, Nyuutɩna Wɩɩsɛ sɩ́ɛ́; ká ka cɛ́l ná káánɛ wuu lɛ, a bɩ́sɛ hé vʋk'ɔ́ɔ́sɩ́koro ná há mɩŋ céme táŋtɛjaa ná dáŋnʋɔ, ʋ mʋ́kur mí. 8 Nɔɓala ná ɓa há píé ɔsɛ suúri vʋk, ʋ sɩ tʋɔ́sʋ́ dɩhɛ̄́ ná wuu há kéŋ nʋʋ: nʋʋ ná há tɔ́ lowíé mí, arɩ́ nʋʋ ná há tɔ́ file mí. 9 A lɩ́sɛ cúcówíé ná bɛllɛ arɩ́ nʋʋ ná há tɔ́wɔ́ mɛ́, a lɩ́sɛ tɩŋnʋʋ, a lɩ́sɛ cɔ́ɛ́gɛrɔ daha nʋʋ súúri cúcowíé nʋʋ mɛ́. 10 A nɛ ʋ há tʋ́ɔ́sɩ́wɔ́ tɛŋfɩɛ́l nɔɓala namɩɛ daha ɛ́; rɩ́ vʋk'ɔɔsɔ pɔ́wɔ́ wuu físi vʋkfíse koro daha. 11 Ká pi nɔɓala ná kɛnɔ, ʋ namɩɛ, ʋ nyúú rɩ́rʋ́ naasɛ, lowíé rɩ́ filzeno rɩ́wɔ́ sɩɛrʋ ɓɩɛ, 12 ʋ naŋkáánɛ wuu, a kaa lɛ tɔ́ɔ́ har rɩ́, dɩhɩ̄́ ná há ká dɩkísi, ráŋ ná ɓa há bɩ́sɛ vʋk tapʋmmɔ aá tá, a wasɛ dagúlli níŋ mí; vʋk tapʋmmɔ dɩtɛ́ɛ́ nɛ́ rɩ́wɔ́ wásʋ́ rʋ́ʋ́ físi.
Ɩzɩrayɛl nɩɛ púl wuu vʋk wɩ́ɛ́
13 Rɩ Ɩzɩrayɛl nɩɛ wuu ní á wɩ́bɔmɔ, a zɔkɛ Nyuutɩna Wɩɩsɛ kíŋse ná nɔ́ŋɔ, ká nɩɛ wʋ́ʋ́ mɛ́ kɩ́ɛ́lɛ́, 14 rɩ ɓa kúó kɩ́ɛ́lɛ zɩŋ ɛ́ wɩ́bɔmɔ́ mɛ́, jamáŋ wuu sɩ ja nɔɓala a kaa ko céme táŋtɛjaa sɩ́ɛ́, a ɔsɛ suúri vʋk. 15 Ɩzɩrayɛl nɩɛ nɩhɩɛ̄́sɛ sɩ́ pɔ́wɔ́ nɛ́ŋsa tɩkɛ nɔɓala ná nyúú mí, Nyuutɩna Wɩɩsɛ sɩ́ɛ, ká rɩ́wɔ kɔ́rkɛ. 16 Vʋk'ɔɔsɔ nɔhɔ̄́ sɩ́ a ɛ́ nɔɔ cɛ́l, a kaa zʋ céme táŋtɛjaa; 17 a pʋ́ú néníwie takɛ ɛ́ cɛ́l, a mɩ́sɛ mɩ́sɛ patɩɩ́sa sɩ́ɛ́ ráŋ ná há cáásɛ́ pummɔ rɩ́, naasɩ balpɛ, Nyuutɩna Wɩɩsɛ sɩ́ɛ́. 18 A ɔ́ŋsɛ cɛ́l ná mʋɔ́ hé koro ná há mɩŋ céme táŋtɛjaa sɩɛrʋ nyɩ́sɛ mɛ́, Nyuutɩna Wɩɩsɛ sɩ́ɛ́, ká pi káánɛ hé vʋka koro ná há mɩŋ céme táŋtɛjaa dáŋnʋɔ mɛ́, ʋ mʋ́kur. 19 Ká rʋ́ʋ́ lɩ́sʋ́ naŋnʋʋ wuu a fisi koro daha. 20 Ʋ há pi suúri vʋk nɔɔ a ɛ́, ʋʋ́ pi ŋ́ né má rɩ́ a ɛ́ nɛ́. Ɓaá ɔ́ʋ́ ɛ́ nɛ́; ká ɓa há á ɛ́ aá mʋ́ʋ́rɛ busunnu, rɩ́ vʋk'ɔɔsɔ a ɛ́ héwó mí, ká rɩ́ŋ héwó wɩ́bɔmɔ suúri. 21 Ʋ há lá sɩ́ɛ́ wasɛ nɔɔ ná nɔ́ŋɔ ʋ físi ɛ́, ʋ sɩ́ ka ŋ́ né má lɛ tɔ́ɔ́ har, a wasɛ rʋ́ʋ́ físi. Ɩzɩrayɛl nɩɛ wuu wɩ́bɔmɔ suúri vʋk nɛ́ ɛ́.
Kuóro vʋk wɩ́ɛ́
22 Rɩ kuóro ní zɔ́kɛ kiso, a wɩ ɛ̄ ká a wɩ́ɛ́ ná ʋ Wɩɩsɛ há ká Nyuutɩna Wɩɩsɛ há sɩ́wɔ́ sɩ́ a nɔ́ŋɔ, ʋ zɔ́kɛ wɩ́ɩ́. 23 Rʋʋ kuó kɩ́ɛ́lɛ zɩŋ rʋ́ʋ́ zɔ́kɛ́ kíso, ʋ mɔhɔ̄́ rʋ́ʋ́ ka buŋgboko ná há wɩ dɩkɔsɔ kené ní ko ɔsɛ vʋk. 24 Ɓa háá ɔsɛ Nyuutɩna Wɩɩsɛ vʋkfíse ráŋ ná, ʋʋ́ ka buŋgboko ná rɩ́ lɛ ráŋ nɛ́; rɩ́ɩ́ púú nɛ́sɛ rɩ́ tɩkɛ buŋgboko ná nyúú mí, káá kɔ́rkʋ́ Nyuutɩna wɩɩsɛ sɩ́ɛ́ mɛ. Wɩ́bɔmɔ suúri vʋk nɛ́. 25 Vʋk'ɔɔsɔ sɩ́ púú néníwie takɛ pʋna ná cɛ́l, a kaa mʋ́ hé vʋka koro ná nyɩ́sɛ mɛ́, ka pi cɛ́l ná káánɛ bɩ́sɛ hé koro mʋ́kur. 26 Ká físú naŋnʋʋ wuu koro daha, anɛ ɓa háá físi tɛŋfɩ́ɛ́l vuk naŋnʋʋ ɛ́. Vʋk'ɔɔsɔ sɩ́ a ɛ́ ná ɓa há ɛ́ɛ́, aá mʋ́ʋ́rɛ busunnu, a hé kuóro ná mɛ́, ká rɩ́ŋ hóú wɩ́bɔmɔ suúri.
Pul sɩɛrʋ nɛrɔ vʋk wɩ́ɛ́
27 Rɩ púl ná sɩɛrʋ nɛ́ŋ má rɛ́ wɩ ɛ̄ ká zɔkɛ kíso, a a wɩ́ɛ́ ná Nyuutɩna Wɩɩsɛ há sɩ́ wɔ́ sɩ́ a nɔ́ŋɔ, ʋ zɔ́kɛ wɩ́ɩ́. 28 Rʋʋ kuó kɩ́ɛlɛ zɩŋ rʋ́ʋ́ zɔ́kɛ kíso, ʋ mɔhɔ̄́ rʋ́ʋ́ ka bʋmaá ná há wɩ dɩkɔsɔ kené ní ko ɔsɛ vʋk, ʋ wɩ́zɔkɩ́ ná yɩr mɛ́. 29 Ʋ sɩ́ ka bʋʋnɔ ná lɛ ráŋ ná ɓa háá ɓʋ́ vʋkfise pʋsɛ, a púú nɛsɛ tɩkɛ ɛ́ bʋʋnɔ nyúú mí, ká kɔ́rkɛ. 30 Vʋk'ɔɔsɔ sɩ́ púú néníwie takɛ bʋʋnɔ ná cɛ́l, a kaa mʋ́ hé vʋka koro ná nyɩ́sɛ́ mɛ́, ká pi cɛ́l ná káánɛ bɩ́sɛ hé koro ná mʋ́kur mí. 31 Ʋ sɩ́ lɩ́sʋ́ naŋnʋʋ wuu, a nɛ ɓa háá lɩ́sɛ tɛŋfɩ́ɛ́l vʋk pʋna naŋnʋʋ ɛ́, rɩ́ vʋk'ɔɔsɔ laa físi koro daha, rʋ́ sɔ́ŋ tɔ́rɩ́ŋ é Nyuutɩna Wɩɩsɛ sɩɛrʋ. Rɩ́ vʋk'ɔɔsɔ a ɛ́ ɓa há ɛ́ɛ́ aá mʋ́ʋ́rɛ busunnu, a hóú mí, ká rɩ́ŋ hóú wɩ́bɔmɔ suúri. 32 Rɩ pieŋso ní rʋ́ jɩ́ja rʋ́ʋ́ kaa ko ɔsɛ ɛ́ vuk, ʋ mɔhɔ̄́ rʋ́ʋ́ a pemaá ná há wɩ dɩkɔsɔ kené ní. 33 Ʋ sɩ́ púú nɛ́sɛ tɩkɛ pʋna ná nyúú mí, ká ɓʋ a ɔsɛ suúri vʋk, dɩhɩ̄́ ná ɓa háá ɓʋ́ vʋkfíse pʋsɛ. 34 Rɩ́ vʋk'ɔɔsɔ púú néníwie takɛ pʋna ná cɛ́l, a kaa mʋ́ hé vʋk koro nyɩ́sɛ mɛ́, ká bɩ́sɛ cɛ́l ná káánɛ hé koro mʋ́kur mí. 35 Ʋ sɩ́ lísʋ́ naŋnʋʋ wuu a nɛ ɓa há lɩ́sɛ tɛŋfɩ́ɛ́l vʋk naŋnʋʋ ɛ́, rɩ́ vʋk'ɔɔsɔ laa súúri onni ná náŋa mɛ́, a físi koro daha a pá Nyuutɩna Wɩɩsɛ. Rɩ́ vʋk'ɔɔsɔ a ɛ́ ná ɓa há ɛ́ɛ́ aá mʋ́ʋ́rɛ busunnu, a hóú mí ʋ wɩ́bɔmɔ ná yɩr mɛ́, ká rɩ́ŋ hóú suúri.