LƖƖ 27

Vʋk'ɔ́ɔ́sɩ́koro wɩ́ɛ́

1 <<Ká rɩ́ɩ́ ja ákásɩ́á daasɛ a bɩrmɛ vʋk'ɔ́ɔ́sɩ́koro; ʋ gbési sɩ́ a nágʋtókó sɩ́ɩ́ bɔmmʋ́ʋ́, rʋ́ʋ́ jɛ́l má a nágʋtókó sɩ́ɩ́ bɔmmʋ́ɔ́, rʋ́ʋ́ wuu mɔ náŋá, ká rʋ́ʋ́ isé a nágʋtókó sɩ́ɩ́ botoro. 2 Ɩ sɩ́ hé nyɩ́sɛ baná ʋ lʋ́lɔ́ŋsɛ ná baná mɛ́, rɩ́wɔ́ rɩ́ koro ná wuu cɔ́ náŋá mɛ́ a a óŋ balá. Ɩ sɩ́ cʋɔrɛ kɔmɔ́ a tɔ́ɔ́ wuu mí. 3 Ɩ sɩ́ pi kɔmɔ́ a bɩrmɛ koro ná oŋkaatʋmɛ́ wuu: tapʋmmɔ oŋkaapaalɛ́, pɛ́lwa, cɛ́l gbaŋsɛ, naŋhɛmɛ arɩ́ níŋtɔ́kɩ́rɛ́ɓɩɛ. 4 Ɩ sɩ́ a kɔmɔ́ gɩ́rɩ́yázɛ ɓɩzeno, a hé kɔmɔ́ gúóréwa baná, ʋ lʋ́lɔ́ŋsɛ mɛ́. 5 Ɩ sɩ́ pi gɩ́rɩ́yázɛ ná su koro ná, rʋ́ʋ́ tuwi cɛ́rɛ koro ná isé fá. 6 Ɩ sɩ́ cɔ́ ákásíá dole bɛllɛ, a cʋɔrɛ kɔmɔ́ tɔ́. 7 Ɓa sɩ́ pi ɛ́ dole a tʋ gúóréwa ná mɛ́, koro ná lokure bɛllɛ mɛ́, rɩ́wɔ́ kaa púú aá va. 8 Ɩ sɩ́ pi dacɔrʋ a a koro ná rʋ́ʋ́ sɩɛrʋ wuu a bʋɔ, rʋ́ʋ́ nɛ ɛ́ tɩɩ tɩɩ ŋ há mákɛ́ pɛ́ɩ́ paalɔ nyúú.

Táŋtɛjaa ná wuolo wuolo wɩ́ɛ́

9 Ɛ́ har mɛ́, ɩ sɩ́ a wuolo a kíl táŋtɛjaa ná. Gɛpúyoolí ná há dúókó pɛ́ŋsɛ nɛ́ rɩ́ɩ́ pii kɛ́rɛ ɛ́ wuolo. Tɔ́ɔ́ lʋ́lɔ́ŋɛ rɩ́, ɩ sɩ́ pi pɛ́ŋbíé kɛ́rɛ, rʋ́ʋ́ gbési a nágʋtókó sɩ́ɩ́ zɔlɔ. 10 Rɩ́wɔ́ ja kɔmɔ́ dacɔ́ŋsɛ mɛrɛ́ rɩ́wɔ́ naasɛ mɛrɛ́, a hé wárɛ káŋsɛ rɩ́ wárɛ oŋtʋʋlɛ́ ɓa mɛ́. 11 Tɔ́ɔ́ lʋ́lɔ́ŋɛ nɔ́ŋɔ rɩ́, ɩ sɩ́ kɛ́rɛ rɩ́ pɛ́ŋbíé, rʋ́ʋ́ má gbési a nágʋtókó sɩ́ɩ́ zɔlɔ; a hóú má kɔmɔ́ dacɔ́ŋsɛ mɛrɛ́ rɩ́wɔ́ naasɛ mɛrɛ́, rɩ́wɔ́ wárɛ káŋsɛ rɩ́ wárɛ oŋtʋʋlɛ́. 12 Wuolo ná jɛ́l, tɔ́ɔ́ nyúú rí sɩ́ a nágʋtókó sɩ́ɩ́ mɛɛ́sɛllɛ rɩ́ fí; kɔmɔ́ dacɔ́ŋsɛ fí rɩ́wɔ́ naasɛ má fí. 13 Wuolo ná jɛ́l, tɔ́ɔ́ mʋ́bʋɔ rɩ́ má sɩ́ a nágʋtókó sɩ́ɩ́ mɛɛ́sɛllɛ rɩ́ fí. 14 Cɔɔ nɔ́ŋɔ pɛ́nɛ nágʋtókó sɩ́ɩ́ fí rɩ́ bɔmmʋ́ɔ́, kɔmɔ́ dacɔ́ŋsɛ botoro rɩ́wɔ́ naasɛ botoro; 15 cɔɔ nɔ́ŋɔ má pɛ́nɛ nágʋtókó sɩ́ɩ́ fí rɩ́ bɔmmʋ́ɔ́, kɔmɔ́ dacɔ́ŋsɛ botoro rɩ́wɔ́ naasɛ botoro. 16 Wuolo ná dánnʋɔ, ɩ sɩ́ hé nágʋtókó sɩ́ɩ́ mɛrɛ́ patɩ́ɩ́sa; ɛ́ patɩ́ɩ́sa, ɩ sɩ́ ja gepúwɩɛlɩ́wie ɓa há yóé, ɓa mʋɔlɩ́ rɩ́ ɓɩfɩɛŋsɛ mukuku, arɩ́ ɓɩkɔklɛ́, a sɔ pɛ́ŋbíé a fʋ́, ʋ má rɩ́rʋ́ kɔmɔ́ dacɔ́ŋsɛ baná rɩ́wɔ́ naasɛ baná. 17 Wárɛ oŋtʋʋlɛ́ ná nɛ́ sɩ́ ka wuolo dacɔ́ŋsɛ ná wuu cɛ́; káŋsɛ má sɩ́ a wárɛ, ká rɩ́ naasɛ nɛ́ a kɔmɔ́. 18 Wuolo ná gbési sɩ́ a nágʋtókó sɩ́ɩ́ zɔlɔ, ʋ jɛ́l nágʋtókó sɩ́ɩ́ mɛɛ́sɛllɛ rɩ́ fí, kɔ́ʋ́ isé a nágʋtókó sɩ́ɩ́ bɔmmʋ́ɔ́. Gepúwɩɛlɩ́wie ní rɩ́wɔ́ yo a kaa sɔ pɛ́ŋsɛ a kɛ́rɛ; dacɔ́ŋsɛ ná má naasɛ sɩ́ a kɔmɔ́. 19 Kɔmɔ́ nɛ́ rɩ́wɔ́ kaa bɩrmɛ táŋtɛjaa ná oŋkaatʋmɛ́ wuu, ʋ dapési rɩ́ wuolo dapési wuu.

Cáŋsɛ nʋʋ wɩ́ɛ́

20 <<Ɩ sɩ́ bʋl Ɩzɩrayɛl nɩɛ mɛ́ rɩ́wɔ́ pɛ́ɩ́ ólívi nʋʋ ná há wɩ busunnu kené, rɩ́wɔ́ hé cáŋsɛ ná mɛ́ rɩ́wɔ́ kɩ́ka tɛ́ŋ wuu mí. 21 táŋtɛjaa ná sɩɛrʋ, patɩ́ɩ́sazeno ná há kɛ́rɛ nʋtʋmɛ dáka ná har rɩ́ nɛ́, rɩ́ Aarɔŋ rɩ́rʋ́ bɛlɛ bil cáŋsɛ ná, rɩ́wɔ́ kɩ́ka tɩ́taŋa wuu, Nyuutɩna Wɩɩsɛ dɩmɩnɩ́. Ʋ ká wádá rɛ́ a mɔ rɩ́ Ɩzɩrayɛl nɩɛ tɩŋ, woówoówa wuu mí.