Wɩɩsɛ táŋtɛjaa wɩ́ɛ́
25
1 Nyuutɩna Wɩɩsɛ bʋl Moyizi rɩ́ bʋlɛ́: 2 <<Bʋl Ɩzɩrayɛl nɩɛ rɩ́, rɩ́wɔ́ ja satɔ́ɔ́rɩ́pállɛ ko páŋ. Ɩ́ sɩ́ la ɛ́ satɔ́ɔ́rɩ́pállɛ nɛrɔ ná wuu sɩɛrʋ há wéró dɩhɩ̃́. 3 Ná pállɛ ná ɩ́ há sɩ́ la: salmɛ, wárɛ, kɔmɔ́; 4 pɛ́ŋ'mʋ́ɔ́llɛ, pɛ́ŋfɩɛŋsɛ, gepúwɩɛlwie pɛ́ŋsɛ, bʋʋnɔ pʋ́sɛ pɛ́ŋsɛ; 5 peɓallɛ kɛŋnʋɔsɛ́ ɓɩfɩɛŋsɛ, kɛŋnʋɔsɛ́ ná há kéŋ dóé rɩ́ ákásɩ́á daasɛ. 6 La caanɔ́ nʋʋ, tulaaléwa, rɩ́wɔ́ hé náŋa nʋʋ mɛ́ a ɔ́ŋsɛ aá hé nɩɛ nyunni mí, káá nyɩkɛ náŋa má. 7 La óníkísi dɔ́wʋ́ɔ́ arɩ́ dɔ́wʋ́were náŋa, rɩ́wɔ́ pii fʋ́ gɛluŋo rɩ́ baŋcɩla tɔ́lɔ. 8 Ɓa sɩ́ bɩrmɛ táŋtɛjaa páŋ, rɩ́ŋ ko mɩŋ ráŋ a mɩ́ŋwɔ́ sɩ́sɩ́ɛ́nʋ́wa. 9 Ɓa sɩ́ ciki táŋtɛjaa ná anɛ ɛ́ tɩɩ ŋ há sɩ́ makɛ pɛ́ɩ́, a bɩ́rmʋ́ sɩɛrʋ cɩksɛ má wuu anɛ ɛ́ ŋ há sɩ́ makɛ pɛ́ɩ́.Nʋtʋmɛ dáka
10 Ɓa sɩ́ ɓásɛ dáka arɩ́ ákásɩ́á daasɛ; ʋ gbési sɩ́ a nágʋtókó sɩ́ɩ́ bɛllɛ rɩ́ fá, ʋ jɛ́l sɩ́ a nágʋtókó sɩ́ɩ́ rɩ́ fá, ʋ isé má sɩ́ a nágʋtókó sɩ́ɩ́ rɩ́ fá. 11 Ɩ sɩ́ pi salmɛ cʋɔrɩ́ a táárʋ́ sɩɛrʋ rɩ́rʋ́ har wuu, ká gi nʋɔ wuu a kíl. 12 Ɩ sɩ́ cʋɔrɛ salmɛ a a gúóréwa baná a hóú lʋ́lɔ́ŋsɛ ná baná, cɔɔ nɔ́ŋɔ bɛllɛ, cɔɔ nɔ́ŋɔ má bɛllɛ. 13 Ɩ sɩ́ bɩrmɛ ákásɩ́á dapʋɔllɛ bɛllɛ, a pi salmɛ tɔ́wɔ́ mɛ́. 14 Ɩ sɩ́ pi dapʋɔllɛ ná tʋ gúóréwa ná mɛ́ cɔɔ́ wuu, rɩ́wɔ́ káŋwɔ́ mɛ́ nɛ́ aá pi dáka ná. 15 Rɩ dapʋɔllɛ ná nɛ́ tʋ́ɛ́, ɓaá cɛ́ ráŋ nɛ́, ɓa wʋ́ɔ́ foksi. 16 Ɩ sɩ́ pi nʋtʋmɛ kɛnɔ ná ŋ há sɩ́ pɛ́ɩ́ a hé dáka ná sɩɛrʋ. 17 Ká rɩ́ɩ́ pi salmɛ cʋɔrɩ́ a bɩrmɛ dáka ná nyúú tɔ́lɔ. Tɔ́lɔ ná gbési sɩ́ a nágʋtókó sɩ́ɩ́ bɛllɛ rɩ́ fá, jɛ́l nágʋtókó sɩ́ɩ́ rɩ́ fá. 18 Ɩ sɩ́ má malɩ́kawa bɛllɛ arɩ́ salmɛ; ɩ sɩ́ lúkwó cɔ́ dáka cúl ná kíŋkersi bɛllɛ. 19 Rɩ́ malɩ́ka nɔ́ŋɔ cɛ́ cɔɔ nɔ́ŋɔ, ká rɩ́ nɔ́ŋɔ má cɛ́ cɔɔ nɔ́ŋɔ. Ɩ́ sɩ́ a rɩ́ malɩ́kawa ná bɛllɛ rɩ́ dáka nʋʋsɛ ná bɛllɛ cɔ́ náŋá mɛ́ a a óŋ balá. 20 Malɩ́kawa ná sɩ́ cɛ́ rɩ́wɔ́ sɩ́ɛ́ caasɛ náŋá aá bel dáka cúl ná, ká rɩ́wɔ́ kiŋkeru jɛrɛ zɛ́ nyúú rí a cú dáka cúl ná mɛ́. 21 Ɩ sɩ́ pi nʋtʋmɛ kɛnɔ ná ŋ háá á rɩ́ŋ pɛ́ɩ́ a hé dáka ná sɩɛrʋ, ká ka cúl ná cú. 22 Dáka cúl ná daha nɛ́ rɩ́ŋ ko cémí malɩ́kawa ná bɛllɛ há cíksé pɛ́kɛ. Ráŋ nɛ́ rɩ́ŋ makɛ wɩ́ɛ́ wuu pɛ́ɩ́, wɩ́ɛ́ ná Ɩzɩrayɛl nɩɛ há mɔhɛ̃́ rɩ́wɔ́ a.
Dɩpɛ́ŋwa táábɩl
23 Ɩ sɩ́ bɩrmɛ ákásɩ́á daasɛ táábɩl, rʋ́ʋ́ gbési a nágʋtókó sɩ́ɩ́ bɛllɛ, ʋ jɛ́l nágʋtókó sɩ́ɩ́, ʋ isé nágʋtókó sɩ́ɩ́ rɩ́ fá. 24 Ɩ sɩ́ pi salmɛ cʋɔrɩ́ a tɔ́ʋ́ daha wuu, ká gi nʋɔ wuu a kíl. 25 Ɩ sɩ́ a mʋ́l giró rʋ́ʋ́ jɛ́l peri sáŋtɩmɛ́tɩr córí rɩ́ táábɩl ná sákʋ́ daha. Pi salmɛ gi giró ná nʋɔ wuu. 26 Ɩ sɩ́ cʋɔrɛ salmɛ a a gúóréwa baná, a píwó baná ná hé lʋ́lɔ́ŋsɛ ná baná, a cɛ́rɛ naasɛ ná baná. 27 Ɩ sɩ́ hé gúóréwa ná rɩ́wɔ́ tuwi peri giró ná, rɩ́wɔ́ tʋ daasɛ ráŋ, táábɩl ná pii wɩ́ɛ́. 28 Ɩ sɩ́ ja ákásɩ́á dapʋɔllɛ, a pi salmɛ tɔ́wɔ́ mɛ́, rɩ́wɔ́ káŋwɔ́ mɛ́ nɛ́ aá pi táábɩl ná. 29 Ɩ sɩ́ cʋɔrɛ salmɛ a bɩrmɛ gbaŋsɛ, gbaŋwiisi, nyíŋgbaŋsɛ arɩ́ loŋwiisi ná ɓa há sɩ́ híhé dɩvɛ́ŋ pállɛ ráŋ a kaá tʋŋ. 30 Ɛ́ táábɩl daha nɛ́ rɩ́ɩ́ sakɛ dɩpɛ́ŋwa a páŋ tɛ́ŋ wuu mí.
cáŋdaa
31 Ɩ sɩ́ pi salmɛ cʋɔrɩ́ a luki cáŋdaa rɩ́ keŋe rʋ́ʋ́ a oŋpírmí; ʋ naa, ʋ daa, ʋ keŋe, ʋ lukme rɩ́rʋ́ onni ná há nɛhɩ̃́ fɩɩla, ɓa wuu sɩ́ a oŋpírmí. 32 Keŋe balgo sɩ́ hóú lʋ́lɔ́ŋsɛ, botoro cɔɔ nɔ́ŋɔ, botoro cɔɔ nɔ́ŋɔ má. 33 Keŋe ná balgo, oro wuu mí, ɩ sɩ́ hé fɩl kóksi botoro anɛ ámáŋdíé nɔnɔ, arɩ́ lukme rɩ́ fɩɩla ná há cɛ́rɛ́. 34 cáŋdaa ná mɛ́, ɩ sɩ́ hé fɩl kóksi baná anɛ ámáŋdíé nɔnɔ, rɩ́wɔ́ lukme rɩ́wɔ́ fɩɩla. 35 Keŋe ná botoro há lɛ́ cáŋdaa ná mɛ́ cɔɔ́ wuu, oro wuu mʋ́l, ɩ sɩ́ hé lukme. 36 Lukme ná rɩ́ keŋe ná wuu sɩ́ a óŋpírmí ɩ há sɩ́ pi salmɛ cʋɔrɩ́ a luki. 37 Ɩ sɩ́ bɩrmɛ cáŋsɛ ná balpɛ, a sakɛ cáŋdaa keŋe ná mɛ́ rɩ́wɔ́ caasɛ sɩ́ɛ́, a makɛ rɩ́ pʋmmɔ caanɛ sɩ́ɛ́ rɩ́ nɛ́. 38 Ʋ cɩkwɩɛla, cɛwɩwɩɛla, tapʋmmɔ dɩtuwí, ɓa má wuu, salmɛ cʋɔrɩ́ nɛ́ rɩ́ɩ́ pii bɩrmɛ. 39 Salmɛ cʋɔrɩ́ kííló mɛrɛ́ rɩ́ fí ní rɩ́wɔ́ pii bɩrmɛ cáŋdaa ná rɩ́rʋ́ cɩkwɩɛla wuu.
40 Ɩ é Moyizi, bel rɩ́wɔ́ a onni ná wuu anɛ ɛ́ ŋ há máŋsɛ́ pɛ́ɩ́, paalɔ nyúú.>>