LƖƖ 24

Wɩɩsɛ bíl nʋtʋmɛ ʋ rɩ́ Ɩzɩrayɛl pɛ́kɛ

1 Wɩɩsɛ baa bʋl Moyizi rɩ́ bʋlɛ́: <<Zɩ́nɩ́ŋ rɩ́ paalɔ nyúú, ɩ rɩ́ Aarɔŋ rɩ́ Nadabɛ rɩ́ Abihu arɩ́ Ɩzɩrayɛl nɩhɩɛ̃́sɛ mɛɛ́sɩbotoro rɩ́ fí; rɩɩ́wa zɩ́nɔ́, ɩ́ tɩ́ɛ́nɛ cɛ́ ká ɓírmi a kánɩ́wa sɩ́ɛ́ cú tíé. 2 Ɩ Moyizi dʋŋɔ sɩ́ tuu péríŋ é Nyuutɩna Wɩɩsɛ; náŋa ná é wɩ́ŋ peri, ɩ rɩ́ jamáŋ má waá zɛ́.>> 3 Moyizi ko cesi Nyuutɩna Wɩɩsɛ wɩ́bʋlɛ́ ná rɩ́rʋ́ wɩ́makɛ́ ná wuu pá jamáŋ ná. Jamáŋ ná wuu tʋŋ nʋɔ balá mɛ́ a bʋlɛ́: <<Á sɩ́ a wɩ́ɛ́ ná wuu Nyuutɩna Wɩɩsɛ há mákɛ́.>> 4 Moyizi pʋ́ŋsɛ Nyuutɩna Wɩɩsɛ wɩ́bʋlɛ́ ná wuu. Tɔ́ɔ́ pʋl ʋ cɔŋ fól a má vʋk'ɔ́ɔ́sɩ́koro paalɔ ná tɩŋa, a ja dáwʋ́ɔ́ fí rí bɛllɛ a cɔ́ŋsɛ, Ɩzɩrayɛl jɩmʋ́l wuu dɔ́wɩ́. 5 Ká hé Ɩzɩrayɛl nɩɛ heŋbiwafɛlɛ ɓa ɓʋ́ʋ́sɛ pʋsɛ a físi pá Nyuutɩna Wɩɩsɛ, a ɓʋ́ʋ́sɛ nɔɓallɛ a ɔsɛ tɛŋfɩ́ɛ́l vʋk a pá Nyuutɩna Wɩɩsɛ. 6 Moyizi cakɛ cɛ́l ná fá a hé viini mí, ká pi fá a gaarɛ koro ná. 7 Ʋ pi nʋtʋmɛ kɛnɔ ná a karmɛ pá jamáŋ ná; jamáŋ sɛ́: <<Á sɩ́ a wɩ́ɛ́ ná wuu Nyuutɩna Wɩɩsɛ há sɛ́ rá a, á sɩ́ tɩ́ŋʋ́ sɛ́.>> 8 Moyizi pi cɛ́l ná há mɩŋ viini mí, a mɩ́sɛ jamáŋ ná ká bʋlɛ́: <<Nʋtʋmɛ ná Nyuutɩna Wɩɩsɛ há bílé ɩ́ rɩ́rʋ́ pɛ́kɛ a tɩŋ wɩ́ɛ́ nyáŋ wuu mí, ʋ cɛ́l nɛ́ ɛ́.>>

9 Ɛ́ har mɛ́, Moyizi rɩ́ Aarɔŋ rɩ́ Nadabɛ rɩ́ Abihu arɩ́ Ɩzɩrayɛl nɩhɩɛ̃́sɛ ná mɛɛ́sɩbotoro rɩ́ fí zɛ́ paalɔ ná. 10 Ɓa ná Ɩzɩrayɛl Wɩɩsɛ. Ʋ naasɛ mʋ́l dé tʋ́tʋl nɛ́ a nɛ sáfííri, ká de nɛ bʋ́lá páár, anɛ bána há nɛhɩ̃́ ɛ́. 11 Wɩɩsɛ wɩ Ɩzɩrayɛl nɩhɩɛ̃́sɛ ná wɩ́ɩ́ wuu ɛ́ɛ́. Ɓa bɛ́llʋ́ ká dí a nyɔ.

12 Nyuutɩna Wɩɩsɛ bʋl Moyizi rɩ́ bʋlɛ́: <<Zɩ́nɩ́ŋ rɩ́ paalɔ ná nyúú rí, a cɛ́ ráŋ. Ŋ sɩ́ pɛ́ɩ́ dɔ́wɩ́pɛ́rsɛ tábɩlwa; ɓa daha nɛ́ ŋ pʋ́ŋsɛ kíŋse rɩ́ wádawa ná, rɩ́ɩ́ pii karmɛ Ɩzɩrayɛl nɩɛ.>> 13 Moyizi rɩ́rʋ́ tʋkɛ́ Zozie isi, Moyizi zɛ́ Wɩɩsɛ paalɔ ná nyúú. 14 Ʋ fa bʋ́l nɩhɩɛ̃́sɛ ná rɩ́ bʋ́lɛ́: <<Ɩ́ dɛ́llɩ́rá rɛɛ́wa a kaá járá bɩrkoe. Ɩ́ ná, Aarɔŋ rɩ́ Huuri mɩ́nɩ́wa sɩɛrʋ; rɩ nɛ́ŋ kéŋ wɩ́ɩ́ aá ja ɔsɛ́, rʋ́ʋ́ nówó.>> 15 Moyizi zɛ́ paalɔ ná nyúú, ká duóbána de tɔ́ paalɔ ná mɛ́. 16 Nyuutɩna Wɩɩsɛ píŋ de sú Sinayi paalɔ ná wuu; duóbána ná tɔ́ʋ́ mɛ́ ɛ́ tápʋlɛ balgo. Tápʋlɛ balpɛ kal, Nyuutɩna Wɩɩsɛ cɛ́ duóbána ná sɩɛrʋ ká yɩ́rɛ Moyizi. 17 Nyuutɩna Wɩɩsɛ píŋ ná fa dé nɛ níŋváá nɛ́ paalɔ ná nyúú ɓóŋɓóŋ, Ɩzɩrayɛl nɩɛ sɩ́ɛ́ mɛ́. 18 Moyizi zʋ duóbána ná sɩɛrʋ a zɛ́ paalɔ ná, a á wɔhɔ rɩ́ tɩ́taŋ wuu, tápʋlpírme mɛɛ́sɛllɛ, paalɔ ná nyúú.