Sarɩ́ya wérí díí wɩ́ɛ́
23
1 Sɩ́ nyɩɛrʋ kʋɔllɛ káá céŋ la dɩhɩ̃́ wuu. Sɩ́ nyɩɛrʋ nyɛ́ɛ́ pɛ́ wɩ́bɔŋ'aarɔ mɛ́ 2 Sɩ́ nɩkana mɛ́ tɩ́ŋ a bɔ́ŋbɔ́ŋ; sarɩ́ya má díí mí, rɩ nɩkana já rɩ́wɔ́ zɔkɛ sarɩ́ya ná, sɩ́wɔ́ káŋ ná bélú káá pɛ́wɔ́ mɛ́. 3 Sɩ́ summo mí pɛ́ sarɩ́ya mɛ́, rʋʋ ɓɩɛ nɛ́ wɩ weri.4 Rɩɩ cémí dɩŋdɔmɔ nɔɔ ɛ́rá má ʋ kokúme rʋʋ yʋ́ksɔ́, ɩ kiri ko pɔ́ʋ́. 5 Rɩɩ néí dɩŋdɔmɔ kokúme rɩ cɩksɛ nyáŋɔ́ ɓarɛ ʋ pɛ́, sɩ́ dáárʋ́ káá tá, mʋ́ pɔ́ʋ́ mɛ́ rɩ́ɩ́wa bɩrmɛ cɩksɛ ná ká cúóli kokúme ná.
6 Sɩ́ summo sarɩ́ya káá zɔkɛ, rʋʋ ɓɩɛ nɛ́ weré. 7 Sɩ́ nyɛwɩ́ɛ́ rɩ́wɔ́ dúó wuu zésú. Sɩ́ nɛrɔ ná há wɩ wɩ́ɩ́ zɔ́kɛ́ rɩ́ nɩtaŋá ɓʋ́ʋ́sʋ́; bee wɩ́ɛ́ rɩɩ tʋ́ŋ ɛ́, ŋ wɩ́ɩ́ taŋá pá. 8 Sɩ́ zílyɔwɛ́ lá; bee wɩ́ɛ́ zilé nyʋmmɛ nɩɛ ná sɩ́ɛ́ háá ná ráŋ, aá kɛ́rɛ nɩɛ ná há wɩ gɩragɩra ja mɛ́, rɩ́wɔ́ sɩ́ taŋá bʋ́lʋ́.
9 Sɩ́ nɩhʋɔra wálmʋ́. Ɩ́ ɛ̃ nɩhʋɔrɔ háá ná wɩ́ɩ́ ná rɛ́, bee wɩ́ɛ́ ɩ́ má fa ká nɩhʋ́ɔ́rá rɛ́ Ezipiti mí.
Fɩɛlɛ́ bɩna rɩ́ fɩɛlɛ́ tápʋl wɩ́ɛ́
10 Párɩ́ baka a kʋsɛ bɩŋsɛ balgo a tʋkɛ náŋá mɛ́. 11 Amá bɩŋsɛ balpɛ nyúú mí, ɩ tá tíé ná rʋ́ʋ́ fɩɛlɛ. Ɩ tɔ́ɔ́ nɩyaara nɩ́ sɩ́ zʋʋ kʋsɛ onni ná há mɩŋ ráŋ a dí, ká balla má di káánɛ. Ɩ víínyi baka rɩ́rɩ́ ólívi tuuni baka má, ɩɩ́ a ɛ́ nɛ́.
12 Ɩ sɩ́ tʋŋ tápʋlɛ balgo. Amá tápʋlɛ balpɛ kal, ɩ sɩ́ fɩɛlɛ, ɩ wɩ tʋ́ŋ wuú tʋŋ, a makɛ rɩ́ɩ́ nɔɔ rɩ́rɩ́ kokúme ná fɩɛla, rɩ́ɩ́ tʋtʋnna rɩ́ nɩhʋɔrɔ ná poo.
13 Ɩ́ bel wɩ́ɛ́ ná wuu mí ŋ há máŋsɛ́ pɛ́ɩ́wa. Ɩ́ pɔ́ rɩ́ɩ́wa háá yɩ́rɛ hé wɩŋsa náŋa mɛ́; ɩ́ sɩ́ ló rɩ́wɔ́ yɩra má tɩɩ lɩ́wa nʋʋsɛ mɛ́.
14 Bɩná wuu, ɩ sɩ́ dí cana ŋ yɩr mɛ́ naasɩ́ botoro. 15 Ɩ sɩ́ dí sɩbʋ́r toó dɩpɛ́ŋ cana; Abibi cana sɩɛrʋ, tápʋlɛ balpɛ pɛ́kɛ, ɩ sɩ́ dí sɩbʋ́r toó dɩpɛ́ŋ anɛ ɛ́ ŋ há mákɛ́ pɛ́ɩ́. Ɛ́ cana mɛ́ nɛ́, ɩ lɛ Ezipiti mí; amá ɩ wɩ náwuole káá zʋ́ŋ sɩ́ɛ́.
16 Díí oŋparɛ́ oŋbʋʋrɛwa kʋsɛ́ cana. Dí ɓɩɛ kʋsɛ́ cana bɩna tenné mí, ɩ há kúé ténní baksɛ tʋtʋmɛ́ wuu. 17 Bɩná wuu, naasɩ́ botoro, báála wuu sɩ́ zʋ Nyuutɩna Wɩɩsɛ sɩ́ɛ́.
18 Sɩ́ sɩbʋ́r dɩpɛ́ŋ pálɔ píí hé vʋk'ɔsɔ́ pʋsɛ cɛ́l mɛ́ rɩ́ páŋ. Sɩ́ gbaanɛ vʋk'ɔsɔ́ pʋsɛ nʋʋ píí bil rɩ́ tɔ́ɔ́ pʋl. 19 Ɩ sɩ́ kánɩ́ tíé oŋparɛ́ oŋbʋʋrɛwa kaa ko Nyuutɩna Wɩɩsɛ, ɩ Wɩɩsɛ jaa. Sɩ́ bʋwie píí hóú maá ɩ́l sɩɛrʋ rɩ́ cɔ́.
Kanaŋ zʋɩ nʋtállɛ rɩ́ cáánɛwa
20 Ŋ sɩ́ tʋŋ málka ɩ sɩ́ɛ́, rʋ́ʋ́ pɔ́ɩ́ mɛ́ ŋmɛ́nɔ mɛ́ a kánɩ́ peri tɔ́ɔ́ ná ŋ há bɩ́rmɛ́ bílí mí. 21 Sɩɛ́ kánɩ́ tɩɩ a tɩ́ŋʋ́ sɛ́; sɩ́ sɩ́beŋsí á, bee wɩ́ɛ́ rɩɩ á bɔ́ŋbɔ́ŋ, ʋ waá píí cɛ́ɩ́wa, ŋ yɩr nɛ́ ʋ kaá tʋŋ. 22 Amá rɩɩ nɛ́ tɩ́ŋʋ́ nʋɔ, a a wɩ́ɛ́ ná wuu ŋ há sɩ́ makɛ pɛ́ɩ́, ŋ sɩ́ ɛ́ɩ́ dɩŋdɔma dɩŋdɔŋ, nɩɛ ná má há cɩ́nɩ́ mɛ́ ŋ sɩ́ cɩ́ŋwɔ́ mɛ́. 23 Ŋ málka sɩ́ lɛ́ɩ́ sɩ́ɛ́ kánɩ́ zʋ Amɔrɩɛŋwa rɩ́ Hititiwa rɩ́ Ferezɩɛŋwa rɩ́ Kananɩɛŋwa rɩ́ Hɛvɩɛŋwa arɩ́ Yebuzɩɛŋwa sɩɛrʋ, rɩ́ŋ ɓʋ́ʋ́sɛ ɛ́ nɩɛ wuu. 24 Sɩ́wɔ́ wɩŋsa sɩ́ɛ́ ɓírmú, sɩ́wɔ́ ɓáárʋ́, a sɩ́wɔ́ zílú má; amá gínníwó oŋ'máálɛ, a yɛ́rkwɔ́ dɔ́wʋ́cɔ́ŋsɛ. 25 Ɩ́ sɩ́ cʋɔlɛ Nyuutɩna Wɩɩsɛ, ɩ́ Wɩɩsɛ; ʋ sɩ́ hé bárka ɩ́ bɩdííli rɩ́rɩ́wa nyɔɔlɔ́ nyúú, ká kɛ́rɩ́wa mɛ́ rɩ́ pʋɔlɩ́ sɩ́ɩ́wa zʋ́. 26 Ɩ tɔ́ɔ́ mɛ́, háálɔ waá zɔ́kɩ́ tá, hápɩrɛ waá mɩŋ. Ŋ sɩ́ a rɩ́ɩ́ dí tɔ́ɔ́ vɔkɛ.
27 Ŋ sɩ́ a rɩ nɩɛ nɩ́ɩ́ wɩ́ɛ́ rɩɩ́ kówó dɩhɩ̃́, rɩ́ héwíŋ zʋ́wɔ́ kɩ́ŋkáŋ, rɩ́wɔ́ fá; ŋ sɩ́ a rɩ́ɩ́ dɩŋdɔma fɛ́ɩ́ sɩ́ɛ́ mɛ́. 28 Ŋ sɩ́ hé dʋmacelwa má ɩ sɩ́ɛ́, rɩ́wɔ́ kiri Hɛvɩɛŋwa rɩ́ Kananɩɛŋwa arɩ́ Hititiwa. 29 Ŋ taŋa wʋ́ɔ́ kiri bɩná balá sɩɛrʋ rɩ́wɔ́ kɛ́kɩ́ mɛ́, rɩ́ tɔ́ɔ́ háá a wúólí, rɩ́ balla pul a cɩ́nɩ́ mɛ́. 30 Ŋ sɩ́ kírwó mʋɔ́mʋɔ́wa rɩ́wɔ́ kɛ́kɩ́ mɛ́, a kaá ja tɛ́ŋ ná mɛ́ ɩ há sɩ́ pul a ko la tɔ́ɔ́ ná wuu a tɩ́llʋ́. 31 Ɩ dɩtɩ́llɛ súsúbʋɔ sɩ́ pɔ́ Zɔŋkɛ mʋʋ mɛ́, ká kaa mʋ́ lɛ Filisiti nɩɛ mʋʋ, a kaa pɔ́ Sɩnayɩ gɩr bétéke mí, ká mʋ́ yakɛ Ɩfratɛ mɛ́. Ŋ sɩ́ a rɩ́ɩ́ wóllí ɛ́ dɩhɩ̃́ nɩɛ, a kírwó. 32 Sɩ́ nʋtʋmɛ bílú ɩ rɩ́wɔ́ pɛ́kɛ, a sɩ́ nʋtʋmɛ bílú ɩ rɩ́wɔ́ wɩŋsa má pɛ́kɛ. 33 Sɩ́ ló rɩ́wɔ́ kéní tɔ́ɔ́ mɛ́, rɩ́wɔ́ háá ko yíkí rɩ́ɩ́ aa zɔ́kɩ́ŋ mɛ́; bee wɩ́ɛ́ ɩ sɩ́ ɓáárɩ́wɔ́ wɩŋsa, rɩɩ sɩɛ́ tʋŋ ɛ́, ɩ zʋ́ bárá.>>