Maasa rɩ́ Meriba nyii
17
1 Nyuutɩna Wɩɩsɛ sɛ́ mɛ́, Ɩzɩrayɛl nɩɛ púl ná wuu ísí Sɩŋ gɩrbétéke ná mɛ́ a vaa ciki dɩhɛ̃́ aá col. Ɓa mʋ́ ciki Refidiŋ mí; amá nyii fa toó rɩ́ jamáŋ ná nyɔ. 2 Ɛ́ nɛ́ ɓa lɔkɛ nɛsɛ Moyizi rɩ́ a bʋlɛ́: <<Párá nyii ráá nyɔ.>> Moyizi bɔ́sɩ́wɔ́ bʋlɛ́: <<Beé rí tɛ ɩ́ lʋ́lɔkɛ nɛsɛ ŋ rɩ́? Beé rí tɛ ɩ́ dídíŋ Nyuutɩna Wɩɩsɛ?>> 3 Nyinyʋɔ́sɛ wɩɩla há wɛ́ nɩɛ ná mɛ́, ɓa kéŋ ŋmaame cakɛ Moyizi cɛ́ a bʋlɛ́: <<Beé rí tɛ ɩ a á lɛ Ezipiti mí? Ɩɩ́ já ráá sʋsɛ nyinyʋɔ́sɛ nɛ́, á rɩ́rá bɛlɛ rɩ́rá pʋsɛ?>> 4 Moyizi ŋmɔwɛ búŋse hé Wɩɩsɛ mɛ́ a bʋlɛ́: <<Ŋ á rɩ́ŋ a beé rí pá jamáŋ né? Ʋ káánɛ mʋɔ́ ká rɩ́wɔ́ yósíŋ rɩ́ dɔ́wʋ́ɔ́.>> 5 Nyuutɩna Wɩɩsɛ bʋl Moyizi rɩ́ bʋlɛ́: <<La jamáŋ ná sɩ́ɛ́, a kɛsɛ Ɩzɩrayɛl nɩhɩɛ̃́sɛ tɩ́ŋɩ́ tɩɩ mɛ́, a píí deŋtuke ná ɩ há píé ŋmɔwɛ Nili, a kánɩ́ nɛ́sɛ mɛ́, a va. 6 Néŋ ní, ŋ sɩ́ cɩ́nɩ́ sɩ́ɛ́ Ɔrɛbɛ paalɔ bʋ́ɩ́ daha. Ɩ sɩ́ ŋmɔwɛ ɛ́ bʋ́ɩ́ rɩ́ nyii lʋ́ʋ́ mɛ́ lɛ, rɩ́ jamáŋ ná nyɔ.>> Moyizi a ɛ́ Ɩzɩrayɛl nɩhɩɛ̃́sɛ ná sɩ́ɛ́. 7 Ʋ pá ɛ́ dɩhɩ̃́ yɩr Maasa rɩ́ Meriba, bee wɩ́ɛ́ Ɩzɩrayɛl nɩɛ fa lɔ́kɛ́ nɛsɛ, a cɛ́ róŋ mí a díŋ Nyuutɩna Wɩɩsɛ bʋlɛ́: <<Nyuutɩna Wɩɩsɛ mɩ́ŋrá sɩ́sɩ́ɛ́nʋ́wa rɩ́ yáá, ʋ toó?>>Amalɛkɛ nɩɛ yó Ɩzɩrayɛl nɩɛ
8 Amalɛkɛ nɩɛ kúó rɩ́wɔ́ rɩ́ Ɩzɩrayɛl nɩɛ yo náŋá Refidiŋ mí. 9 Ɛ́ nɛ́ Moyizi bʋl Zozie mí bʋlɛ́: <<Tʋɔsɛ báála párá, a káŋwɔ́ lɛ a yo Amalɛkɛ nɩɛ. Cíé, ŋ sɩ́ pi Wɩɩsɛ deŋtuke kánɩ́ŋ nɛ́sɛ mɛ́ a zɛ́ cɛ́ paalɔ nyúú ɓóŋɓóŋ.>> 10 Zozie tʋ́ŋ ɛ́ Moyizi há mákɛ́ pɔ́ʋ́, a lɛ rʋ́ʋ́ yo Amalɛkɛ nɩɛ. Moyizi rɩ́ Aarɔŋ arɩ́ Uuri má zɛ́ cɛ́ paalɔ nyúú ɓóŋɓóŋ. 11 Rɩ Moyizi ní kúé ka nɛ́sɛ ɓɔ́, Ɩzɩrayɛl nɛ́ duoké, ká rʋʋ kenú nɛ́sɛ tuwi, Amalɛkɛ nɛ́ duoké. 12 Moyizi vaŋsɛ há kúé yʋɔrɛ, Aarɔŋ rɩ́ Uuri pí dɔ́wɩ́ ko bil Moyizi laka ʋ ké. Aarɔŋ rɩ́ Uuri sɩɛ́ cɛ́ lɛ́lʋ́, nɔ́ŋɔ cɔɔ nɔ́ŋɔ, nɔ́ŋɔ má cɔɔ nɔ́ŋɔ, a cákʋ́ vaŋsɛ ná cɛ́ a kaá ja wɩɩsɛ zʋɩ. 13 Zozie yoo dí Amalɛkɛ nɩɛ arɩ́rʋ́ tókowí.
14 Nyuutɩna Wɩɩsɛ bʋl Moyizi rɩ́ bʋlɛ́: <<Pʋ́ŋsɛ wɩ́ɛ́ nyáŋ kɛnɔ sɩɛrʋ, rɩ́wɔ́ sɩ́wɔ́ mɛ́ sʋ́llʋ́, ká bʋl Zozie mí, rɩ́ŋ sɩ́ a rɩ́ Amalɛkɛ yɩr yʋ́ksɛ tíé nyúú, rɩ́ nɛ́ŋ wuu sʋ́ʋ́ wɩ́ɛ́ líísú.>>