Maanɛ rɩ́ zɩŋpɩrwɩ́wa
16
1 Ɩzɩrayɛl nɩɛ púl ná wuu ísí Elimi mí, a mʋ́ peri Siŋ gɩrbétéke há mɩŋ Elimi rɩ́ Sinayi pɛ́kɛ; ɓa há lɛ́ Ezipiti tɔ́ɔ́ mɛ́ caŋsɛ bɛllɛ nyúú mí, tápʋlɛ fí rí bɔmmʋ́ɔ́ kal nɛ́. 2 Gɩr ná sɩɛrʋ, Ɩzɩrayɛl nɩɛ púl ná wuu kéŋ ŋmaame cakɛ Moyizi rɩ́ Aarɔŋ cɛ́. 3 Ɩzɩrayɛl nɩɛ bʋ́lwɔ́ rɩ́ bʋlɛ́: <<Rɩ Nyuutɩna Wɩɩsɛ fa ɓʋ́ʋ́sɩ́rá Ezipiti mí rí, tɛ́ŋ ná mɛ́ á há kíl namɩŋsa viini, a dí dɩpɛ́ŋwa aá vɔksɛ, ʋ nɛ́ fa weré. Ɩ́ sɩɛ́ há kéŋrá zʋ gɩr né sɩɛrʋ rɩ́ɩ́wa a rɩ́ nɩɛ nyáŋ wuu sʋwɛ losu!>>4 Ɛ́ nɛ́ Nyuutɩna Wɩɩsɛ bʋl Moyizi rɩ́ bʋlɛ́: <<Ŋ sɩ́ a rɩ́ dɩpɛ́ŋ lɛ bána nyúú ko anɛ duóŋ a pɛ́ɩ́wa. Kál wuu, jamáŋ sɩ́ lɛ a paa mɔ́ʋ́ kál díí mʋɔsɔ. Ŋ sɩ́ mɩ́lɩ́wa ɛ́ a ná, ɩ́ɩ́ tɩ́ŋɩ́ŋ wɩ́makɛ́ ná rɩ́ yáá, ɩ́ waá tɩŋ. 5 Tápʋlɛ balgo kal, rɩ ɓa nɛ́ pɛ́ɛ́ kaa zʋʋ a, ɓa sɩ́ ná rɩ ɓa púló kɩ́llɛ kal wuu pɛɛ ná naasɩ́ bʋllɛ.>>
6 Moyizi rɩ́ Aarɔŋ bʋl pá Ɩzɩrayɛl nɩɛ wuu a bʋlɛ́: <<Gbaŋ né, ɩ́ sɩ́ zɩŋ rɩ́ Nyuutɩna Wɩɩsɛ nɛ́ ɛ́ɛ́ ɩ́ lɛ Ezipiti mí. 7 Cíé cɩ́cʋɔ ɩ́ sɩ́ ná Nyuutɩna Wɩɩsɛ píŋ, bee wɩ́ɛ́ ʋ nɩ́ɩ́wa ŋmaame ná ɩ́ há kené cákʋ́ cɛ́. Á má ká beéwa rɛ́, ɩ́ sɩɛ́ cákrá cɛ́ rɩ́ ŋmaame?>> 8 Moyizi faá já rʋ́ʋ́ bʋlɛ́: <<Gbaŋ né, Nyuutɩna Wɩɩsɛ sɩ́ pɛ́ɩ́wa namɩɛ rɩ́ɩ́wa dí, ká rɩ́ cɩ́cʋɔ rʋ́ʋ́ pɛ́ɩ́wa dɩpɛ́ŋ rɩ́ɩ́wa dí vɔksɛ, bee wɩ́ɛ́ Nyuutɩna Wɩɩsɛ nɩ́ɩ́wa ŋmaame ná ɩ́ há kené cákʋ́ cɛ́. Á má ká beéwa rɛ́? Á rá ɩ́ sɩɛ́ cakɛ cɛ́ rɩ́ ŋmaame, Nyuutɩna Wɩɩsɛ nɛ́ ɩ́ cakɛ cɛ́ ɛ́.>> 9 Moyizi bʋl Aarɔŋ rɩ́ bʋlɛ́: <<Bʋl pá Ɩzɩrayɛl nɩɛ púl ná wuu rɩ́wɔ́ ko cɛ́ Nyuutɩna Wɩɩsɛ sɩ́ɛ́, bee wɩ́ɛ́ ʋ nɩ́wɔ́ ŋmaame ná ɓa há kené cákʋ́ cɛ́.>> 10 Aarɔŋ ha há mɩŋ jamáŋ ná wuu rɩ́ bʋlɛ́ mɛ́, ɓa bɩ́rɔ́ bel gɩr rɩ́, naasɩ́ balá rɩ Nyuutɩna Wɩɩsɛ píŋ ní kúé nyɩɩsɛ duóbána ná sɩɛrʋ. 11 Nyuutɩna Wɩɩsɛ bʋl Moyizi rɩ́ bʋlɛ́: 12 << Ŋ nɛ́ Ɩzɩrayɛl ŋmaame ná rɛ́. Bʋl pɔ́wɔ́ bʋlɩ́ŋ sɛ́: <Gbaŋ né ɩ́ sɩ́ dí namɩɛ, ká rɩ́ cíé cɩ́cʋɔ rɩ́ɩ́wa ná dɩpɛ́ŋ a dí vɔksɛ; a makɛ rɩ́ɩ́wa zɩŋ rɩ́ŋ nɛ́ ká Nyuutɩna Wɩɩsɛ, ɩ́ Wɩɩsɛ.>>>
13 Gbaanɛ, zɩŋpɩrwɩ́wa de ko tɔ́wɔ́ dɩkéni ná wuu; cɩ́cʋɔ, ɓa kílo ná wuu de tɔ́ nyɛlɔ. 14 Nyɛlɔ ná há de ko tá, ɓa bél gɩr tíé rɩ onni ní anɛ oŋbíé, anɛ nyihiré a tɔ́ tíé mí. 15 Ɩzɩrayɛl nɩɛ bel bel, ɓa wʋ́ɔ́ oŋduusi ɛ̃, káá bɔsɛ náŋá bʋlɛ́: <<Beéwa rɩ́ nyɛ?>> Moyizi bʋl pɔ́wɔ́ bʋlɛ́: <<Dɩpɛ́ŋ nɛ́ Nyuutɩna Wɩɩsɛ pɛ́ɩ́wa rʋ́ʋ́ ɛ́ɩ́wa ɓɩdííli. 16 Ɩ́ sɩɛ́ ná Nyuutɩna Wɩɩsɛ há mákɛ́ ɛ́: <Nɛrɔ wuu pa ɛ́ há mɔhʋ̃́ díí; jaa wuu nɩɛ nʋɔ há ká ɛ́, ɩ́ pa nɛ́ŋ wuu líítir banáwa a cesi nɩɛ nʋɔ.>> 17 Ɩzɩrayɛl nɩɛ tʋ́ŋ ɛ́; náŋa paa dɔwɛ, náŋa pa ɓa wɩ césé. 18 Ɛ́ nɛ́ ɓa pi líítir baná omo máŋsɛ; nɛrɔ ná há pɛ́ɛ́ dɔwɛ, ʋ báá wɩ dɔwɛ kené, ká nɛrɔ ná má ɓɩɛ há wɩ césé, ɓa cesi. Nɛrɔ wuu nóó kál díí mʋɔsɔ.
Máánɛ kaa tʋmɛ́
19 Moyizi bʋl pɔ́wɔ́ bʋlɛ́: <<Nɛrɔ wuu pɔ́ rʋ́ʋ́ háá lo rɩ́wɔ́ cɛ́ cʋɔsɛ.>> 20 Amá nɩɛ náŋa wɩ Moyizi nʋɔ tɩ́ŋɛ́, ká bil ɓa cɛ́ cʋɔsɛ, deŋdule zʋ ɓa zɔkɛ. Ɛ́ nɛ́ Moyizi cɔ́ɛ́ wɩ́wɔ́ nyúú. 21 A mɔ ɛ́ mɛ́, kál wuu cɩ́cʋɔ, nɛrɔ wuú paa mɔ́ʋ́ díí ní. Rɩ wɩɩsɛ kúó lʋŋ, káánɛ ná mɩ́ɛ́rɛ tíé.
22 Tápʋlɛ balgo kal, ɓaá pa kere bɛllɛ nɛ́, nɛrɔ wuu ɓɩɛ peri líítir córí. Púl ná nɩhɩɛ̃́sɛ wuu ko bʋl ɛ́ pá Moyizi. 23 Ɛ́ nɛ́ Moyizi bʋl pɔ́wɔ́ bʋlɛ́: <<Ɛ́ nɛ́ Nyuutɩna Wɩɩsɛ makɛ. Cíé ká Saba nɛ́, fɩɛlɛ́ tápʋl. Nyuutɩna Wɩɩsɛ tápʋl nɛ́. Ɓa ná há ká ɓɩcɔ́ɔ́lɛ, ɩ́ cɔ́, ɓa ná há ká ɓɩwuuré, ɩ́ wuuri, ká pi káánɛ bil rɩ́ tɔ́ɔ́ pʋl.>> 24 Ɓa ɓɩɛ́na bil káánɛ ná tɔ́ɔ́ pʋl anɛ ɛ́ Moyizi há bʋ́lɛ́, ká deŋdule wɩ zʋ́ɛ́, ɓa wɩ zɔ́kɛ́ má. 25 Moyizi sɛ́: <<Ɩ́ zaa píwó dí; zaa ká Nyuutɩna Wɩɩsɛ tápʋl nɛ́, fɩɛlɛ́ tápʋl, ɩ́ wɩ óŋ wuu ná gɩr mɛ́. 26 Tápʋlɛ balgo pɛ́kɛ, ɩ́ pa máánɛ ná; amá balpɛ kal, fɩɛlɛ́ tápʋl nɛ́, óŋ wuu toó.>>
27 Tápʋlɛ balpɛ kal ná, jamáŋ ná nɩɛ náŋa lɩ́ɔ́ rɩ́wɔ́ pa máánɛ, amá ɓa wʋ́ɔ́ néé. 28 Ɛ́ nɛ́ Nyuutɩna Wɩɩsɛ bʋl Moyizi rɩ́ bʋlɛ́: <<Kal beé rí ɩ́ɩ́ a rɩ́wa saŋ tɩ́ŋɩ́ŋ wɩ́makɛ́ rɩ́rɩ́ŋ wádawa? 29 Ɩ́ nóó rɩŋ pɛ́ɩ́wa fɩɛlɛ́ tápʋl rɩ́ɩ́wa fɩɛlɛ; ɛ́ nɛ́ tɛ tápʋlɛ balgo kal ŋ pɩ́pɛ́ɩ́wa tápʋlɛ bɛllɛ ɓɩdííli. Tápʋlɛ balpɛ kal, nɛrɔ wuu kénú jaa mɛ́, nɛ́ŋ wuu sɩ́ dɩhɩ̃́ mʋ́.>> 30 Ɩzɩrayɛl jamáŋ ná ɓɩɛ́na fɩɛlɛ tápʋlɛ balpɛ kal ná.
31 Ɩzɩrayɛl nɩɛ pá ɛ́ ɓɩdííli yɩr máánɛ. Ɓa dé ká ɓɩpʋŋsɛ́ rɛ́, ká ɓa ŋmɔ́ŋ de nɛ ɓáfurótu ɓa há hé tʋʋ a, ká de nɛ tuwie oro bíé; ɓaá yɩ́rɛ ɛ́ tuu kɔ́rɩ́yáŋdɛ*.
32 Moyizi sɛ́: <<Ɩ́ ná Nyuutɩna Wɩɩsɛ há mákɛ́ ɛ́: <Rɩ́ɩ́wa a máánɛ líítir baná a tʋɔlɛ bílíwa duo nɩɛ mɛ́, a makɛ rɩ́wɔ́ ná dɩpɛ́ŋ ná duo ŋ fa há pɛ́ɩ́wa ɩ́ dí gɩrbétéke sɩɛrʋ, ŋ há lɩ́sɩ́wa Ezipiti mí.>>> 33 Ɛ́ nɛ́ Moyizi bʋl Aarɔŋ mɛ́ bʋlɛ́: <<Ja vitʋɔlɩ́, a máŋsɛ máánɛ líítir baná a hé, a tʋɔlɛ bil Nyuutɩna Wɩɩsɛ sɩ́ɛ́ ɩ́ duo nɩɛ yɩr mɛ́.>> 34 Anɛ ɛ́ Nyuutɩna Wɩɩsɛ há mákɛ́ pá Moyizi, Aarɔŋ tʋ́ɔ́lɩ́wɔ́ a bil nʋtʋmɛ dáka* sɩ́ɛ́.
35 Ɩzɩrayɛl nɩɛ dí máánɛ ná nɛ́ bɩŋsɛ mɛɛ́sɛllɛ, a kaá ja ɓa há mʋ́ɛ́ peri nɩɛ tɔ́mɩnɩ́ mɛ́; ɓa dí máánɛ ná nɛ́ wuu, a ko yakɛ Kanaŋ súsúbʋɔ mɛ́.
36 Máánɛ líítir baná ná ká ɔ́mɛ́ɛ́rɛ sɩ́ɩ́ nɛ́, a má a éfá sɩ́ɩ́ ɩ há kené ɓa fí, kér balá.