Moyizi rɩ́ Ɩzɩrayɛl nɩɛ yɩl
15
1 Ɛ́ nɛ́ Ɩzɩrayɛl nɩɛ rɩ́ Moyizi ɓá yɩl a dɛnnɛ Nyuutɩna Wɩɩsɛ. Yɩl ná sɛ́: Ŋŋ́ já rɩ́ŋ yɩɩ bɩ Nyuutɩna Wɩɩsɛ mɛ́, bee wɩ́ɛ́ ʋ mákʋ́ dóé kɩ́ŋkáŋ maahʋ̃́. Ʋ yíkí záka rɩ́ zákzɩ́nnɔ wuu hé mʋʋ sɩɛrʋ. 2 Nyuutɩna Wɩɩsɛ nɛ́ káŋ dóé, ʋ wɩ́ɛ́ nɛ́ ŋ yɩ́yɩ. Ʋ nɛ́ káŋ laatɛ́. Ʋ nɛ́ káŋ Wɩɩsɛ; ŋ sɩ́ bʋ́ʋ́ mɛ́. Ʋ nɛ́ káŋ áná Wɩɩsɛ, ŋ sɩ́ cúólú yɩr. 3 Nyuutɩna Wɩɩsɛ ká lalyór rí. Nyuutɩna Wɩɩsɛ nɛ́ kɔ́ʋ́ yɩr. 4 Ʋ yíkí Faarɔŋ lalyóórítórkowa rɩ́rʋ́ sóójiwa hé mʋʋ sɩɛrʋ. Zɔŋkɛwa mʋʋ nyii tɔ́ʋ́ sóójibɩbara mɛ́. 5 Ɓa túwí nyii mʋ́l anɛ dɔ́wʋ́ɔ́, nyii tɔ́wɔ́ mɛ́. 6 Óó Nyuutɩna Wɩɩsɛ, ɩ néduu dóé wéró. Óó Nyuutɩna Wɩɩsɛ, ɩ néduu ní tɩ́ksɛ dɩŋdɔmɔ. 7 Ɩ zéŋ nɔ́ŋɔ toó! Ɩ yíkí nɩɛ ná há cɩ́nɩ́ mɛ́ aá yo. Ɩ cɔ́ɛ́ níí díwó anɛ nyɔ́míŋ. 8 Ɩ mɩgbele poo ní ɛ́ɛ́ nyikana isi gú náŋá daha, a a nyigʋ́llɛ cɛ́ anɛ zeŋ, ká a nyii hiri mʋʋ tíé. 9 Dɩŋdɔmɔ fa sɛ́: <<Á sɩ́ kírwó har, á sɩ́ kiri púwó, á yoo láwɔ́ ɓɩɛ, a la kɩ́ŋkáŋ kɩ́llɩ́rá tɩɩ. Á sɩ́ fóksírá tókowíé, a baa ɔ́wɔ́ rɩ́.>> 10 Ɩ pʋ́ʋ́sɛ́ poo, mʋʋ nyii tɔ́wɔ́ mɛ́. Anɛ pʋlɔ́ŋ dúí, ɓa túwí nyipoduo mʋ́l cʋ́nácʋ́ná. 11 Óó Nyuutɩna Wɩɩsɛ, ɩ nɔ́ŋɔ toó wɩŋsa sɩɛrʋ! Ɩ nɔ́ŋɔ toó: ɩ wéró a wɩ busunnu mʋɔ́ wuu kené, ɩ dóé zénó, ɩ mɔhɛ̃́ nɛ́sɛ ŋmɔwɛ pɛ́ɛ́, ɩɩ́ tʋŋ nyáŋsɛ. 12 Ɩ tɛ́rɩ́ néduu, tíé líŋrá dɩŋdɔma. 13 A tɩ́ŋɩ́ sawér mí, ɩ tɩ́ɛ́sɛ́ nɩɛ nyáŋ ɩ há yɔ́wɛ́ la; a tɩ́ŋɩ́ dóé mí, ɩ kéŋwó cáásɩ́ dɩmɩnɩ́ ná há wéró aá mʋ́. 14 Nɩɛ nɩ́ɔ̃́ a cícel: Filisiti nɩɛ sɩɛrʋ zɔ́kɔ́; 15 Edoŋ kuóre mɩŋ hébíŋ mí; Mɔwabɛ kuóbɛlɛ vɩ́váklɛ; Kanaŋ nɩɛ wuu mʋʋnɛ. 16 Hébíŋ ɓɩzeno sɩ́ túwíwó nyúú. A tɩ́ŋɩ́ vadóé mí, ɓa sɩ́ taŋ anɛ dɔ́wʋ́ɔ́, óó Nyuutɩna Wɩɩsɛ ká rɩ́ɩ́ nɩɛ ná daarɛ, rɩ́ nɩɛ ná ɩ há yóé la, daarɛ. 17 Ɩ sɩ́ káŋwɔ́ mʋ́ a bílí paalɔ ná nyúú, óó Nyuutɩna Wɩɩsɛ, dɩhɩ̃́ ná ɩ há bɩ́rmɛ́ rʋ́ʋ́ ɛ́ɩ́ dɩkéni, jaa ná mɛ́ Nyuutɩna Wɩɩsɛ, ɩ tɩɩ nɛ́ŋsa há cíké. 18 Nyuutɩna Wɩɩsɛ, ɩ ká kuór a kaá mʋ́ wuu, tokó toó!19 Faarɔŋ záksɛ rɩ́rʋ́ lalyóórítórkowa arɩ́rʋ́ zákzɩ́nna zʋ́ mʋʋ, ɛ́ nɛ́ Nyuutɩna Wɩɩsɛ a mʋʋ nyii bɩrko tɔ́wɔ́ mɛ́. Amá Ɩzɩrayɛl nɩɛ zʋ́ mʋʋ sɩ́sɩ́ɛ́nʋ́wa mʋ́ lɛ, ká nyii wʋ́ɔ́ naasɛ mɛ́ tɩ́kɛ́.
20 Ɛ́ nɛ́ Moyizi nátoló Mɩrɩaŋ, Wɩɩsɛ wɩ́laabʋllɔ, ʋ púú beŋtére kánʋ́ nɛ́sɛ mɛ́, ká Ɩzɩrayɛl háála wuu sɩɛ́ lɩɩ tɩ́ŋʋ́ mɛ́ a dú beŋtérsi aá gɔ. 21 Ɓa sɩɛ́ ɓá ká Mɩrɩaŋ la a bʋlɛ́: <<Ɩ́ yɩ a bɛ Nyuutɩna Wɩɩsɛ mɛ́, bee wɩ́ɛ́ ʋ mákʋ́ dóé kɩ́ŋkáŋ maahʋ̃́; ʋ yíkí záka rɩ́ zákzɩ́nnɔ wuu yoo hé mʋʋ mɛ́.>>
Maara nyii
22 Moyizi ɔ́ɔ́ Ɩzɩrayɛl nɩɛ isi Zɔŋkɛwa mʋʋ mɛ́ a caasɛ Suur gɩrbétéke rɩ́ a col. Ɓa válɔ́ tápʋl pírme botoro gɩr ná sɩɛrʋ, ɓa wɩ nyii néé. 23 Ɓa mʋ́ peri Maara rɩ nyii mɩŋ ráŋ, amá ɓa wɩ wuó nyɔ, ɓa haakɩ́. Ɛ́ nɛ́ tɛ ɓa pá dɩhɩ̃́ ná yɩr Maara. 24 Jamáŋ ka ŋmaame cakɛ Moyizi a bʋlɛ́: <<Áá rá nyɔ beé?>> 25 Moyizi ŋmɔwɛ búŋse hé Nyuutɩna Wɩɩsɛ mɛ́; ɛ́ nɛ́ Nyuutɩna Wɩɩsɛ makɛ daa oro pɔ́ʋ́, ʋ pii yoo hé nyii ná mɛ́ ɓa pɔrɛ, a hé nyɔɛ mɛ́. Ráŋ nɛ́ Nyuutɩna Wɩɩsɛ máŋsɛ wɩ́ɛ́ arɩ́ wádawa pá Ɩzɩrayɛl nɩɛ ná, a cɛ́ ráŋ mɛ́ a mɩ́lwɔ́ rʋ́ʋ́ ná. 26 Ʋ sɛ́: <<Rɩɩ́wa nɩ́ɩ́ zesíŋ wérí, ŋ é Nyuutɩna Wɩɩsɛ, ɩ́ Wɩɩsɛ, rɩɩ́wa nɩ́ɩ́ tɩŋ taŋá, rɩɩ́wa nɩ́ɩ́ zésíŋ wɩ́makɛ́, rɩɩ́wa nɩ́ɩ́ tɩ́ŋɩ́ŋ wádawa wuu, ká ná, pʋɔ́llɛ ná ŋ há ɛ́ɛ́ ɓa peri Ezipiti, ŋ waá lo rɩ́ balá má péríwa. Ŋ nɛ́ ká Nyuutɩna Wɩɩsɛ ná háá dúóríwa.>>
27 Ɓa mʋ́ peri Elimi; fuonni fí rí bɛllɛ arɩ́ habɛ́ tuuni mɛɛ́sɩbotoro rí fí ní mɩŋ ráŋ. Ɓa mʋ́ ciki nyii ná laka.