Faarɔŋ kíró tɩŋ Ɩzɩrayɛl nɩɛ mɛ́
14
1 Nyuutɩna Wɩɩsɛ bʋl Moyizi rɩ́ a bʋlɛ́: 2 <<Bʋl pá Ɩzɩrayɛl nɩɛ rɩ́wɔ́ bɩrko ciki Pɩhahɩrɔtɛ sɩ́ɛ́, Mɩgdɔl rɩ́ mʋʋ pɛ́kɛ, a caasɛ Balsɩfɔŋ. Ɩ́ ciki ɛ́ dɩhɩ̃́ sɩ́ɛ́, mʋʋ laka. 3 Faarɔŋ sɩ́ bʋlɛ́ Ɩzɩrayɛl nɩɛ yéŋŋó a gʋɔrɛ aá baarɛ tɔ́ɔ́ ná sɩɛrʋ. Ɓa zʋ́ɔ́ liŋ gɩr sɩɛrʋ. 4 Ŋ sɩ́ dúóri Faarɔŋ baŋcɩla rʋ́ʋ́ kiri tɩ́ŋɩ́wa mɛ́. Amá Faarɔŋ rɩ́rʋ́ sóójiwa ná wuu, ŋ sɩ́ áwɔ́ rɩ́, a tɩŋ ɛ́ mɛ́ a mákɩ́ŋ tɩɩ, rɩ́ Ezipiti tɩ́náwa zɩŋ rɩ́ŋ nɛ́ ká Nyuutɩna Wɩɩsɛ.>> Ɩzɩrayɛl nɩɛ ɓɩɛ́na tɩŋ ɛ́.5 Ɓa há bʋ́lɛ́ pá Ezipiti kuóro a bʋlɛ́ Ɩzɩrayɛl nɩɛ fɔ́ɔ́, Faarɔŋ rɩ́rʋ́ tʋtʋnna baa bɩ́rsɛ sabɩɩna a cáásɩ́wɔ́ bʋlɛ́: <<Beé rí á tʋŋ nyɛ? Beé rí tɛ á lo Ɩzɩrayɛl nɩɛ col? Á báá wɩ nɩɛ wuó ná rɩ́wɔ́ tʋŋ párá.>> 6 Faarɔŋ de a ɓa kánʋ́ záka hóú tórko mí, a kɛ́sʋ́ sóójiwa, ɓa col. 7 Ʋ pá lalyóórítórkowa sɩɛrʋ ɓɩwere zɔwalgo, a pa Ezipiti lalyóórítórkowa wuu a kaa col. Lalyóórítórko wuu sɩɛrʋ, nɩɛ botoro ní ráŋ. 8 Nyuutɩna Wɩɩsɛ dúóri Ezipiti kuóro, Faarɔŋ baŋcɩla, ʋ kiri tɩŋ Ɩzɩrayɛl nɩɛ mɛ́, ká ɓa fa lɛ́ nyaamɩ́ nɛ́. 9 Ezipiti sóójiwa, zákzɩ́nna, lalyóórítórkowa rɩ́wɔ́ záksɛ wuu kiri mʋ́ pu Ɩzɩrayɛl nɩɛ, rɩ ɓa cíkí mʋʋ nʋɔ, Pɩhahɩrɔtɛ rɩ́, a caasɛ Balsɩfɔŋ.
10 Faarɔŋ tu aá peri. Ɩzɩrayɛl nɩɛ há tɩ́ɛ́nɛ́ bel, ɓa ná Ezipiti tɩ́náwa rɩ ɓa mɩ́ŋwɔ́ har aá ko. Hébíŋ ka Ɩzɩrayɛl nɩɛ kɩ́ŋkáŋ, ɓa ŋmɔwɛ búŋse hé Nyuutɩna Wɩɩsɛ mɛ́, 11 ká bʋl Moyizi rɩ́ bʋlɛ́: <<Lɛlbulli ní to Ezipiti mí? Beé rí tɛ ɩ káŋrá zʋ gɩr ráá sʋsɛ? Beé rí tɛ ɩ a á lɛ Ezipiti mí? 12 Á fa wɩ bʋ́lɛ́ pɛ́ɩ́ Ezipiti mí bʋlɛ́: <Lo rá tʋŋ pá Ezipiti tɩ́náwa. Á có Ezipiti tɩ́náwa tʋŋ pɛ́ɛ́; ʋ nɛ́ cícó á há sʋ́sɛ́ gɩrbétéke sɩɛrʋ.>>> 13 Moyizi bʋl nɩɛ ná rɩ́ bʋlɛ́: <<Ɩ́ sɩ́ hébíŋ fá, ɩ́ cɛ́ dɩbalá, ká ná Nyuutɩna Wɩɩsɛ háá rʋ́ʋ́ lɛ́ɩ́wa tá ɛ́ zaa. Ezipiti tɩ́náwa nyáŋ ɩ́ zaa há néé nyɛ, ɩ́ báá waá a rɩ́íwa nówó ná ábádá. 14 Nyuutɩna Wɩɩsɛ sɩ́ yoo pɛ́ɩ́wa; ɩ́ é sikli.>>
Wɩɩsɛ wúri ŋmɛ́nɔ mʋʋ sɩɛrʋ
15 Nyuutɩna Wɩɩsɛ bʋl Moyizi rɩ́ bʋlɛ́: <<Beé rí tɛ ɩ ŋmɔwɛ búŋse aá héŋ mí? Bʋl pá Ɩzɩrayɛl nɩɛ rɩ́wɔ́ va. 16 Ɩ é, kánɩ́ deŋtuke ɓɔ́ zaari mʋʋ mɛ́, ká cákʋ́, rɩ́ Ɩzɩrayɛl nɩɛ zʋ́ʋ́ sɩ́sɩ́ɛ́nʋ́wa a mʋ́ lɛ, ká rɩ́wɔ́ naasɛ sɩ́ nyii mí tɩ́kʋ́. 17 Ŋ é sɩ́ dúóri Ezipiti tɩ́náwa baŋcɩllɛ, rɩ́wɔ́ tɩ́ŋɩ́wa har zʋ. Faarɔŋ rɩ́rʋ́ sóójiwa ná wuu, zákzɩ́nna, lalyóórítórkowa, ŋ sɩ́ áwɔ́ rɩ́, a tɩŋ ɛ́ mɛ́ a mákɩ́ŋ tɩɩ. 18 Ezipiti tɩ́náwa sɩ́ zɩŋ rɩ́ŋ nɛ́ ká Nyuutɩna Wɩɩsɛ, a tɩ́ŋɩ́ŋ háá á rɩ́ŋ áwɔ́ rɩ́ ɛ́, a tɩŋ ɛ́ mɛ́ a mákɩ́ŋ tɩɩ.>>
19 Wɩɩsɛ malɩ́ka ná fa há lá Ɩzɩrayɛl nɩɛ sɩ́ɛ́, ʋ bɩ́rɔ́ ko mʋ́ mɩ́ŋwɔ́ har, duóbána ná má fa há láwɔ́ sɩ́ɛ́, ʋ má bɩrko mʋ́ mɩ́ŋwɔ́ har rɩ́. 20 Duóbána ná cɛ́ Ezipiti tɩ́náwa lɛ́ɛ́ rɩ́ Ɩzɩrayɛl nɩɛ lɛ́ɛ́ pɛ́kɛ nɛ́. Ʋ hé bíno pá cɔɔ nɔ́ŋɔ nɩɛ ká hé pʋmmɔ pá cɔɔ nɔ́ŋɔ é nɩɛ. Ɓa oro wuu wʋ́ʋ́ nɔ́ŋɔ péré tɩ́taŋ wuu, tɔ́ɔ́ pʋl.
21 Moyizi kánʋ́ nɛ́sɛ ɓɔ́ zaari mʋʋ ná mɛ́. Nyuutɩna Wɩɩsɛ a tɔ́ɔ́mʋ́l pozeno oro lú tɩ́taŋ wuu tɔ́ɔ́ pʋl, a yiki mʋʋ nyii ɓa caksɛ bɛllɛ ká tíé kaasɛ. 22 Ɩzɩrayɛl nɩɛ zʋ mʋʋ ná sɩ́sɩ́ɛ́nʋ́wa ká nyii wʋ́ɔ́ naasɛ mɛ́ tɩ́kɛ́. Nyii ná dé cɛ́ anɛ zeŋe ní ɓa néduu rɩ́wɔ́ nágʋɔ. 23 Ezipiti tɩ́náwa kírwó har zʋ; Faarɔŋ záksɛ rɩ́rʋ́ lalyóórítórkowa rɩ́rʋ́ zákzɩ́nna wuu de kírwó har zʋ mʋʋ ná sɩ́sɩ́ɛ́nʋ́wa. 24 Tɔ́ɔ́ pʋlɛ́ cɛ́rɛ, Nyuutɩna Wɩɩsɛ cɛ́ níŋ ná rɩ́ duóbána ná sɩɛrʋ, a bel Ezipiti lalyoore ná, ká káŋwɔ́ valɛ́ vúkmi. 25 Ʋ ɔ́ɔ́ ɓa lalyóórítórkowa naasɛ báá waá bɩ́rɛ, valɛ́ de a ɓɩduó. Ɛ́ nɛ́ ɓa sɛ́: <<Á fá kɛkɛ Ɩzɩrayɛl nɩɛ mɛ́; Nyuutɩna Wɩɩsɛ nɛ́ yó Ezipiti aá pɔ́wɔ́.>>
26 Nyuutɩna Wɩɩsɛ bʋl Moyizi rɩ́ bʋlɛ́: <<Kánɩ́ nɛ́sɛ ɓɔ́ zaari mʋʋ ná mɛ́, rɩ́ nyii ná gíri ko tɔ́ Ezipiti nɩɛ lalyóórítórkowa rɩ́wɔ́ zákzɩ́nna ná mɛ́.>> 27 Moyizi kánʋ́ nɛ́sɛ ɓɔ́ zaari mʋʋ ná mɛ́. Tɔ́ɔ́ pʋlɛ́ cɛ́rɛ, mʋʋ nyii ná dé bɩrɛ ko tɔ́ nɛ́, a cɩ́ŋwɔ́ fa há cɛ́ ɛ́. Ezipiti tɩ́náwa fá, ɓa há ná nyii ná rɩ́ ɓaá kó; amá Nyuutɩna Wɩɩsɛ yíkwó hé mʋʋ ná sɩ́sɩ́ɛ́nʋ́wa. 28 Nyii ná gíri ko tɔ́ Faarɔŋ lalyóórítórkowa ná mɛ́ rɩ́rʋ́ zákzɩ́nna arɩ́rʋ́ sóójiwa wuu mí; ɓa ná fa há kírí Ɩzɩrayɛl nɩɛ har a zʋ mʋʋ ná sɩɛrʋ. Nɛ́ŋ balá má tɩɩ wɩ lúé lɛ. 29 Amá Ɩzɩrayɛl nɩɛ é fa zʋ́ mʋʋ ná sɩ́sɩ́ɛ́nʋ́wa a vaa mʋ́ lɛ ká nyii wʋ́ɔ́ naasɛ mɛ́ tɩ́kɛ́. Nyii ná dé cɛ́ anɛ zeŋe ní ɓa néduu rɩ́wɔ́ nágʋɔ.
30 Ɛ́ kal, Nyuutɩna Wɩɩsɛ lá Ɩzɩrayɛl nɩɛ tá Ezipiti nɩɛ nɛ́sɛ mɛ́. Ɩzɩrayɛl nɩɛ ná Ezipiti nɩɛ rɩ ɓa sʋ́sɔ́ jɛrɛ mʋʋ nʋɔ. 31 Ɩzɩrayɛl nɩɛ ná Nyuutɩna Wɩɩsɛ há kéŋ vadóé ná cɛ́ Ezipiti mí. A tɩŋ ɛ́ wɩ́ɛ́ ɓa fá Nyuutɩna Wɩɩsɛ hébíŋ, a la Nyuutɩna Wɩɩsɛ dí, a lɔ́ʋ́ tʋtʋnnɔ Moyizi má dí.