Pakɛ wɩ́ɛ́ náŋa
13
1 Nyuutɩna Wɩɩsɛ bʋl Moyizi rɩ́ bʋlɛ́: 2 <<Ɩzɩrayɛl nɩɛ bihɔ̃́ wuu arɩ́wɔ́ pʋsɛ bihɩɛ̃́sɛ wuu, píwó páŋ. Ɩzɩrayɛl nɩɛ tooperbio é wuu, ŋ nɛ́ tʋ́ʋ̃́.>> 3 Moyizi bʋl Ɩzɩrayɛl jamáŋ ná rɩ́ bʋlɛ́: <<Ɩ́ líísíwa tɩɩ, kal né ɩ́ há lɛ́ Ezipiti mí, ɩ́ há lɛ́ yomí gɩr mɛ́, bee wɩ́ɛ́ Nyuutɩna Wɩɩsɛ tɩ́ŋʋ́ vadóé mí ní a lɩ́sɩ́wa. Ɩ́ wɩ sɩbʋ́r dɩpɛ́ŋ dí. 4 Zaa kal nɛ́ ɩ́ zʋ ŋmɛ́nɔ, Abibi cana sɩɛrʋ. 5 Bɩná wuu, caná né mí, ɩ́ dí ɛ́ wɩ́ɩ́ cana, rɩ Nyuutɩna Wɩɩsɛ nɛ́ ɛ́ɛ́ rɩ́ɩ́wa zʋ Kananɩɛŋwa rɩ́ Hititiwa rɩ́ Amoritiwa rɩ́ Ferezɩɛŋwa rɩ́ Hɛvɩɛŋwa arɩ́ Yebusɩɛŋwa tíé. Ɛ́ tɔ́ɔ́ nɛ́ ʋ ŋmɩ́ɛ́sɛ pɛ́ɩ́wa naabálwa a bʋlʋ́ sɩ́ pii pɛ́ɩ́wa, tɔ́ɔ́ ná nɛ'ɩ́l rɩ́ tʋʋ há mɩŋ ráŋ wérí. 6 Ɩ́ sɩ́ dí sɩbʋ́rtoó dɩpɛ́ŋwa tápʋlɛ balpɛ; balpɛ kal ná rɩ́ɩ́wa dí cana Nyuutɩna Wɩɩsɛ yɩr mɛ́. 7 Ɩ́ sɩ́ dí sɩbʋ́rtoó dɩpɛ́ŋwa tápʋlɛ balpɛ; ʋ wɩ mɔhɛ̃́ rɩ́ dɩpɛ́ŋ isé rɩ́ sɩbʋ́r mɩ́nɩ́wa tíé dɩhɩ̃́ wuu. 8 Ɛ́ kal, ɩ́ sɩ́ máŋsɛ ɛ́ wɩ́ɩ́ naasɛ a pɛ́ɩ́wa bɛlɛ a bʋlɛ́: <Áá tʋŋ nyɛ, a tɩŋ Nyuutɩna Wɩɩsɛ há tʋ́mʋ́ ná párá á Ezipiti mí lɩɩ wɩ́ɛ́ nɛ́.> 9 Caná né díí sɩ́ a líísé rí a pɛ́ɩ́wa, a a malla ɩ́ nɛ́ŋsa mɛ́, a a malla ɩ́ tulli mí, a makɛ rɩ́ Nyuutɩna Wɩɩsɛ wáda ná mɩ́nɩ́wa nʋɔ mɛ́; bee wɩ́ɛ́ Nyuutɩna Wɩɩsɛ tɩ́ŋʋ́ vadóé mí ní a lɩ́sɩ́wa Ezipiti mí. 10 Bɩná wuu, ɩ́ sɩ́ tɩ́tɩŋ ɛ́ wɩ́makɩ́, ʋ tápʋl mákɩ́ ná tɩɩ.>>11 Moyizi súúri a bʋlɛ́: <<Rɩ Nyuutɩna Wɩɩsɛ nɛ́ keníwa zʋ Kananɩɛŋwa tɔ́ɔ́, anɛ ɛ́ ʋ há ŋmɩ́ɛ́sɛ́ pɛ́ɩ́wa rɩ́rɩ́wa naabálwa, rɩ́ púú rɩ́ pɛ́ɩ́wa, 12 ɩ́ sɩ́ pííwa bihɩɛ̃́sɛ ná há ká báálá wuu a pá Nyuutɩna Wɩɩsɛ, arɩ́rɩ́wa pʋsɛ bihɩɛ̃́sɛ ná há ká wálá, Nyuutɩna Wɩɩsɛ nɛ́ tɩ́wɔ́. 13 Rʋʋ nɛ́ ká kokúme bihɔ̃́, ɩ́ ka peɓawie lenni, rɩɩ ná waá lenni ɩ ŋmɔwɛ lime céŋŋi. Ɩ́ yɔwɛ lɛ́ɩ́wa bihɩɛ̃́sɛ má wuu. 14 Rɩɩ́wa bɛlɛ cíé bɔ́sɩ́wa ʋ ɛɛ mʋ́l, ɩ́ bʋl pɔ́wɔ́ bʋlɛ́: <Nyuutɩna Wɩɩsɛ tɩ́ŋʋ́ vadóé mí ní a lɩ́sɩ́rá Ezipiti mí, yomí gɩr mɛ́. 15 Faarɔŋ sɩɛ́ fa há cɩ́nɛ́ rɩ́ dóé ráá sɩ́ cólú, ɛ́ nɛ́ Nyuutɩna Wɩɩsɛ a Ezipiti bihɩɛ̃́sɛ wuu sʋsɛ, a púl nɩbííne mí a ko tuwi yakɛ pʋsɛ mɛ́. Ɛ́ nɛ́ tɛ á kɛsɛ pʋsɛ bihɩɛ̃́sɛ ná há ká wálá a ɔsɛ vʋk aá pá Nyuutɩna Wɩɩsɛ, ká yɔwɛ aá lárá bihɩɛ̃́sɛ má wuu.> 16 Ɛ́ wɩ́ɛ́ sɩ́ a malla ɩ́ nɛ́ŋsa mɛ́, a a malla ɩ́ tulli mí; bee wɩ́ɛ́ Nyuutɩna Wɩɩsɛ tɩ́ŋʋ́ vadóé mí ní a lɩ́sɩ́rá Ezipiti mí.>>
Wɩɩsɛ lɔ́ʋ́ nɩɛ sɩ́ɛ́ a káŋwɔ́ aá va
17 Faarɔŋ há tá Ɩzɩrayɛl nɩɛ ɓa col, Wɩɩsɛ wɩ lóé ɓa tɩŋ Filisiti nɩɛ tɔ́ɔ́ ŋmɛ́nɔ, kɔ́ʋ́ nɛ́ fa ká térké a a kúléé má; bee wɩ́ɛ́ Wɩɩsɛ sʋ́ʋ́ waá ja rɩ́ Ɩzɩrayɛl nɩɛ ná lal a bʋl fa'ɩ́ɔ̃́, ká bɩrɛ ko zʋ Ezipiti. 18 Ɛ́ nɛ́ Wɩɩsɛ a ɓa gólli a tɩŋ gɩrbétéke ŋmɛ́nɔ, Zɔŋkɛwa mʋʋ rɩ́ cɔɔ. Ɩzɩrayɛl nɩɛ hé lɛ́ɛ́ nɛ́ a tʋkɛ anɛ sóójiwa a lɛ Ezipiti mí.
19 Moyizi fa pɛ́ɛ́ pa Zɔzɛfɛ heŋgbele, bee wɩ́ɛ́ Zɔzɛfɛ fa bʋ́l Ɩzɩrayɛl nɩɛ rɩ́ bʋlɛ́: <<Wɩɩsɛ sɩ́ fɛ́ɩ́wa búŋse. Ɩ́ sɩɛ́ ŋmɩ́ɛ́sɛ páŋ rɩɩ́wa sɩ́ pɛ́ páŋ heŋgbele kaa lɛ rɛɛ́.>>
20 Ɩzɩrayɛl nɩɛ isi Sʋkɔtɛ mɛ́ a mʋ́ ciki Etaŋ mɛ́ gɩr nʋɔ. 21 Nyuutɩna Wɩɩsɛ tɩɩ nɛ́ fa láwɔ́ sɩ́ɛ́ a káŋwɔ́ aá va: wɔhɔ, ʋ mɩŋ duóbáŋcʋɔrɩ́ sɩɛrʋ a láwɔ́ sɩ́ɛ́ a makɛ ŋmɛ́nɔ aá pɔ́wɔ́, tɩ́taŋ, duóbána ná a níŋ a cáánɩ́wɔ́, a makɛ rɩ́wɔ́ vɩ́va tɩ́taŋ rɩ́ wɔhɔ wuu. 22 Duóbáŋcʋɔrɩ́ ná mɩ́ŋwɔ́ sɩ́ɛ́ wɔhɔ, tɩ́taŋ ʋ a níŋ, ʋ wʋ́ɔ́ mɩ́ɩ́ kɛkɛ.