Wɩɩla bɔmmʋ́ɔ́
(5) Pʋɓʋ́
9
1 Nyuutɩna Wɩɩsɛ bʋl Moyizi rɩ́ bʋlɛ́: <<Mʋ́ Faarɔŋ rɩ́ a bʋl pɔ́ʋ́ bʋlɛ́: <Nyuutɩna Wɩɩsɛ, Ebirewa Wɩɩsɛ nɛ́ sɛ́ rɩ́ŋ bʋl pɛ́ɩ́, rɩ́ɩ́ lo rʋ́ʋ́ nɩɛ col a makɛ rɩ́wɔ́ cʋ́cʋ́ɔ́lʋ́. 2 Rɩɩ nɛ́ ha vɛ́ɛ́ rɩ́ɩ́ táwɔ́ rɩ́wɔ́ col, ká baa bílwó, 3 Nyuutɩna Wɩɩsɛ sɩ́ púú nɛ́sɛ tɩ́kɩ́ pʋtuni ná há mɩŋ baksɛ mɛ́, a makɛ rɩ́ pʋɓʋ́ ɓɩbɔmɔ kɛ́sɩ́ záksɛ, kokúsi, nyʋ́kmawa, nɛsɛ, pieŋse rɩ́ bʋnnɛ, rɩ́wɔ́ sʋsɛ. 4 Amá Nyuutɩna Wɩɩsɛ sɩ́ coki a rɩ́ Ɩzɩrayɛl nɩɛ pʋna balá má tɩɩ sɩ́ sʋ́wʋ́, ká rɩ́ Ezipiti tɩ́náwa dʋŋɔ ɓɩɛ nɛ́ sʋsɛ.>>> 5 Nyuutɩna Wɩɩsɛ sɩɛ́ mákɛ́ tɛ́ŋ a bʋ́lɛ́ cíé ní ʋʋ́ a rʋ́ʋ́ tʋŋ ɛ́. 6 Tɔ́ɔ́ ɓɩɛ́na pʋl Nyuutɩna Wɩɩsɛ tʋŋ ɛ́. Ezipiti pʋsɛ wuu sʋsɛ, ká Ɩzɩrayɛl nɩɛ pʋna balá má tɩɩ wɩ sʋ́wɛ́. 7 Faarɔŋ tʋŋ ɓa mʋ́, rɩ Ɩzɩrayɛl nɩɛ pʋna balá má tɩɩ wɩ sʋ́wɛ́. Amá Faarɔŋ dúórú baŋcɩla, a wɩ Ɩzɩrayɛl nɩɛ tɛ́ɛ́ rɩ́wɔ́ col.Wɩɩla balgo
(6) Zɔ́ŋmɛrɛ
8 Nyuutɩna Wɩɩsɛ bʋl Moyizi rɩ́ Aarɔŋ rɩ́ bʋlɛ́: <<Ɩ́ a kurpóti tapʋmmɔ nɛ́sɛ sɩ́ɩ́ bɛllɛ, rɩ́ Moyizi kaa lɩɩ cɛ́ ká yó bána rɩ́, Faarɔŋ sɩ́ɛ́. 9 Tapʋmmɔ ná sɩ́ bɩrmɛ kuŋkulo a tɔ́ Ezipiti wuu mí, ká a rɩ́ nɩbííne rɩ́ pʋsɛ wuu de lɛ zɔ́ŋmɛrɛ a cúnni fʋbɔma, a sú tɔ́ɔ́ wuu.>> 10 Moyizi rɩ́ Aarɔŋ a kurpóti tapʋmmɔ ná a kaa mʋ́ Faarɔŋ dɩhɩ̃́. Moyizi pii yo bána rɩ́, ɓa de a nɩbííne rɩ́ pʋsɛ wuu de lɛ zɔ́ŋmɛrɛ a cúnni fʋbɔma. 11 Ezipiti bɔmɩ́tɩ́náwa ná wɩ wóllé káŋwɔ́ tɩɩ nyɩɩsɛ Moyizi mí, bee wɩ́ɛ́ ɓa tɛnnɛ cúnni fʋbɔma anɛ Ezipiti tɩ́náwa wuu. 12 Nyuutɩna Wɩɩsɛ dúóri Faarɔŋ baŋcɩla, ʋ vɛ Moyizi rɩ́ Aarɔŋ zesé, anɛ ɛ́ Nyuutɩna Wɩɩsɛ fa há bʋ́lɛ́.
Wɩɩla balpɛ
Duódɔ́wʋ́ɔ́
13 Nyuutɩna Wɩɩsɛ bʋl Moyizi rɩ́ bʋlɛ́: <<Cɔŋ fól a kánɩ́ tɩɩ mʋ́ cáánɛ Faarɔŋ, ká bʋ́lʋ́ rɩ́ bʋlɛ́: <Nyuutɩna Wɩɩsɛ, Ebirewa Wɩɩsɛ nɛ́ sɛ́ rɩ́ŋ bʋl pɛ́ɩ́ bʋlɛ́: Lo rɩ́ŋ nɩɛ col a makɛ rɩ́wɔ́ cʋ́cʋ́ɔ́lɩ́ŋ. 14 Sɩ́sɛ́nyɛ é, ŋ sɩ́ a rɩ́ wɩɩla rɩ́rʋ́ dúó wuu pérí tɩɩ, ɩ tʋtʋnna arɩ́rɩ́ nɩɛ, a makɛ rɩ́ɩ́wa zɩŋ rɩ́ŋ nɔ́ŋɔ toó tíé nyúú wuu mí. 15 Rɩŋ fa tɛ́rɩ́ŋ nɛ́sɛ rɛ́, rɩ́ɩ́ a rɩ́ pʋɔlɩ́taarɩ́ ná há bɔ́mɔ́ ɓálɩ́ rɩ́rɩ́ nɩɛ sɩɛrʋ, nyɛ mɛ́ ɩ nyɩ́ɩ́kɛ tíé nyúú. 16 Amá ŋ lóó ɩ ha mɩŋ, a makɛ rɩ́ŋ a rɩ́ɩ́ náŋ dóé ká rɩ́wɔ́ bʋ́lɩ́ŋ wɩ́ɛ́ tíé nyúú wuu mí, rɩ́ŋ yɩr lɛ. 17 Ká ɩ ha cɩ́nɩ́ŋ nɩɛ mɛ́ a pɔ́ rɩ́wɔ́ sɩ́ cólú, 18 cíé cɛ́rɛ́ né mí, ŋ sɩ́ a rɩ́ duódɔ́wʋ́ɔ́ ɓɩkana lɛ bána tuwi; a de pɔ́ Ezipiti mɩnɛ́ mɛ́ wuu, ɓa há wʋ́ʋ́ duo néé ná a ko aá lɛ zaa. 19 Ɛ́ wɩ́ɛ́, a rɩ́wɔ́ héí pʋsɛ rɩ́rɩ́ baksɛ onni wuu jɩɩsɛ mɛ́. Nɩbííne rɩ́ pʋsɛ ná é wuu há sɩ́ káánɛ baksɛ mɛ́, a wɩ jɩɩsɛ zʋ́ɛ́, duódɔ́wʋ́ɔ́ ná sɩ́ yósíwó rɩ́wɔ́ sʋsɛ.>>
20 Faarɔŋ tʋtʋnna ná náŋa há fá Nyuutɩna Wɩɩsɛ wɩ́bʋlɩ́ ná hébíŋ, ɓalaɓala ɓa ɔ́ɔ́ ɓa tʋtʋnna rɩ́wɔ́ pʋsɛ zʋ jɩɩsɛ. 21 Ká ɓa ná há wɩ Nyuutɩna Wɩɩsɛ wɩ́bʋlɩ́ ná hébíŋ fɛ́ɛ́, ɓa lóó ɓa tʋtʋnna rɩ́wɔ́ pʋsɛ káánɛ baksɛ mɛ́.
22 Nyuutɩna Wɩɩsɛ bʋl Moyizi rɩ́ bʋlɛ́: <<Kánɩ́ nɛ́sɛ tɛrɛ bána rɩ́, rɩ́ duódɔ́wʋ́ɔ́ tuwi Ezipiti tɔ́ɔ́ sɩɛrʋ wuu, a tuwi nɩbííne nyúú, a tuwi pʋsɛ arɩ́ oŋ nyʋ́ʋ́lɛ rɩ́wɔ́ dúó wuu há mɩŋ Ezipiti mí nyúú.>> 23 Moyizi kánʋ́ deŋtuke tɛrɛ bána rɩ́. Nyuutɩna Wɩɩsɛ tʋŋ duóɓɛ́llɛ rɩ́ duódɔ́wʋ́ɔ́: duófɩ́llɔ la sɩ́ɛ́ ko tuwi tíé, ká Nyuutɩna Wɩɩsɛ a duódɔ́wʋ́ɔ́ tuwi Ezipiti nyúú. 24 Duódɔ́wʋ́ɔ́ arɩ́ duófɩ́llɔ wuu de kuosi náŋá mɛ́ arɩ́ dóé; Ezipiti tɩ́náwa ha wʋ́ʋ́ duo néé ná Ezipiti mɩnɛ́ wuu mí. 25 Ezipiti wuu mí, duódɔ́wʋ́ɔ́ ná yósí nɩɛ ná há mɩŋ baksɛ mɛ́ arɩ́ pʋsɛ, a yosi oŋparɛ́ wuu conni, a bónni tuuni wuu. 26 Gosaŋ dɩtɩ́llɛ dʋŋɔ, Ɩzɩrayɛl nɩɛ dɩmɩnɩ́, ráŋ nɛ́ duódɔ́wʋ́ɔ́ wɩ túwé.
27 Faarɔŋ yɩ́rɛ Moyizi rɩ́ Aarɔŋ a bʋ́lwɔ́ rɩ́ bʋlɛ́: <<Mʋ́l né mí, ŋ nɛ́ zɔ́kɛ́. Ŋ rɩ́rɩ́ŋ nɩɛ nɛ́ zɔ́kɛ́; Nyuutɩna Wɩɩsɛ nɛ́ kéŋ taŋá. 28 Ɩ́ sʋl Nyuutɩna Wɩɩsɛ rʋ́ʋ́ a rɩ́ duóɓɛ́llɛ rɩ́ duódɔ́wʋ́ɔ́ ná siki. Ŋ sɩ́ tɛ́ɩ́wa rɩ́ɩ́wa col, ŋ báá wɩ́ɩ́wa mɩ́ɩ́ kɛ́rɛ.>> 29 Moyizi bʋ́lʋ́ rɩ́ bʋlɛ́: <<Rɩŋ nɛ́ lɛ́ tɔ́ɔ́ sɩɛrʋ ko tenni, ŋ sɩ́ ɓɔ́ŋ nɛ́ŋsa caasɛ Nyuutɩna Wɩɩsɛ a sʋ́lʋ́. Duóɓɛ́llɛ ná rɩ́ duódɔ́wʋ́ɔ́ ná sɩ́ siki, a makɛ rɩ́ɩ́ zɩŋ rɩ́ Nyuutɩna Wɩɩsɛ nɛ́ tɛ tíé. 30 Ŋ taŋa ɩ́ɔ̃́ ɩ rɩ́rɩ́ tʋtʋnna, ɩ́ báá ha waá a rɩ́ɩ́wa fá Nyuutɩna Wɩɩsɛ hébíŋ.>>
31 Oŋparɛ́ náŋa ɓaá yɩ́rɛ lɛ́ŋ arɩ́ ɔ́rzɛ*, duódɔ́wʋ́ɔ́ ná ŋmɛ́lwɔ́, bee wɩ́ɛ́ ɔ́rzɛ lʋlɛ́ cɛ́rɛ nɛ́, lɛ́ŋ má fɩɩlɛ́ cɛ́rɛ́ nɛ́. 32 Bilé rɩ́ épótiri* é, duódɔ́wʋ́ɔ́ ná wʋ́ɔ́ ŋmɛ́lɛ́, bee wɩ́ɛ́ ɓa ɛɛ tɛ́ŋ fa ha wɩ péré.
33 Moyizi lɛ Faarɔŋ dɩhɩ̃́, a lɛ tɔ́ɔ́ sɩɛrʋ, ká ɓɔ́ʋ́ nɛ́ŋsa caasɛ Nyuutɩna Wɩɩsɛ a sʋ́lʋ́. Duóɓɛ́llɛ ná rɩ́ duódɔ́wʋ́ɔ́ ná siki, duóŋ má siki. 34 Faarɔŋ há néé rɩ duóɓɛ́llɛ rɩ́ duódɔ́wʋ́ɔ́ arɩ́ duóŋ ná síkó, ʋ báá ɔ́ɔ́ zɔkɛ; ʋ rɩ́rʋ́ tʋtʋnna báá dúóríwó baŋcɩllɛ. 35 Faarɔŋ baŋcɩla dúóri, ʋ wɩ Ɩzɩrayɛl nɩɛ tɛ́ɛ́ ɓa col, anɛ ɛ́ Nyuutɩna Wɩɩsɛ fa há tɩ́ŋ Moyizi mí a bʋl.