LƖƖ 8

1 Nyuutɩna Wɩɩsɛ baa bʋl Moyizi rɩ́ bʋlɛ́: <<Bʋl rɩ́ Aarɔŋ púú deŋtuke ná kánʋ́ nɛ́sɛ mɛ́ a kaa ɓɔ́ tɛrɛ Ezipiti nyii wuu: ʋ polnaasɛ, Nili naasɛ, ʋ fuonni arɩ́rʋ́ nyipɩ́nɛ wuu, a a rɩ́ sɔrɛ lɛ a sú Ezipiti.>> 2 Aarɔŋ ka deŋtuke ná ɓɔ́ caasɛ Ezipiti nyii dɩmɩnɛ́, sɔryórówa de gú ko lɛ a sú Ezipiti. 3 Ezipiti bɔmɩ́tɩ́náwa má a ɛ́, a tʋŋ bɔmɩ́ a a sɔrɛ lɩɩ ɓɛ́sɛ tɔ́ɔ́.

4 Faarɔŋ yɩ́rɛ Moyizi rɩ́ Aarɔŋ a bʋlɛ́: <<Ɩ́ sʋl Nyuutɩna Wɩɩsɛ rʋ́ʋ́ a rɩ́ sɔrɛ ná yʋ́ksɛ ká táŋ rɩ́rɩ́ŋ tɔ́ɔ́ nɩɛ, ká rɩ́ŋ tá Ɩzɩrayɛl nɩɛ rɩ́wɔ́ mʋ́ ɓʋ́ʋ́sɛ pʋsɛ a ɔsɛ vʋk pá Nyuutɩna Wɩɩsɛ.>> 5 Moyizi bʋl Faarɔŋ rɩ́ bʋlɛ́: <<Ŋŋ́ sʋ́lɩ́ rɩ́ɩ́ nɛ́ makɛ tɛ́ŋ ná há mɔhɛ̃́ rɩ́ŋ sʋl Nyuutɩna Wɩɩsɛ pɛ́ɩ́ rɩ́rɩ́ tʋtʋnna arɩ́rɩ́ tɔ́ɔ́ nɩɛ, rɩ́ sɔrɛ ná yʋ́ksɩ́wa jɩɩsɛ mɛ́, ká mɩŋ Nili fuo dʋŋɔ mɛ́ nɛ́.>> 6 Faarɔŋ sɛ́: <<Cíé ní.>> Moyizi sɛ́: << Anɛ ɛ́ ɩ há bʋ́lɛ́, ɛ́ sɩ́ tʋŋ a makɛ rɩ́ɩ́ zɩŋ rɩ́ Nyuutɩna Wɩɩsɛ, á Wɩɩsɛ, ʋ nɔ́ŋ wuu toó. 7 Sɔrɛ ná sɩ́ kɛ́kɩ́ mɛ́, a kɛ́kɩ́ jɩɩsɛ mɛ́, a kɛ́kɩ́ tʋtʋnna rɩ́rɩ́ tɔ́ɔ́ nɩɛ mɛ́, ká mɩŋ Nili fuo dʋŋɔ mɛ́.>> 8 Moyizi rɩ́ Aarɔŋ lɛ Faarɔŋ dɩhɩ̃́ a col. Moyizi ŋmɔwɛ búŋse hé Nyuutɩna Wɩɩsɛ mɛ́, sɔryórówa ná ʋ há ɛ́ɛ́ ɓa ko suki Faarɔŋ hé wɩ́ɛ́. 9 Nyuutɩna Wɩɩsɛ saŋ Moyizi sʋlɛ́, a a sɔrɛ ná sʋsɛ jɩɩsɛ mɛ́, wuolli mí arɩ́ baksɛ mɛ́. 10 Ɓa paa pú pú púlli ɓa sʋɔrɛ, sɔ́ŋ sú tɔ́ɔ́ wuu. 11 Poo há ŋmɔ́wɛ́ Faarɔŋ mɛ́, Faarɔŋ baŋcɩla dúóró, ʋ vɛ Moyizi rɩ́ Aarɔŋ zesé, anɛ ɛ́ Nyuutɩna Wɩɩsɛ fa há bʋ́lɛ́.

Wɩɩla botoro

(3) Bʋ́sɛ

12 Nyuutɩna Wɩɩsɛ bʋl Moyizi rɩ́ bʋlɛ́: <<Bʋlɛ́ Aarɔŋ púú deŋtuke ná kánʋ́ nɛ́sɛ mɛ́ a kaa ɓɔ́ ká ŋmɔwɛ tíé kuŋkulo; kuŋkulo ná sɩ́ bɩrmɛ bʋ́sɛ Ezipiti wuu mí.>> 13 Ɓa ɓɩɛ́na tʋ́ŋ ɛ́ nɛ́, Aarɔŋ ka deŋtuke ná ɓɔ́ ká ŋmɔwɛ tíé kuŋkulo. Kuŋkulo ná de bɩrmɛ bʋ́sɛ a tɔ́ nɩbííne rɩ́ pʋsɛ wuu mí. Ezipiti kuŋkulo wuu dé bɩrmɛ bʋ́sɛ nɛ́ a sú tɔ́ɔ́ wuu. 14 Bɔmɩ́tɩ́náwa tʋ́ŋwɔ́ bɔmɩ́ rɩ́wɔ́ má a bʋ́sɛ, a aa gúl. Ká bʋ́sɛ de suki nɩbííne rɩ́ pʋsɛ hé. 15 Ɛ́ nɛ́ bɔmɩ́tɩ́náwa ná bʋl pá Faarɔŋ bʋlɛ́: <<Wɩɩsɛ nɛ́sɛ nɩ́ɩ́ tʋmɛ́.>> Ká Faarɔŋ baŋcɩla dúóri, ʋ vɛ Moyizi rɩ́ Aarɔŋ zesé, anɛ ɛ́ Nyuutɩna Wɩɩsɛ fa há bʋ́lɛ́.

Wɩɩla baná

(4) Naŋcʋdʋsɛ́

16 Nyuutɩna Wɩɩsɛ bʋl Moyizi rɩ́ bʋlɛ́: <<Cɔŋ fól mʋ́ Faarɔŋ rɩ́, tɛ́ŋ ná mɛ́ ʋ há sɩ́ lɛ rʋ́ʋ́ mʋ́ nyii nʋɔ. Bʋ́lʋ́ rɩ́ bʋlɛ́: <Nyuutɩna Wɩɩsɛ sɛ́: Táŋ nɩɛ rɩ́wɔ́ lɛ a mʋ́ aá cʋ́ɔ́lɩ́ŋ. 17 Rɩɩ nɛ́ wɩ́ŋ nɩɛ lóé rɩ́wɔ́ col, ŋ sɩ́ a rɩ́ naŋcʋdʋsɛ́ ko lɩ́ɩ́ mɛ́, ɩ rɩ́rɩ́ tʋtʋnna rɩ́rɩ́ nɩɛ arɩ́rɩ́ jɩɩsɛ. Ɓa sɩ́ sú Ezipiti tɩ́náwa jɩɩsɛ, a súwó dɩmɩnɛ́ wuu tíé. 18 Amá ɛ́ kal, ŋ sɩ́ a rɩ́ naŋcʋdʋsɛ́ ná sɩ́ŋ nɩɛ dɩmɩnɩ́ zʋ́, Gosaŋ dɩtɩ́llɛ; a makɛ rɩ́ɩ́ zɩŋ rɩ́ŋ é Nyuutɩna Wɩɩsɛ mɩ́nɩ́ tɔ́ɔ́ né mí. 19 Ŋ sɩ́ coki láŋ nɩɛ tá, ká tɛ́ɩ́ nɩɛ. Cíé ní rɩ́ ɛ́ nyɩnɛ tʋŋ.>>> 20 Nyuutɩna Wɩɩsɛ ɓɩɛ́na tʋ́ŋ ɛ́. Naŋcʋdʋsɛ́ ná de gíri ko zʋ Faarɔŋ kuójaa, a zʋ́ʋ́ tʋtʋnna jɩɩsɛ, a zʋ Ezipiti tɔ́ɔ́ wuu. Naŋcʋdʋsɛ́ ná zɔkɛ tɔ́ɔ́ wuu. 21 Faarɔŋ yɩ́rɛ Moyizi rɩ́ Aarɔŋ a bʋlɛ́: <<Ɩ́ mʋ́ a ɓʋ́ʋ́sɛ pʋsɛ ɔsɛ vʋk aá pɛ́ɩ́wa Wɩɩsɛ ná ŋ tɔ́ɔ́ sɩɛrʋ, ká sɩ́ lɛ́!>> 22 Moyizi sɛ́: <<Aɩ́, ʋ ɛ́ wɩ cɛ́rɛ́, bee wɩ́ɛ́ pʋsɛ ná á háá rá ɓʋ́ʋ́sɛ pá Nyuutɩna Wɩɩsɛ á Wɩɩsɛ, á sɩ́ zɔkɛ Ezipiti tɩ́náwa kíŋse. Raá sɩɛ́ zɔ́kwɔ́ kíŋse, ɓa wɩ́rá yosi rɩ́ dɔ́wʋ́ɔ́? 23 Ɛ́ wɩ́ɛ́, á sɩ́ va gɩrbétéke sɩɛrʋ tápʋl pírme botoro ká ɓʋ́ʋ́sɛ pʋsɛ ɔsɛ vʋk pá Nyuutɩna Wɩɩsɛ á Wɩɩsɛ, ɛ́ ʋ há sɩ́ makɛ ráá a.>> 24 Faarɔŋ sɛ́: << Ŋ sɩ́ lo rɩ́ɩ́wa mʋ́ ɔsɛ vʋk a pá Nyuutɩna Wɩɩsɛ ɩ́ Wɩɩsɛ gɩrbétéke sɩɛrʋ, ɩ́ taŋa sɩ́ dɩbólí mʋ́. Ɩ́ sɩɛ́ sʋ́lʋ́ páŋ.>> 25 Moyizi sɛ́: << Ŋ háá lɩ́ɩ́ dɩhɩ̃́ nyɛ, ŋ sɩ́ sʋl Nyuutɩna Wɩɩsɛ rʋ́ʋ́ cíé a rɩ́ naŋcʋdʋsɛ́ ná kɛ́kɩ́ mɛ́, a kɛ́kɩ́ tʋtʋnna rɩ́rɩ́ nɩɛ mɛ́. Amá pɔ́ rɩ́ɩ́ háá nyɩ́sɩ́rá, a sɩ́ ló ráá lɛ a mʋ́ ɔsɛ vʋk aá pá Nyuutɩna Wɩɩsɛ!>> 26 Moyizi lɛ Faarɔŋ dɩhɩ̃́ a ŋmɔwɛ búŋse pá Nyuutɩna Wɩɩsɛ. 27 Nyuutɩna Wɩɩsɛ tʋŋ ɛ́ Moyizi há sʋ́lɛ́, a a naŋcʋdʋsɛ́ ná nyɩ́ɩ́kɛ Faarɔŋ laka arɩ́rʋ́ tʋtʋnna rɩ́rʋ́ nɩɛ laka. Balá má tɩɩ wɩ káánɛ́.

28 Amá Faarɔŋ báá ha dúórú baŋcɩla, a wɩ lóé Ɩzɩrayɛl nɩɛ col.