7
1 Nyuutɩna Wɩɩsɛ bʋl Moyizi rɩ́ bʋlɛ́: <<Zesi, ŋ bílí rɩ́ɩ́ nɛ Wɩɩsɛ Faaroŋ sɩ́ɛ́, ká rɩ́ Aarɔŋ ɛ́ɩ́ wɩ́laabʋllɔ. 2 Ɩ sɩ́ bʋl wɩ́ɛ́ ná wuu ŋ há sɩ́ bʋl pɛ́ɩ́ a pɛ́ɩ́ máálá Aarɔŋ, rʋ́ʋ́ laa bʋl pá Faarɔŋ, a makɛ rʋ́ʋ́ lɩ́sɛ Ɩzɩrayɛl nɩɛ ʋ tɔ́ɔ́ mɛ́. 3 Amá ŋ sɩ́ dúóri Faarɔŋ baŋcɩla. Ŋ sɩ́ tʋŋ wɩ́nyɩnɛ rɩ́ nyáŋsɛ ɓɩkana Ezipiti mí, 4 amá Faarɔŋ waá a rʋ́ʋ́ zésíwa rɩ́. Ŋ sɩ́ píŋ vadóé hé Ezipiti mí a tɩŋ wɩɩlawa ɓɩduoru mí a lɩ́sɩ́ŋ nɩɛ, Ɩzɩrayɛl nɩɛ rɩ́wɔ́ tʋkɛ nɛ sóójiwa a lɛ Ezipiti mí. 5 Ezipiti nɩɛ sɩ́ zɩŋ rɩ́ŋ nɛ́ ká Nyuutɩna Wɩɩsɛ, rɩŋ nɛ́ kúé tɩ́ɛ́nɩ́ŋ nɛ́sɛ rɩ́ cɛ́ Ezipiti mí, rɩ́ a rɩ́ Ɩzɩrayɛl nɩɛ lɛ ká táwɔ́.>> 6 Moyizi rɩ́ Aarɔŋ ɓɩɛ́na tʋ́ŋ ɛ́ ná Nyuutɩna Wɩɩsɛ há mákɛ́ pɔ́wɔ́. 7 Moyizi bɩŋsɛ fa ká mɛɛ́sɩbaná, ká Aarɔŋ bɩŋsɛ a mɛɛ́sɩbaná rɩ́ botoro, tɛ́ŋ ná mɛ́ ɓa háá bʋl Faarɔŋ rɩ́.Deŋtuke bɩ́rmɛ́ dʋŋ
8 Nyuutɩna Wɩɩsɛ bʋ́l Moyizi rɩ́ Aarɔŋ rɩ́ bʋlɛ́: 9 <<Rɩ Faarɔŋ nɛ́ bʋ́lɩ́wa rɩ́ bʋlɩ́wa a wɩ́nyána, ɩ bʋlɛ́ Aarɔŋ púú deŋtuke ná yo Faarɔŋ sɩ́ɛ́. Deŋtuke ná sɩ́ bɩrmɛ dʋŋ.>> 10 Ɛ́ nɛ́ Moyizi rɩ́ Aarɔŋ isi mʋ́ Faarɔŋ rɩ́ a tʋŋ ɛ́ Nyuutɩna Wɩɩsɛ há mákɛ́ pɔ́wɔ́: Aarɔŋ púú deŋtuke ná yo Faarɔŋ rɩ́rʋ́ tʋtʋnna sɩ́ɛ́, deŋtuke ná de bɩrmɛ dʋŋ. 11 Ɛ́ nɛ́ Faarɔŋ má yɩ́rɛ zɩmɛ́tɩ́náwa rɩ́ hɩla ɓa ko, a má tʋ́ŋwɔ́ bɔmɩ́ a a ɛ́ tɩɩ: 12 Ɓa wuu píwó deŋtuksi yo, ɓa bɩrmɛ dʋma. Amá Aarɔŋ deŋtuke ná líŋwó deŋtuksi ná. 13 Ká Faarɔŋ baŋcɩla ha dúóri, ʋ vɛ Moyizi rɩ́ Aarɔŋ zesé, anɛ ɛ́ Nyuutɩna Wɩɩsɛ fa há bʋ́lɛ́.
Wɩɩlawa fí
(1) Nyii bɩ́rmɛ́ cɛ́l
14 Nyuutɩna Wɩɩsɛ bʋl Moyizi rɩ́ bʋlɛ́: <<Faarɔŋ baŋcɩla dúóró, ʋ vɛ rʋ́ʋ́ tá Ɩzɩrayɛl nɩɛ rɩ́wɔ́ col. 15 Cɔŋ fól mʋ́ Faarɔŋ rɩ́, tɛ́ŋ ná mɛ́ ʋ há sɩ́ lɛ rʋ́ʋ́ mʋ́ nyii nʋɔ. Dɛ́llʋ́ Nili fuo nʋɔ. Pɛ́ pi deŋtuke ná há bɩ́rmɛ́ dʋŋ a kánɩ́ nɛ́sɛ mɛ́. 16 Ɩ sɩ́ bʋl Faarɔŋ rɩ́ bʋlɛ́: <Nyuutɩna Wɩɩsɛ há ká Ebirewa Wɩɩsɛ nɛ́ tʋ́mɩ́ŋ ɩ dɩhɩ̃́ rɩ́ŋ bʋl pɛ́ɩ́ rɩ́ɩ́ lo rʋ́ʋ́ nɩɛ col a makɛ rɩ́wɔ́ cʋ́cʋ́ɔ́lʋ́ gɩrbétéke sɩɛrʋ. Amá a ko aá lɛ zaa, ɩ vɔ́ɔ́ rɩ́ɩ́ zesi. 17 Nyuutɩna Wɩɩsɛ sɩɛ́ sɛ́ rɩ́ɩ́ sɩ́ zɩ́mʋ́ há ká nɛ́ŋ ná. Ŋ sɩ́ pi deŋtuke né ŋmɔwɛ Nili nyii rɩ́wɔ́ bɩrmɛ cɛ́l. 18 Náŋwʋlɛ́ ná há mɩŋ Nili nyii sɩɛrʋ sɩ́ sʋsɛ a sʋɔrɛ zɔkɛ nyii, rɩ́ Ezipiti tɩ́náwa sɩ́ wóllí nyɔ.>>> 19 Nyuutɩna Wɩɩsɛ baa bʋl Moyizi rɩ́ bʋlɛ́: <<Bʋlɛ́ Aarɔŋ púú deŋtuke ná kánʋ́ nɛ́sɛ mɛ́ a kaa ɓɔ́ tɛrɛ Ezipiti nyii wuu: ʋ polnaasɛ, Nili naasɛ, ʋ fuonni arɩ́rʋ́ nyipɩ́nɛ wuu, a makɛ rɩ́wɔ́ nyii wuu bɩrmɛ cɛ́l. Tɔ́ɔ́ wuu sɩ́ a cɛ́l, rɩ́wɔ́ daviini rɩ́wɔ́ dɔ́wɩ́viini wuu sɩɛrʋ nyii a cɛ́l.>>
20 Moyizi rɩ́ Aarɔŋ tʋŋ ɛ́ ná Nyuutɩna Wɩɩsɛ há mákɛ́ pɔ́wɔ́: Aarɔŋ ka deŋtuke ná ɓɔ́ ká ŋmɔwɛ nyii ná há mɩŋ Nili mí, Faarɔŋ rɩ́rʋ́ tʋtʋnna sɩ́ɛ́; Nili nyii wuu de bɩrmɛ cɛ́l. 21 Náŋwʋlɛ́ ná fa há mɩŋ Nili nyii sɩɛrʋ sʋsɛ a sʋɔrɛ zɔkɛ nyii, Ezipiti tɩ́náwa wʋ́ɔ́ wuó nyɔ. Tɔ́ɔ́ wuu de a cɛ́l. 22 Amá Ezipiti bɔmɩ́ tɩ́náwa má áwɔ́ bɔmɩ́ a tʋŋ ɛ́ tɩɩ. Faarɔŋ baŋcɩla dúóri, ʋ vɛ Moyizi rɩ́ Aarɔŋ zesé, anɛ ɛ́ Nyuutɩna Wɩɩsɛ fa há bʋ́lɛ́. 23 Faarɔŋ bɩrɛ a mʋ́ʋ́ jaa, ká wɩ bélé ná rɩ ɛ́ wɩ́ɩ́ ká wɩ́fɩ́ɛ́ŋ. 24 Ezipiti tɩ́náwa wuu isi tuwi lú vile Nili kílo rɩ́wɔ́ ná nyiwere nyɔ, bee wɩ́ɛ́ ɓa fa wɩ Nili nyii wuó nyɔ. 25 Nyuutɩna Wɩɩsɛ há zɔ́kɛ́ Nili nyii ná, ɛ́ dáárɔ́ dáánɛ peri tápʋlɛ balpɛ.
Wɩɩla bɛllɛ
(2) Sɔryórówa
26 Nyuutɩna Wɩɩsɛ baa bʋl Moyizi rɩ́ bʋlɛ́: <<Mʋ́ ná Faarɔŋ a bʋl pɔ́ʋ́ bʋlɛ́: Nyuutɩna Wɩɩsɛ sɛ́: <Lo rɩ́ŋ nɩɛ col a makɛ rɩ́wɔ́ cʋ́cʋ́ɔ́lɩ́ŋ. 27 Rɩɩ nɛ́ ha vɛ́ɛ́ rɩ́ɩ́ lowó col, ŋ sɩ́ a rɩ́ sɔryórówa lɛ a súí tɔ́ɔ́ wuu. 28 Sɔrɛ sɩ́ sú Nili wuu a múmuŋsi, a lɛ a zʋ́ɩ́ kuójaa, a zʋ́ɩ́ dɩpɩ́nɛ, a zɩ́nɩ́ gódó má tɩɩ, a zʋ́ɩ́ tʋtʋnna jɩɩsɛ, a zʋ́ɩ́ tɔ́ɔ́ nɩɛ wuu jɩɩsɛ, a zʋ́ɩ́wa dɩpɛ́ŋwa dɩwasɛ́ arɩ́ dɩpɛ́ŋ míŋ dɩŋmʋsɛ́. 29 Sɔrɛ ná sɩ́ zɛ́ aá válɩ́ daha, a zɛ́ aá válɩ́ tʋtʋnna rɩ́rɩ́ tɔ́ɔ́ nɩɛ wuu daha.>>>