LƖƖ 6

1 Nyuutɩna Wɩɩsɛ bʋl pá Moyizi bʋlɛ́: <<Ɩ sɩ́sɛ́nyɛ sɩ́ ná wɩ́ɩ́ ná ŋ há sɩ́ pii a Faarɔŋ mɛ́. A tɩ́ŋɩ́ŋ vadóé mí, ʋ sɩ́ tá Ɩzɩrayɛl duo nɩɛ rɩ́wɔ́ col; a tɩŋ ɛ́ vadóé mí, ʋ sɩ́ kírwó ʋ tɔ́ɔ́ mɛ́.>>

Wɩɩsɛ mákʋ́ tɩɩ pá Moyizi

2 Wɩɩsɛ baa bʋl Moyizi rɩ́ a bʋlɛ́: << Ŋ nɛ́ ká Nyuutɩna Wɩɩsɛ. 3 Ŋ keníŋ tɩɩ ko nyɩɩsɛ Abɩrahaŋ mɛ́, a nyɩɩsɛ Ɩzakɛ mɛ́, a nyɩɩsɛ Zakɔbɛ mɛ́, a bʋlɩ́ŋ nɛ́ ká Wɩɩsɛ ná há ká dóé wuu tɩ́na; amá ŋ wɩ́ŋ yɩr Nyuutɩna Wɩɩsɛ ná é mákɛ́ pɔ́wɔ́. 4 Ŋ tá nʋɔ má pɔ́wɔ́ rɩ́ŋ pi Kanaŋ tíé pɔ́wɔ́, tɔ́ɔ́ ná mɛ́ ɓa fa há kéné anɛ nɩhʋ́ɔ́rá. 5 Ŋ sɩɛ́ nɛ́ Ɩzɩrayɛl duo nɩɛ hiĩne, Ezipiti nɩɛ háá bɛŋsɛ. Ɛ́ nɛ́ ŋ líísíŋ nʋtálɔ ŋ há tɛ́ɛ́ pɔ́wɔ́ wɩ́ɛ́. 6 Ɛ́ wɩ́ɛ́, bʋl pá Ɩzɩrayɛl nɩɛ bʋlɛ́ rɩ́ŋ sɛ́: <Ŋ nɛ́ ká Nyuutɩna Wɩɩsɛ, ŋ sɩ́ a rɩ́ɩ́wa hiẽsi Ezipiti tʋtʋ́ŋduoru mí, ŋ sɩ́ lɩ́sɩ́wa yomí ná mɛ́ ɓa há héíwa. Ŋ sɩ́ tɩ́ŋɩ́ŋ vadóé mí a bɛ́ŋsɩ́wɔ́ wérí ká lɛ́ɩ́wa tá. 7 Ŋ sɩ́ a rɩ́ɩ́wa áŋ nɩɛ, ká rɩ́ŋ má ɛ́ɩ́wa Wɩɩsɛ. Ɩ́ sɩ́ zɩŋ rɩ́ŋ nɛ́ ká Nyuutɩna Wɩɩsɛ, ɩ́ Wɩɩsɛ ná há ɛ́ɛ́ ɩ́ hiẽsi Ezipiti tʋtʋ́ŋduoru mí. 8 Ŋ sɩ́ a rɩ́ɩ́wa zʋ tɔ́ɔ́ ná ŋ há dé caasɛ tá nʋɔ a pii pá Abɩrahaŋ rɩ́ Ɩzakɛ arɩ́ Zakɔbɛ; ŋ sɩ́ púú pɛ́ɩ́wa rɩ́ɩ́wa tɩ́llʋ́. Ŋ é Nyuutɩna Wɩɩsɛ nɛ́ sɛ́.>>> 9 Moyizi ɓɩɛ́na bʋl ɛ́ a pá Ɩzɩrayɛl nɩɛ; amá a tɩ́ŋwɔ́ háá ná wɩɩla yomí ná sɩɛrʋ aá cel rɩ́wɔ́ lɛ, ɓa wɩ Moyizi zésé.

10 Nyuutɩna Wɩɩsɛ bʋl Moyizi rɩ́ a bʋlɛ́: 11 <<Mʋ́ bʋl Ezipiti kuóro Faarɔŋ rɩ́, rʋ́ʋ́ tá Ɩzɩrayɛl nɩɛ rɩ́wɔ́ lʋ́ʋ́ tɔ́ɔ́ mɛ́.>> 12 Moyizi cɛ́ Nyuutɩna Wɩɩsɛ sɩ́ɛ́ a bʋlɛ́: <<Ɩzɩrayɛl nɩɛ tɩɩ há wɩ́ŋ zésé, Faarɔŋ é ɛrɛ́ rɩ́ɩ́ zésíŋ, ŋ nʋɔ há wɩ bʋlɛ́ má tɩɩ ɛ̃.>> 13 Ɛ́ nɛ́ Nyuutɩna Wɩɩsɛ bʋl Moyizi rɩ́ Aarɔŋ rɩ́ a makɛ wɩ́ɛ́ ná Ɩzɩrayɛl nɩɛ rɩ́ Ezipiti kuóro Faarɔŋ há mɔhɛ̃́ rɩ́wɔ́ a, a lɩ́sɛ Ɩzɩrayɛl nɩɛ Ezipiti mí.

Moyizi rɩ́ Aarɔŋ duo nɩɛ

14 Ná Ɩzɩrayɛl nɩɛ jɩtɩ́náwa: Rubaŋ, Ɩzɩrayɛl bihɔ̃́, ʋ bɛlɛ nɛ́ ká: Ɩnɔkɛ, Palu, Hɛtɩsɩrɔŋ rɩ́ Karmi; ɓa nɛ́ ká Rubaŋ jɩmʋ́ʋ́la naabálwa. 15 Sɩmɩɔŋ bɛlɛ nɛ́ ká: Yɩmʋɛl, Yamiŋ, Ʋhadɛ, Yakiŋ rɩ́ Sʋharɛ, a sɩɛ́ pi Sayul, Kanaŋ tɩ́náwa toló bio; ɓa nɛ́ ká Sɩmɩɔŋ jɩmʋ́ʋ́la naabálwa. 16 Ná Levi bɛlɛ rɩ́wɔ́ duo nɩɛ há tʋ́kɛ́ ɛ́wa: Gɛrsɔŋ, Kɩhatɛ rɩ́ Merari. Levi dí tɔ́ɔ́ bɩŋsɛ zɔlɔ mɛrɛ́ rɩ́ fí rɩ́ balpɛ. 17 Gɛrsɔŋ bɛlɛ nɛ́ ká: Libini rɩ́ Siimeyi; ɓa nɛ́ káwɔ́ jɩmʋ́ʋ́la naabálwa. 18 Kɩhatɛ bɛlɛ nɛ́ ká: Amɩraŋ, Yitisehar, Ɩbɩrɔŋ rɩ́ Uziel. Kɩhatɛ dí tɔ́ɔ́ bɩŋsɛ zɔlɔ rɩ́ mɛrɛ́ rɩ́ fí rí botoro. 19 Merari bɛlɛ nɛ́ ká: Mahili rɩ́ Muusi. Levi jɩmʋ́ʋ́la naabálwa nɛ́ ɛ́ arɩ́wɔ́ tʋkɛ́wa.

20 Amɩraŋ jɔ́ʋ́ yálá Yɔkɛbɛdɛ, ʋ lʋl bɛlɛ bɛllɛ pɔ́ʋ́: Aarɔŋ rɩ́ Moyizi. Amɩraŋ dí tɔ́ɔ́ bɩŋsɛ zɔlɔ mɛrɛ́ rɩ́ fí rɩ́ balpɛ. 21 Yitisehar bɛlɛ nɛ́ ká: Kore, Nɛfɛgɛ rɩ́ Zikiri. 22 Uziel bɛlɛ nɛ́ ká: Mɩkayɛl, Ɛltɩsafaŋ rɩ́ Sitiri.

23 Aarɔŋ ja Eliseba, Amɩnadabɛ toló, Naasɔŋ nátoló; ʋ lʋl bɛlɛ pɔ́ʋ́: Nadabɛ, Abihu, Ɩlɩazarɛ rɩ́ Itamaarɛ.

24 Kore bɛlɛ nɛ́ ká: Asiir, Ɛlkana rɩ́ Abɩasafɛ; ɓa nɛ́ ká Kore jɩmʋ́ʋ́la naabálwa. 25 Aarɔŋ bio Ɩlɩazarɛ ja Pʋtɩɛl tolé nɔ́ŋɔ, ʋ lʋl bio pɔ́ʋ́: Fɩnɩyasɛ. Ɓa nyáŋ wuu ká Levi jɩmʋ́ʋ́la naabálwa nɛ́.

26 Aarɔŋ né arɩ́ Moyizi né rɩ́ nɛ́ Nyuutɩna Wɩɩsɛ sɛ́: <<Ɩ́ a rɩ́ Ɩzɩrayɛl nɩɛ hé lɛ́ɛ́ lɛ́ɛ́wa anɛ sóójiwa, a lɛ Ezipiti mí.>> 27 Moyizi rɩ́ Aarɔŋ, ɓa nɛ́ mʋ́ɛ́ bʋl Ezipiti kuóro Faarɔŋ rɩ́, rʋ́ʋ́ tá Ɩzɩrayɛl nɩɛ rɩ́wɔ́ lɛ Ezipiti mí.

Wɩɩsɛ báá mákɛ́ wɩ́ɛ́ ná Moyizi há mɔhɛ̃́ rʋ́ʋ́ a

28 Kal ná Nyuutɩna Wɩɩsɛ há bʋ́l Moyizi rɩ́ Ezipiti mí, 29 ʋ bʋ́lɔ́ pɔ́ʋ́ bʋlɛ́: <<Ŋ nɛ́ ká Nyuutɩna Wɩɩsɛ! Mʋ́ bʋl wɩ́ɛ́ ná wuu ŋ há bʋ́lɛ́ pɛ́ɩ́ a pá Ezipiti kuóro Faarɔŋ.>> 30 Ɛ́ nɛ́ Moyizi cɛ́ Nyuutɩna Wɩɩsɛ sɩ́ɛ́ a bʋlɛ́: <<Ná, ŋ nʋɔ wɩ wɩ́ɛ́ bʋlɛ́ ɛ̃. Faarɔŋ a ɛrɛ́ rɛ́ káá zésíŋ?>>