Wɩɩla córí
(8) Hʋɔ̃́yórówa
10
1 Nyuutɩna Wɩɩsɛ bʋl Moyizi rɩ́ bʋlɛ́: <<Mʋ́ Faarɔŋ rɩ́. Ŋ nɛ́ dúórú rɩ́rʋ́ tʋtʋnna baŋcɩllɛ, a makɛ rɩ́ŋ tʋŋ wɩ́nyɩnɛ ɓa sɩ́sɩ́ɛ́nʋ́wa, 2 ká rɩ́ɩ́ má cesi pɛ́ɩ́ bio a cesi pɛ́ɩ́ bio má bɛlɛ, ɛ́ ná ŋ há píé tʋŋ Ezipiti tɩ́náwa mɛ́, arɩ́ wɩ́nyɩnɛ ná ŋ há ɛ́ɛ́ ɓa tɔ́ɔ́ mɛ́. Ɩ́ sɩ́ tɩŋ ɛ́ mɛ́ a zɩŋ rɩ́ŋ nɛ́ ká Nyuutɩna Wɩɩsɛ.>> 3 Moyizi rɩ́ Aarɔŋ mʋ́ Faarɔŋ dɩhɩ̃́ a bʋl pɔ́ʋ́ bʋlɛ́: <<Nyuutɩna Wɩɩsɛ, Ebirewa Wɩɩsɛ sɛ́: <Ɩ ha sɩ́ bɩ́ɩ́lɛ rɩ́ɩ́ múúrí tɩɩ páŋ a kaá mʋ́ tɛ́ŋ beé? Lo ríŋ nɩɛ col, a makɛ rɩ́wɔ́ cʋ́cʋ́ɔ́lɩ́ŋ. 4 Rɩɩ nɛ́ ha vɛ́ɛ́ rɩ́ɩ́ táŋ nɩɛ rɩ́wɔ́ col, cíé wuu ŋ sɩ́ a rɩ́ hʋɔ̃́yórówa kóí tíé. 5 Ɓa sɩ́ tɔ́ tíé rʋ́ʋ́ sɩ́ nyɩ́ɩ́sʋ́. Ɓa sɩ́ dí óŋ ná wuu duódɔ́wʋ́ɔ́ há ŋmɛ́lɛ́ ká tá pɛ́ɩ́wa, a dí tuuni ná wuu há bɩ́rɛ́ aá tɔwɛ paarʋ gɩr mɛ́. 6 Ɓa sɩ́ zʋʋ súí jɩɩsɛ, a súí tʋtʋnna jɩɩsɛ, a sú Ezipiti tɩ́náwa wuu jɩɩsɛ. Ɩ ánáwa rɩ́rɩ́ naabálwa má tɩɩ ha wɩ ɛ́ wɩ́ɩ́ duo néé ná, ɓa tɔ́ɔ́ né mí mɩnɛ́ mɛ́ wuu, a ko aá lɛ zaa.>>>Ká Moyizi lɛ Faarɔŋ dɩhɩ̃́ a col. 7 Faarɔŋ tʋtʋnna bʋl Faarɔŋ rɩ́ bʋlɛ́: <<Báálɔ́ né á rʋ́ʋ́ a rɩ́ wɩɩlawa pérírá a kaá mʋ́ tɛ́ŋ beé rí? Lo rí ɛ́ nɩɛ col, rɩ́wɔ́ mʋ́ aá cʋɔlɛ Nyuutɩna Wɩɩsɛ, ɓa Wɩɩsɛ. Ɩ wɩ ɛ̃ rɩ́ Ezipiti zɔ́kɔ́ nɛ́ aá va ɛ́?>> 8 Ɓa yɩ́rɛ Moyizi rɩ́ Aarɔŋ ɓa bɩrko Faarɔŋ rɩ́, ʋ bʋl pɔ́wɔ́ bʋlɛ́: <<Ɩ́ mʋ́ aá cʋɔlɛ Nyuutɩna Wɩɩsɛ ɩ́ Wɩɩsɛ ná. Áŋwa rɩ́ɩ́ mʋ́ɛ́?>> 9 Moyizi sɛ́: <<Á wuu níí mʋ́ɛ́: heŋbiisi rɩ́ nɩhɩɛ̃́sɛ, báála rɩ́ háála, pʋwɩɛla rɩ́ pʋzeŋsi wuu, bee wɩ́ɛ́ á é rɩ́, ʋ ká Nyuutɩna Wɩɩsɛ caná rɛ́.>> 10 Faarɔŋ bʋl pɔ́wɔ́ bʋlɛ́: <<Rɩ́ Nyuutɩna Wɩɩsɛ mɩŋ arɩ́rɩ́wa! Ŋ sɩ́ tɛ́ɩ́wa rɩ́rɩ́wa jaa nɩɛ rɩ́ɩ́wa col. Ɩ́ pɔ́, ɩ́ɩ́ ja bɔ́ŋbɔ́ŋ tʋmɛ́ nɛ́. 11 Ɛ́ sɩɛ́ waá bil! Ɩ́ báála dʋŋɔ mʋ́ aá cʋɔlɛ Nyuutɩna Wɩɩsɛ, ɩ́ sʋ́l ɛ́ nɛ́.>> Ɓa de isi kírwó ɓa lɛ Faarɔŋ sɩ́ɛ́.
12 Ɛ́ nɛ́ Nyuutɩna Wɩɩsɛ bʋl Moyizi mí bʋlɛ́: <<Píí nɛ́sɛ tɛrɛ Ezipiti, a a rɩ́ hʋɔ̃́yórówa ko Ezipiti tíé, a dí nyɔ́ɔ́ ná wuu duódɔ́wʋ́ɔ́ há ŋmɛ́lɛ́ ká tá.>> 13 Moyizi kánʋ́ deŋtuke tɛrɛ Ezipiti, Nyuutɩna Wɩɩsɛ a poo de lú lɛ tɔ́ɔ́ mʋ́l ko, a lú Ezipiti mí tɔ́ɔ́ bíri, tɔ́ɔ́ pʋl. Cɩ́cʋɔ, rɩ tɔ́ɔ́ mʋ́l poo ná dé pa hʋɔ̃́yórówa ko. 14 Hʋɔ̃́yórówa ná de sú Ezipiti wuu a tɔ́ tíé wuu mí. Ɓa káŋ duo, nɩɛ há wʋ́ɔ́ néé ná, nɩɛ sɩɛ́ waá a rɩ́wɔ́ nówó ná cíé oro wuu. 15 Ɓa dé tɔ́ tíé wuu mí ní, tíé pii a ɓɩbínú, fírífírífírí. Ɓa dí tíé nyɔ́ɔ́ wuu rɩ́ tuuni nɔna ná wuu duódɔ́wʋ́ɔ́ há zɔ́kɛ́ ká tá. Palɔɔ balá má tɩɩ wɩ tuuni mí káánɛ́, a wɩ nyɔ́ɔ́ má mɛ́ káánɛ́ gɩr mɛ́, Ezipiti tɔ́ɔ́ wuu mí.
16 Ɓalaɓala rɩ Faarɔŋ ɔ́ɔ́ ɓa yɩ́rɛ Moyizi rɩ́ Aarɔŋ a bʋlɛ́: <<Ŋ ɔ́ɔ́ zɔkɛ Nyuutɩna Wɩɩsɛ, ɩ́ Wɩɩsɛ mɛ́, a aa zɔ́kɩ́wa má mɛ́! 17 Ŋ sɩɛ́ sʋ́lɩ́ rɩ́ɩ́ héŋ zɔkɛ́ suúri báá, a mɔ ŋ́né mí. Ɩ́ sʋl Nyuutɩna Wɩɩsɛ, ɩ́ Wɩɩsɛ rʋ́ʋ́ nyammɛ ká a rɩ́ sʋʋ́ né kɛ́kɩ́ŋ mɛ́.>> 18 Moyizi lɛ Faarɔŋ dɩhɩ̃́ a ŋmɔwɛ búŋse pá Nyuutɩna Wɩɩsɛ. 19 Nyuutɩna Wɩɩsɛ a poo lú lɛ tɔ́ɔ́ nyúú ko, a lú rɩ́ dóé kɩ́ŋkáŋ, a pa hʋɔ̃́yórówa ná kaa tuwi hé Zɔŋkɛwa mʋʋ sɩɛrʋ. Hʋɔ̃́ balá má tɩɩ wɩ Ezipiti tíé káánɛ́. 20 Amá Nyuutɩna Wɩɩsɛ dúóri Faarɔŋ baŋcɩla, ʋ wɩ Ɩzɩrayɛl nɩɛ tɛ́ɛ́ ɓa col.
Wɩɩla nɛ́mɛ́
(9) Bíno
21 Nyuutɩna Wɩɩsɛ bʋl Moyizi rɩ́ bʋlɛ́: <<Kánɩ́ nɛ́sɛ tɛrɛ bána rɩ́, rɩ́ bíno zʋ Ezipiti, bíno ná há sɩ́ zuki rɩ́wɔ́ wóllú mí aá tɩkɛ.>> 22 Moyizi kánʋ́ nɛ́sɛ tɛrɛ bána rɩ́; bíno ɓɩzeno de zʋ Ezipiti tɔ́ɔ́ wuu, a dáánɛ tápʋlɛ botoro. 23 Nɛrɔ wuu wʋ́ʋ́ nɔ́ŋɔ ná, nɛ́ŋ wuu wɩ naa ɓɔ́ɛ́, nɛrɔ wuu dé kénú dɩkéni ní tápʋlɛ botoro. Amá Ɩzɩrayɛl nɩɛ dɩmɩnɩ́ é wuu fa kéŋ pʋmmɔ.
24 Faarɔŋ yɩ́rɛ Moyizi a bʋlɛ́: <<Ɩ́ mʋ́ aá cʋɔlɛ Nyuutɩna Wɩɩsɛ. Ɩ́ pʋwɩɛla rɩ́rɩ́wa pʋzeŋsi dʋŋɔ nɛ́ rɩ́ɩ́wa tá rɛɛ́wa, ɩ́ rɩ́rɩ́wa jaa nɩɛ wúóló aá col.>> 25 Moyizi sɛ́: <<Ɩ tɩɩ nɩ́ɩ́ á rɩ́ɩ́ ja pʋsɛ párá ráá kaa ɔsɛ vʋka a físi náŋa pá Nyuutɩna Wɩɩsɛ, á Wɩɩsɛ? 26 Á rɩ́rá pʋsɛ wuu níí mʋ́ɛ́, nacɩkɩ́ má waá káánɛ. Ɓa sɩɛrʋ nɛ́ áá rá lɩ́sɛ a ɓʋ́ʋ́sɛ ɔsɛ vʋk pá Nyuutɩna Wɩɩsɛ á Wɩɩsɛ. Á tɩɩ ha wʋ́ɔ́ ná á háá rá lɩ́sɛ ɓʋ́ʋ́sɛ pá Nyuutɩna Wɩɩsɛ ɛ̃, raá nɛ́ wɩ ráŋ péré.>> 27 Nyuutɩna Wɩɩsɛ dúóri Faarɔŋ baŋcɩla, ʋ wɩ có rʋʋ táwɔ́ rɩ́wɔ́ col. 28 Faarɔŋ bʋl Moyizi rɩ́ bʋlɛ́: <<Lɩ́ŋ jaa mɛ́! Pɔ́ rɩ́ɩ́ báá sɩ́ŋ sɩ́ɛ́ kó. Rɩɩ báá kóŋ sɩ́ɛ́, ɛ́ kal, ɩɩ́ sʋ́wʋ́ nɛ́!>> 29 Moyizi sɛ́: <<Anɛ ɛ́ ɩ há bʋ́lɛ́, ŋ má báá wɩ́ɩ́ sɩ́ɛ́ ko.>>