Og Bogu nog Langit bug Lupaꞌ
21
Doksuꞌ nituꞌ mitongowu og bogu nog langit bug bogu nog ginlupaan,
poꞌ mibolong na og dan nog langit bug dan nog ginlupaan,
bu daꞌdun na og dagat.a
2 Bu mitongowu sop ok siyudad sutsi,
yonin na og bogu Jerusalem nok piponog nok Tuhan tidu sok surgaꞌ.
Pidinsamaꞌ koyon mamaꞌ nok pongantim libun nok pilingkatan para sok pongantim laki.
3 Bu midongogu ong mopagas nok tingog tidu sok trunu,
taluꞌ in,
“Na tontong niyu,
moksolobuk na ok pogonongan nok Tuhan bug mga manusiyaꞌ.
Dituꞌ na yanin mogonong dinilon,
bu ilon ok piktowanin.
Sumolobuk ok Tuhan dinilon,
bu yanin ok Tuhan nilon.
4 Punasanin ok kotanan nog luwaꞌ nilon,
bu daꞌdun na ok kopatoy.
Daꞌdun na sop ok susahan bug gaduy,
bu daꞌdun na ong mokonanam nok sakit poꞌ ok kotanan koyon mibolong na.”b
5 Doksuꞌ miktaluꞌ ong migingkud kituꞌ sok trunu nin,
longin,
“Ponginongog amu,
boguhon ku na kotanan!”
Bu miktaluꞌ pa yanin,
“Sulat nu poꞌ kopongandolan bu sobonnal ong mga taluꞌ kini.”
6 Taluꞌ in pa dinakon,
“Midoksuꞌ na ok kotanan!
Akon ong Muna bu og Binayaꞌc,
ok Tolipunan bu ok Kodoksuan.
Sima-sima ok kinuwow,
akon ong mogbogoy diyanin nok tubig tidu sok tobud nong mokobogoy nong mosannang nok kotubuꞌ solama-lama,
bu daꞌdun og bayadin.
7 Sima-sima ong momondag sok poksuloy,
pusakaan ku yanin nog lam nini.
Akon ok Tuhanin,
bu yanin og bataꞌ u.
8 Sugaid ong mga mokotalow da nok tow ok tinumolikud dinakon,
bu sosuku nog daꞌ tombaꞌ,
mga polomunuꞌ,
polojina bu duma nong monginang nong mokolomuꞌ-lomuꞌ,
mga poloinang-inang,
polosumba sok tuhan-tuhan,
bu kotanan nong mokoloput,
na dituꞌ ilon pogonong solama-lama sog linow nog gapuy taga asupri,
nog yonin na og ikoduwaꞌ nok kopatoy.”
Og Bogu Jerusalem
9 Doksuꞌ nituꞌ mikpolani dinakon ok solobuk tidu sok pitu buk malaikat nog bakas migbunag nog binayaꞌ nok pituꞌ ginis nog balaꞌ sog dunya tidu sok ponaksan nilon,
taluꞌ in,
“Angoya dini poꞌ potongowon ku dinika ok pongantim libun ok poglibunon nog Bataꞌ Bilibili.”
10 Sododuun sinolodu nog Ruh nok Tuhan,
bu inoyitu nong malaikat sog dibabow nog landuꞌ kolawa nog bontud bangka nin potongowoy dinakon og Jerusalem,
ok sutsi nok siyudad nok piponog sok surgaꞌ tidu sok Tuhan.
11 Miksahaya ok siyudad koyon tidu sok kowasa bug kotas nok Tuhan,
bu mosilow mamaꞌ nong mohalgaꞌ nok kumalaꞌ iningalanan nog yasper nong motinow mamaꞌ nok solamin.
12 Og galad nok siyudad koyon landuꞌ kotas bu modikpol,
bu ongon ok sopuluꞌ bu duwaꞌ nog bongowanin nog binantoyan nok sopuluꞌ bu duwaꞌ malaikat.
Diyon song mga bongowan koyon,
misulat ok sopuluꞌ bu duwaꞌ ngalan nog gumbataꞌ ni Yaꞌkub nong miimung nog bangsa Israel.
13 Mibotang ok tolu buk nong mga bongowan koyon sog dapit silangan,
bu ok tolu buk sog dapit sindopan,
bu totolubuk da sop sok pigimpangan nok kilidanin.
14 Na ok piindogan nog galad sok koliwagan nok siyudad koyon,
ok sopuluꞌ bu duwaꞌ buk batu mosolag.
Diyon mikosulat ong mga ngalan nok sopuluꞌ bu duwaꞌ kotow mokpoposampoy kituꞌ nog Bataꞌ Bilibilid.
15 Na ong malaikat nog bakas miktaluꞌ dinakon,
migoyit nog bulawan nok sukudan bagun mosukudin ok siyudad koyon,
og galadin bug mga bongowanin.
16 Dadi sinukud nong malaikat ok siyudad koyon.
Og liwag nok siyudad koyon migbalang,
migbatuk da og yabaꞌ bug lokpangin.
Og yabaꞌ in duwaꞌ ngibu bu pat gatus kilumitru,
bu batuk da sop og lokpangin bug lawa nin.
17 Tubus sinukud da sop nong malaikat og galadin.
Mosaut koyon nok pat puluꞌ dopa labi mounut sok poksukudan nong manusiyaꞌ nog batuk da sog ginamit nong malaikat.
18 Og galadin kini inimung tidu song mohalgaꞌ nog batu kumalaꞌ ngalanin yasper.
Bu ok siyudad inimung tidu sog lunsan bulawan bu motinow mamaꞌ na nok solamin.
19 Ok sopuluꞌ bu duwaꞌ buk batu kituꞌ nok piindogan nog galad,
pingari-ngarihan nog ginis-ginisan mokohalgaꞌ nog batu kumalaꞌ.
Ong mikuna nog batu pingari-ngarihan nok kumalaꞌ yasper,
og ikoduwaꞌ pingari-ngariahan nok kumalaꞌ bilu,
og ikotolu kumalaꞌ kalkidune,
bu og ikopat,
kumalaꞌ gaddung.f
20 Tubus og ikolima nog batu pingari-ngarihan nok kumalaꞌ miksagot og warnaꞌ in nok pula bug dalag,
og ikonom pula,
og ikopitu dalag,
bu og ikowalu pingari-ngarihan nok kumalaꞌ gaddung taga baglis-baglis.
Doksuꞌ og ikosiyam nog batu pingari-ngarihan nok kumalaꞌ iningalanan topas,
og ikosopuluꞌ,
og warnaꞌ in gaddung nong molasow.
Tubus og ikosopuluꞌ bu sala nog batu pingari-ngarihan nok kumalaꞌ,
og warnaꞌ in bilu molutuꞌ,
bu og ikosopuluꞌ bu duwaꞌ,
yonin na og bayulet.g
21 Na ok sopuluꞌ bu duwaꞌ bongowan nog galad koyon polanan perlas.
Kada bongowan,
solobuk landuꞌ kosolag nok perlasin.
Og dalan sok siyudad koyon lunsan bulawan,
bu motinow bu motilak mamaꞌ nok solamin.
22 Daꞌdun ong mitongowu sok siyudad koyon nog baloy poksumbahan pasal dituꞌ na ok Tuhan Pogbayaꞌ-bayaꞌ nong Mokowasa bu og Bataꞌ Bilibili.
23 Sok siyudad koyon diꞌ nilon na kolagihan og dolag nog gondow bug bulan,
poꞌ pisahayahan ok koliwaganin nok silow nok kotas nok Tuhan,
bu og Bataꞌ Bilibili og dolagin.
24 Mogonong og lam nok kobangsa-bangsahan sog dunya sok sahaya koyon,
bu oyiton nong mga sultan ong mga daya bug kotas nilon sog diyalom nok siyudad koyon.
25 Lolayun mobukaꞌ ong mga bongowan sog galad nok siyudad koyon poꞌ diꞌ na moglogobi.
26 Ong mga manusiyaꞌ oyiton nilon dituꞌ ok kolingkat,
daya bug kotas nong mga kobangsa-bangsahan nilon.
27 Sugaid daꞌdun solama-lama ong mokosolod sok siyudad koyon nok kanaꞌ mosutsi atawa ong monginang nong mokosipog atawa moloput.
Ok posolodon tibuwa sok siyudad koyon yonin da ong mga tow nong misulat ong mga ngalan nilon sog diyalom nok Kitab Kotubuꞌ,
nog yonin na ok Kitab nog Bataꞌ Bilibili.