Ok Songibu Tahun
20
Doksuꞌ nituꞌ ongon na sop ong malaikat mitongowu minonog tidu sok surgaꞌ.
Mikketeng yanin nok kunsiꞌ sog luwang nog diꞌ motokkad og dalomin,
bu migoyit yanin nong mosolag nok kodina.
2-3 Sinaggowin og dragun nog yonin na ong mamak song masa tagnaꞌ kituꞌ,
og iningalanan nog Iblis bug kounutan nong mga soytan.
Inikotan yanin nong malaikat bangka tikpuoy sog luwang nog diꞌ tokodoy motokkad kituꞌ.
Tubus tinambolanin og dragun bangka nin kunsioy bu binotangin ok tatak nok tambol koyon gantaꞌ pogindanan bagun diꞌ na mokopongakkal og dragun song manusiyaꞌ sog bon nok songibu tahun.
Bilaꞌ modopot na ok songibu tahun,
sumboy boluyon na yanin,
sugaid song mopolok da nog waktu.
4 Pokpuwas nituꞌ mikotongowu na sop nong mga trunu,
bu ong mga mingingkud dun binogoyan nok kowasa monghukum.
Tubus mitongowu ong mga nyawa nong mga tow kituꞌ nok pimutukan nog gulu kobalan sok pokpomotud nilon sok pononduꞌ ni Isa bu sok Parman nok Tuhan.
Ondaꞌ ilon sibon sumba sok sottuwa kituꞌ atawa sog barhalaꞌ in,
bu ondaꞌ kotatak ong ngalanin sog buna atawa sok komot nilon.
Mitubuꞌ ilon mokpuliꞌ bangka ilon ampuꞌ mogbayaꞌ sog Al-Masih sog bon nok songibu tahun.
5 Yonin kini ok tinawag nok ponognaan nok pokpotubuꞌ puliꞌ nok Tuhan song mga minatoy.
Og duma manusiyaꞌ nong minatoy,
ondaꞌ pa potubuoy nok Tuhan taman song modoksuꞌ na ok songibu tahun kituꞌ.
6 Mobarakat bu sutsi ong mga tow nong misunuꞌ sok ponognaan nok pokpotubuꞌ puliꞌ kini.
Ondiꞌ ilon mosugat nog ikoduwaꞌ nok kopatoy nog yonin na ok siksaꞌ solama-lama.
Moimung ilon nong mga gimam moktotolagad sok Tuhan bug Al-Masih,
bu mampuꞌ ilon mogbayaꞌ dunut diyanin sog bon nok songibu tahun.
Ok Pogdinag nog Iblis
7 Pogdoksuꞌ nok songibu tahun,
poluwason na og Iblis sog diyalom nok pirisuhanin.
8 Lumuwas na yanin mongakkal song mga manusiyaꞌ ayin-ayin sog liwag nog dunya.
Poglumpukonin ilon posunguꞌ sok pogbunuan.
Og dakol nok tow nong milimudin mamaꞌ sopantun nok pontad nog dagat bu tinawag ong mga banta nok Tuhan kini nog Gog bug Magoga.
9 Dadi mipanow ilon tidu sog liwag nog dunya bangka nilon libutoy ong mga tow sukuꞌ nok Tuhan sok siyudad nok kolasahan kituꞌ.
Sugaid pidupian ilon nog gapuy tidu sog langit bangka ilon kotipot pomatoy.
10 Bu og Iblis nong mingakkal dinilon,
pinilak sog linow nog gapuy nok taga asupri bug ayin bakas pinilak ok sottuwa bu og baluꞌ-baluꞌ nabi kituꞌ.
Dituꞌ ilon siksaon gobi-gondow nog daꞌdun ok kodoksuanin.
Og Gondow Poghukum
11 Doksuꞌ nituꞌ mikotongowu na sop nong mosolag nok trunu nok putiꞌ,
bu ongon ong miningkud dun.
Sokadjap da mibolong og lupaꞌ bu langit sog gadapanin,
bu daꞌ na kotongow mokpuliꞌ.
12-13 Mitongowu na sop ok kotanan nog bakas minatoy,
mga motas bu mobabaꞌ nok tow.
Og lam nong minatoy kituꞌ bisan sog dagat atawa sog lupaꞌ,
yonin na ong mga tidu sok poglihanan nong mga minatoy,
dituꞌ ilon minindog sog gadapan nok trunu koyon.
Tubus binukaꞌ ong mga kitab,
bu mibukaꞌ da sop ok Kitab Kotubuꞌ bug ayin sinulat ong mga ngalan nong mga mosurgaꞌ.
Doksuꞌ hinukuman ok kotanan nong mga minatoy tidu sog ginang nilon nong misulat song mga kitab kituꞌ.b
14-15 Sugaid ong mga tow nog daꞌ kosulat ong mga ngalan nilon sok Kitab Kotubuꞌ,
pilakon na ilon sog linow nog gapuy.
Ok siksaꞌ nog daꞌdun ok kodoksuanin sog linow nog gapuy,
yonin na og ikoduwaꞌ nok kopatoy.
Tubus nituꞌ ok kopatoy bu ok poglihanan nong mga minatoy pilakon da sop sog linow nog gapuy.c
Dadi daꞌdun na ok kopatoy.