Ok Pokpudji sok Surgaꞌ
19
Pogdoksuꞌ niyon midongogu og landuꞌ kopagas nok tingog nok tumpukan nong modakol tokodoy nok tow sok surgaꞌ,
taluꞌ nilon,
“Pudjihon ta ok Tuhan!
Yanin ong mokopogawon dinita song mga kodusahan ta.
Daꞌdun ong mokobatuk sok kotasin
bu landuꞌ kosolag ok kowasa nin.
2 Pudjihon ta yanin poꞌ sobonnal bu mologdong ong mga hukumanin.
Binotanganin nog hukuman ok siyudad nog Babilon,
ong mipononggiꞌ song mibantug nog libun bayadan kituꞌ,
poꞌ pisimoyin ong mga manusiyaꞌ sog liwag nog dunya
biyan song mga pinginangin nong mokosipog-sipog.
Siniksaꞌ yanin nok Tuhan
pasal sog duguꞌ nog binuyus sok kopatoy nong mga guliponin.”
3 Doksuꞌ miktaluꞌ ilon mokpuliꞌ nong mopagas,
“Pudjihon ta ok Tuhan!
Og bol nong mibantug nok siyudad koyon nok tinutung,
daꞌdun ok kodoksuanin.”
4 Sododuun sinumudjud og duwaꞌ puluꞌ bu pat migmokogulang koyon bug pat buk piongon koyon,
bangka pudjihoy ok Tuhan diyon sok trunu nin,
taluꞌ nilon,
“Amin,
pudjihon ta ok Tuhan!”
Ok Pogjamu sok Surgaꞌ mamaꞌ sopantun nok Kawing nog Bataꞌ Bilibili
5 Ongon na sop ong mopagas nok tingog nong midongogu tidu sog lambul trunu nok Tuhan,
taluꞌ in,
“Pudji niyu ok Tuhan ta,
amu kotanan nong mga guliponin,
mobeteꞌ bu mosolag.
Og lam nong migogondok diyanin,
pudji niyu ok Tuhan!”
6 Puwas nituꞌ mikodongogu na sop nok tingog nog landuꞌ kodakol nok tow mamaꞌ sopantun nog bosoy nog landuꞌ kopagas og logosin bug tonug nong mosolag nog lugung,
taluꞌ nilon,
“Pudjihon ta ok Tuhan
poꞌ yanin ok Pogbayaꞌ-bayaꞌ,
ong Mokowasa nong mimorinta sok kotanan.
7 Mogloliyag tokodoy ita niyu,
bu pudjihon bu potason ta yanin
poꞌ matong na posunguꞌ ok kawing nog Bataꞌ Bilibili,
bu mitogama na ok pongantim libun nog yonin na ong mga sukuꞌ in.
8 Pisolugan ok pongantim libun nog landuꞌ koputiꞌ nog abaya,
mosilow bu molissin.”a
Na ong maana nong moputiꞌ nog abaya kini,
yonin na ong mokologdong nog ginang nong mga tow sukuꞌ nok Tuhan.
9 Doksuꞌ miktaluꞌ ong malaikat dinakon,
longin,
“Sulat nu ok taluꞌ u kini.
Mobarakat ong mga tow nog inonggat sog jamu nok kawing nog Bataꞌ Bilibili.”
Bu tinaluꞌ in pa,
“Mosobonnal kini ong mga taluꞌ nok Tuhan.”
10 Pogdoksuꞌ moktaluꞌ nong malaikat,
sinumudjudu sog gadapanin poꞌ sumbahon ku bosiya yanin,
sugaid pigbinaanin akon,
taluꞌ in “Diꞌ nu akon sumbahon,
poꞌ batuk ita da gulipon nok Tuhan mamaꞌ dinika bug mga koilugan nu sok kotombaꞌ nong mokpomotud nok pinonduꞌ ni Isa Al-Masih.
Ok Tuhan ok sumbahon nu,
poꞌ ok sobonnal nok pononduꞌ nok pisampoy ni Isa Al-Masih,
yonin da sop ok Parman nok pisampoy nong mga konabihan biyan sog Ruh nok Tuhan.”
Ong Monghuhukum nong Mingudaꞌ sok Kudaꞌ Puti
11 Tubus nituꞌ sunoy pa mitongowu nong mibukaꞌ ok surgaꞌ,
bu ongon dituꞌ ong moputiꞌ nok kudaꞌ.
Ong mingudaꞌ dun iningalanan nong Moliunungoyb bu ok Kosobonnalan.
Mologdong og hukumanin,
bu biyan sok kologdongan mongatu yanin song mga banta nin.
12 Ong mata nin mamaꞌ nog ligaꞌ nog gapuy,
bu modakol ok kuruna sog gulu nin.
Bu ongon ong ngalan nong misulat diyon diyanin nog yanin da ong mokokosun dun.
13 Og juba nin binasaꞌ nog duguꞌc,
bu ong ngalanin,
“Parman nok Tuhan.”
14 Migunut sog binayaanin ong mga kosundaluhan sok surgaꞌd.
Sinumakoy ilon nok kudaꞌ nok putiꞌ,
bu mimonapot ilon nog landuꞌ koputiꞌ bu kolissin.
15 Na og iningalanan nok Parman nok Tuhan kituꞌ,
ongon linumuwas sog babaꞌ in nog landuꞌ kokutong nok kalise,
yonin na ok pongatu nin song mga kobangsa-bangsahan.
Mogbayaꞌ yanin dinilon biyan sok kowasa nin nong mamaꞌ hantang tungkod bosi,
bu pinanamin dinilon og lingit bug mulkaꞌ nok Tuhan mamaꞌ sopantun nog logekonin og anggul sok poglogekan nok Tuhan Mokowasa.
16 Ongon ok sinulat nong ngalan sog juba nin bu sok pa nin,
yonin na,
“Ok Sultan nong motas sok kotanan nok sultan,
bu ok Pogbayaꞌ-bayaꞌ nong motas sok kotanan nong mogbayaꞌ.”
17 Doksuꞌ mitongowu ong malaikat minindog dituꞌ song mata gondow.
Migekes yanin sog lam nok komanuk-manukan nong miglayug-layug,
taluꞌ in,
“Poglumpuk amu dini song mosolag nok pogjamu nok pidinsamaꞌ nok Tuhan.f
18 Tukpa amu dini bagun niyu mokan og gungod nong mga kosultanan,
kounutan,
mga mopagas mogbunuꞌ,
mga kudaꞌ bug mga mingudaꞌ dun,
og gungod nong modakol nok tow,
mga gulipon bug kanaꞌ gulipon,
motas bu mobabaꞌ.”
19 Dadi mitongowu ok sottuwa bug mga kosultanan sog dunya bug mga kosundaluhan nilon.
Miglumpuk-lumpuk na ilon bagun mogbunuꞌ song mingudaꞌ kituꞌ song moputiꞌ nok kudaꞌ bug mga kosundaluhanin.
20 Na misaggow ok sottuwa bu og baluꞌ-baluꞌ nabi nong minginang nong mokosobuꞌ-sobuꞌ nog gindanan sog gadapan nok sottuwa kituꞌ.
Biyan song mga pinginangin,
kiakkalanin ok kotanan nok tow nok tinatakan nong ngalan nok sottuwa bu sinumumba sog barhalaꞌ in kituꞌ.
Dadi pinilak nok totubuꞌ ok sottuwa bug baluꞌ-baluꞌ nabi kituꞌ sog linow nog gapuy nok taga asupri.
21 Ok kotanan nong mga kodumahan nilon pinatoy biyan song mokutong nok kalis nog linumuwas sog babaꞌ nong mingudaꞌ kituꞌ sok putiꞌ nok kudaꞌ.
Kinan nong mga komanuk-manukan og gungod nilon toktob kiduhulan ilon tokodoy dun.