Ok Poglubuꞌ nok Siyudad nog Babilon
18
Pogdoksuꞌ nituꞌ mikotongowu na sop nog len malaikat minonog tidu sok surgaꞌ.
Taga kopatut yanin nong mosolag,
bu kidolagan og dunya nok sahaya nin.
2 Migekes yanin nong mopagas,
taluꞌ in,
“Milubu na,
milubu na ong mibantug nok siyudad nog Babilon.
Miimung na og Babilon nok pogonongan bug poksolobunihan nong mga soytan bug poglokuhan nong mga manuk-manuk bug mga binatang nong mokoliksok bug haram kanon.
3 Mikobiyan kini sog Babilon pasal mioyit nok kounutanin ong mga kobangsa-bangsahan minginang nong mokolomuꞌ,
mamaꞌ sopantun nong mokolangu nok piinum song mga tow bu ok kodoksuanin ok kosiksaan.
Ong mga kosultanan sog dunya migdogiling sog Babilon monginang nong mokosipog-sipog dunut diyanin.
Bu ong mga mogdodagang sog dunya,
mikkodayahan pasal sok pokpoduhulin nok pogulaꞌ-ulaꞌ nong napsu nin.”
4 Ongon na sop midongogu nok tingog tidu sog langit,
taluꞌ in,
“Amu mga piktowan ku,
luwas amu sok siyudad koyon,a
bagun diꞌ amu moampuꞌ sok kodusahan nong mga tow sok siyudad koyon bu sok kosiksaan nok podatongon ku diyon.
5 Poꞌ migbangkat-bangkat na ong mga dusa nok siyudad koyon,
og dakolin misaut na sog langit,
bu diꞌ na pobiyanon nok Tuhan og ginang diyon nong molaat.
6 Sumboy inangon sok siyudad Babilon og ininang nok siyudad kini
bu tumbasan mokoduwaꞌ kaliꞌ.
Sumboy sulian og bisa mokoduwaꞌ kaliꞌ nok pinanam nog Babilon song mga duma nok tow.
7 Sumboy bogoyon sok siyudad kini ok kobinsanaan bu kosusahan batuk sok pogbantugin sog ginawa-baranin bu sok pokpoduhulin nok pogulaꞌ-ulaꞌ nong napsu ninb.
Poꞌ ok siyudad kini mamaꞌ sopantun nog libun moabbu,
migdiyamatoy yanin,
‘Akon ong mokowasa nog libun.
Kanaꞌ u og balu,
bu ondiꞌ u dodaꞌ mokonanam nok kosusahan.’c
8 Saan na matong sog Babilon sok solod nok sondow
ong miglologinis nog balaꞌ,
ok kosusahan,
gunus bug kopatoy.
Pogdoksuꞌ niyon tutungon ok siyudad koyon sog gapuy
poꞌ mokowasa ok Tuhan nog humukum song mga migonong diyon.”
9 Ong mga kosultanan sog dunya nong migunut sog Babilon mongjina bu mokpoduhul sok pogulaꞌ-ulaꞌ nong napsu nilon,
mogaduy bu mokkorukkaan ilon bilaꞌ motongow na nilon og bol tidu sok siyudad koyon.
10 Dituꞌ ilon sok kolayuan miktontong pasal sog gondok nilon sog landuꞌ nok kosiksaan nong misugat sok siyudad koyon,
bu taluꞌ nilon,
“Anduꞌ,
mokondok-ondok ong misugat song mibantug bu mokowasa nok siyudad nog Babilon koyon.
Sododuun dinatongan ka nog hukuman nok Tuhan.”
11 Migaduy bu mikkorukkaan ong mga mogdodagang sog dunya,
poꞌ daꞌdun na ok sumaluy nong mga dagangan nilon.
12 Yonin na mga bulawan,
silber,
kumalaꞌ,
mga perlas nong mokohalgaꞌ,
mga kokanaꞌ nong mokolingkat og warnaꞌ in putiꞌ,
bayulet bug pula,
sampoy kokanaꞌ sutlaꞌ.
Daꞌdun na sop ok sumaluy nog bangkil nog gadja,
ginisan nok kayu momut bu kotanan nog gimu tidu sok kayu nong mokohalgaꞌ,
bug mga gimu nok tumbaga,
bosi bug mga batu marbul.
13 Bu daꞌdun na sop ong mokosaluy nog ginisan nok palapala,
komanyan,
lana bug litaꞌ momut,
tubig anggul bug lana jaytun,
ginisan nok tirigu,
atawa bisan mga sapiꞌ,
bilibili,
kudaꞌ bug korumata sampoy mga tow gulipon.
14 Dadi miktaluꞌ ong mga mogdodagang,
long nilon,
“Anduꞌ Babilon,
miawaꞌ na dinika ok kotanan nok konapsuhan nu.
Og lam nok kodaya bug kolingkatan nu,
mibolong na bu ondiꞌ na motongow mokpuliꞌ.”
15 Ong mga mogdodagang nong mikohampit nok kodayahan sok siyudad koyon,
dituꞌ ilon sok kolayuan miktontong pasal sog gondok nilon sog landuꞌ nok kosiksaan nong misugat sok siyudad koyon.
Mogaduy bu mokkorukkaan ilon.
16 Bu taluꞌ nilon,
“Anduꞌ,
mokololat-lolat ong misugat song mibantug nok siyudad koyon.
Og lingkatin,
mamaꞌ nog libun mimonapot nok putiꞌ,
pula bug taluk bu milokop nok pomulawan bu mokohalgaꞌ nong mga kumalaꞌ bug perlas.”
17 Sododuun mibolong og landuꞌ kodakol nok pongartaꞌ nok siyudad koyon.
Ok kotanan nong mga mogoyit nok kappal bug mga mogoginang sok kappal,
og lam nok sinumakoy dun,
bu ong mga mingandol nok kotubuꞌ-tubuan nilon sog dagat,
dituꞌ ilon sok kolayuan miktontong sok siyudad nog Babilon.
18 Poktontong nilon nog bol song mitutung nok siyudad koyon,
tinaluꞌ nilon,
“Anduꞌ,
daꞌdun na muwal ok siyudad nong mibantug mamaꞌ kobantug nok siyudad kini.”
19 Migaduy bu mikkorukkaan ilon dunut poksibwag nog bogombun sog guluꞌd nilon bangka pogekes,
“Anduꞌ-anduꞌ,
mokololat-lolat ong mibantug nok siyudad koyon.
Pasal sok kodakol nok kogunahanin nog gartaꞌ,
migdaya ok kotanan nok tow taga kappal.
Sododuun da milubu ok siyudad koyon.”
20 Doksuꞌ ongon puliꞌ ok tingog miktaluꞌ,
longin,
“Amu diyon sok surgaꞌ,
pogloliyag amu pasal song misugat sog Babilon.
Amu sooy mga konabihan,
mga mokpoposampoy,
mga tow sukuꞌ nok Tuhan,
pogloliyag amu poꞌ tinumbasan na nok Tuhan ong mga tow diyon sok kolaatan nok pinginang nilon diniyu.”
21 Puwas nituꞌ ongon ok solobuk mopagas nong malaikat ong mitongowu nong minalap nog landuꞌ kosolag nog batu bangka nin tibagoy sog dagat.
Miktaluꞌ yanin,
“Mamaꞌ sopantun nok kopilaku nog batu kini,
motokkow ok kopapas nong mibantug nok siyudad nog Babilon,
bu diꞌ na tokodoy motongow.
22 Diꞌ na puliꞌ modongog dituꞌ ok tingog nong mga mokpotukar nog biyulla,
suling bug tombuli bu mga polokolangan.
Daꞌdun na tokodoy og gonek nong mga pandoy nog baloy bug mga polononsal,
bu diꞌ na modongog ok tingog nog gilingan.
23 Daꞌdun na sop og ligaꞌ nok tiyow nong motongow sok siyudad koyon.
Bu daꞌdun na tokodoy ong modongog nok poglami-lami nok pongantim laki bug libun.
Pinapas nok Tuhan ok siyudad nog Babilon kituꞌ poꞌ landuꞌ koabbu ong mga mogdodagang diyon,
bu inakkalan nilon ong mga tow sog lam nok kobangsa-bangsahan pasal sok ponginang-inang nong mga tow Babilon.
24 Siniksaꞌ ok siyudad nog Babilon,
poꞌ mitongow diyon og duguꞌ nong mga konabihan bug mga tow sukuꞌ nok Tuhan,
sampoy ok kotanan nok pimatoy sog dunya.”