Ok Siyudad nog Babilon Mipononggiꞌ sog Libun Bayadan
17
Puwas nituꞌ ongon ok solobuk sok pituꞌ buk malaikat kituꞌ nong migoyit nok pitu buk ponaksan minangoy dinakon,
taluꞌ in,
“Angoya dini,
potongowon ku dinika og hukuman song mibantug nog libun bayadan nong migonong song mga kosubaꞌ-subaan.
2 Ong mga kosultanan sog dunya migdogiling monginang nong mokosipog-sipog dunut sog libun kini,
bu mioyit ong mga tow sog dunya sog ginangin molaat.
Mamaꞌ ilon hantang milangu nog daꞌdun ok sipog nilon monginang nok kolaatan.”
3 Sododuun sinolodu nog Ruh nok Tuhan bu inoyitu nong malaikat sok talunan.
Dituꞌ u mitongow ok solobuk libun sinumakoy sok sottuwa pula.
Ok sottuwa kini,
pitu buk gulu nin bu sopuluꞌ buk sungagin,
bu milokop diyanin ong mga ngalan pogunda-unda sok Tuhan.
4 Og libun kini mimonapot nog bayuleta bug pula bu milokop nok pomulawan bu mokohalgaꞌ nong mga kumalaꞌ bug perlas.
Migonggayd yanin nok tasa nog bulawan nong miponuꞌ nog ginumon mokolangu nong migmaana nong mga mokosipog-sipog bug mokutaꞌ-utaꞌ nok kokohinang,
og bunga nok pogjina nin.
5 Ongon mikotatak sog buna nin nog daꞌ pa potampaloy ong maana nin,
yonin na,
Ong mibantug nog Babilon,
ok piktiduhan nong mga libun bayadan bug mga mokutaꞌ-utaꞌ nok kokohinang sog dunya.
6 Bu mitongowu nong mamaꞌ nong milangu og libun kini dangan mibuyus og duguꞌ nong mga tow sukuꞌ nok Tuhan.
Loliyagon tokodoy yanin nong momatoy ong mga saksiꞌ ni Isa.
Poktontongu sog libun kini,
misobuꞌ u tokodoy.
7 Sinakan ku nong malaikat,
taluꞌ in,
“Manu misobuꞌ a ma?
Suksugon ku dinika ong mibuni nong maana nog libun kini bu ok sottuwa nok sinakoyanin nok taga pitu buk gulu bu sopuluꞌ buk ok sungagin.”
8 Ok sottuwa nong mitongow nu kituꞌ koyna,
ongon na yanin song masa nituꞌ,
sugaid daꞌdun na ningkomun.
Tibuwa matong og waktu nog lumuwas yanin puliꞌ sog luwang kituꞌ nog diꞌ motokkad og dalomin.
Na pogluwas nok sottuwa kituꞌ,
mosobuꞌ tokodoy ong mokotongow diyanin nong mga manusiyaꞌ nog daꞌ pogunut sok Tuhan,
poꞌ ongon yanin mokpuliꞌ.
Ong mga manusiyaꞌ kini,
tidu sok pokpoongon nog dunya,
ondaꞌ kosulat ong mga ngalan nilon sok Kitab Kotubuꞌ nog yonin na poksulatan nong mga ngalan nong mga mosurgaꞌ solama-lama.
Na pogluwas nok sottuwa kituꞌ puliꞌ,
diꞌ da yanin mobon,
poꞌ ginantaꞌ diyanin nok pogmulkaan yanin song narkaꞌ.
9 Sumboy ok tow nong modalom ok kokosunin ong mokosabut pasal sok sottuwa kituꞌ.
Ok pitu buk guluꞌ nok sottuwa kituꞌ duwaꞌ buk posabutin.
Ong mikuna nong maana nin,
yonin na ok pitu buk bontud nok pigbayaan nog libun bayadan kituꞌ,
bu og ikoduwaꞌ maana nin,
yonin na ok pitu buk sultan.
10 Og lima kotow song mga sultan kini midoksuꞌ na miksultan,
og ikonom soliyanin pa moksultan,
bu og ikopitu ondaꞌ pa datong.
Bilaꞌ matong na yanin,
podaliꞌ da ok poksultanin.
11 Na pasal sok sottuwa kituꞌ nog ongon song masa tagnaꞌ,
bu daꞌdun na ningkomun,
moimung yanin nog ikowalu nok sultan.
Misunuꞌ yanin sog duma nok pitu sultan,
bu ginantaꞌ diyanin nok pogmulkaan yanin song narkaꞌ.
12 Na ong mitongow nu nok sopuluꞌ buk sungag,
yonin na ok sopuluꞌ kotow sultan nog daꞌ pa pokopoksultan.
Ok sopuluꞌ sultan kini bogoyan nok kopatut moksultan dunut sottuwa kituꞌ,
sugaid podaliꞌ da ok poksultan nilon.
13 Moksolobuk da ilon nok pikilan,
bu wakilon nilon ok kowasa bug kopatut nilon sok sottuwa kituꞌ.
14 Mongatu ilon mogbunuꞌ sog Bataꞌ Bilibili,
sugaid dagon ilon da diyanin,
poꞌ yanin ok Pogbayaꞌ-bayaꞌ nong motas sok kotanan nong mogbayaꞌ,
bu ok Sultan nong motas sok kotanan nok sultan.
Momondag yanin bu migunut diyanin ong mga manusiyaꞌ nog inonggatin bu piniliꞌ in,
yonin na ong mga tow nong moliunungoy sok kotombaꞌ nilon diyanin.
15 Miktaluꞌ ong malaikat dinakon,
longin,
“Ong mga kosubaꞌ-subaan nong mitongow nu ok pigonongan nog libun bayadan kituꞌ,
ong maana nin yonin na ong modakol tokodoy nok tow nok pigbayaanin tidu sog len-len nog bangsa bug bahasa.
16 Tubus nituꞌ ok sopuluꞌ buk sungag nong mitongow nu nong migmaana nok sopuluꞌ buk sultan,
bu ok sottuwa kituꞌ,
mogdumut ilon sog libun bayadan koyon.
Alapon nilon og lam nog gartaꞌ in,
bu lobasan nilon yanin nog daꞌdun mobilin sog lawasin.
Doksuꞌ kanon nilon og gungodin bangka tutungoy sog gapuy.
17 Poꞌ pipikil nok Tuhan song mga sultan nog unuton nilon ok koleganin.
Saan na bogoyon nilon ok kopatut bug kowasa nilon sok sottuwa kituꞌ.
Dadi yanin na ok kounutan nilon toktob mounut og lam nok tinaluꞌ nok Tuhan.
18 Na og libun nong mitongow nu kituꞌ,
yonin na ong mibantug nok siyudad nok taga kowasa bu momarinta song mga sultan sog dunya.”