Ong mga Ponaksan nong Mulkaꞌ nok Tuhan
16
Tubus nituꞌ ongon ong midongogu nog landuꞌ kopagas nok tingog tidu sog Baloy nok Tuhan posunguꞌ sok pitu buk malaikat kituꞌ,
taluꞌ in,
“Na angoy niyu na bunag og gungod nok pitu buk ponaksan gantaꞌ mulkaꞌ nok Tuhan sog ginlupaan.”
2 Dadi inangoy nong mikuna nong malaikat bunagoy og gungod nok ponaksanin sog ginlupaan.
Na sododuun tinubuan nong nuka nong moduꞌ bu mosakit ok sosuku nong manusiyaꞌ nok taga tatak sottuwa bu sinumumba sog barhalaꞌ in.
3 Binunag na sop nog ikoduwaꞌ nong malaikat og gungod nok ponaksanin sog dagat.
Na sododuun miktimaluy duguꞌ og dagat mamaꞌ sopantun nog duguꞌ nok tow minatoy,
bu mimatoy ok kotanan nong migonong sog dagat.
4 Binunag na sop nog ikotolu nong malaikat og gungod nok ponaksanin song mga sapaꞌ bug subaꞌ bug kotubud-tubudan nok tubig,
bu sododuun miktimaluy da sop nog duguꞌ.
5 Na midongogu miktaluꞌ ong malaikat nong migbantoy nong mga kotubigan,
taluꞌ in,
“Mologdonga u Tuhan,
ong Mahasutsi nog asal na ongon tidu sok tolipunan mangoy song ningkomun,
bu mologdong og hukuman nu song mga manusiyaꞌ kini.
6 Poꞌ binuyus nilon og duguꞌ nong mga nabi nu bug duma nok tow sukuꞌ nu sok kopatoy.
Dadi ningkomun binogoyan nu ilon nog duguꞌ nog inumon nilon,
bu yonin koyon ok tolop tumbason nu dinilon.”
7 Doksuꞌ nituꞌ midongogu ok tingog tidu sok poktutungan nok komanyan nong mikpomotud ok taluꞌ nong malaikat kituꞌ,
longin,
“Oo dodaꞌ,
u Pogbayaꞌ-bayaꞌ,
ok Tuhan Mokowasa,
sobonnal bu mologdong ong mga hukuman nu.”
8 Og ikopat na sop nong malaikat,
binunagin og gungod nok ponaksanin sog gondow.
Sododuun migdodungag og ginitin bu mipokpasuꞌ dun ong mga tow.
9 Dangan mipasuꞌ ong mga tow sog landuꞌ nok kinit nok podos,
sinuknaan nilon ong ngalan nok Tuhan nong migbogoy nong mulkaꞌ kini.
Ondaꞌ nilon da poktowbatoy ong mga ginang nilon nong molaat,
bu ondaꞌ nilon potasoy ok Tuhan.
10 Puwas nituꞌ binunag na sop nog ikolima nong malaikat og gungod nok ponaksanin sok trunu nok sottuwa,
bu sododuun migdolom og bonuwa nok poglokounutanin.
Kiugditan nong mga manusiyaꞌ og dilaꞌ nilon kobalan nog landuꞌ nok siksaꞌ nong minanam nilon.
11 Bu sinuknaan nilon ok Tuhan sok surgaꞌ pasal sok sakit bug mga nuka nong minatong dinilon.
Ondaꞌ tokodoy nilon poktowbatoy ong mga ginang nilon nong molaat.
12 Doksuꞌ nituꞌ binunag na sop nog ikonom nong malaikat og gungod nok ponaksanin dituꞌ sok subaꞌ nog Alpurati.
Bu kinotihan ok subaꞌ kini bagun mokobiyan ong mga sultan nok tidu sok silangan.
13 Na mitongowu nog linumuwas ok sosolobuk soytan tidu sog babaꞌ nog dragun,
babaꞌ nok sottuwa,
bu tidu sog babaꞌ nog baluꞌ-baluꞌ nabia.
Og hantangan nong mga soytan koyon mamaꞌ nok tolu buk gombak.
14 Ilon kini mga soytan nong minginang nong miglologinis nong mokosobuꞌ-sobuꞌ nog gindanan.
Minangoy ilon mokpotopuk song mga sultan sog liwag nog dunya bagun popongatuhon nilon sok Tuhan Mokowasa bilaꞌ matong na ong mosolag nog gondow nog ginantaꞌ in kituꞌ.
15-16 Doksuꞌ pisolobuk na nong mga soytan ong mga sultan koyon bug mga sundalu nilon sog bonuwa nok pogingalanan sog bahasa Ibrani nog Armageddon.
Na ongon ong midongogu nok tingog nog Al-Masih,
taluꞌ in,
“Poginongog amu.
Matongu nong motokkow
mamaꞌ nok polonakow nog diꞌ kosunan og datongin.
Mobarakat ok sosuku manusiyaꞌ nog lolayun mokpotubud mogbagad dinakon
bu moksolug nok ponapot nilonb bagun sog waktu nok pokpuliꞌ u,
ondiꞌ ilon na kosipogan nog daꞌdun ok ponapot nilon.”
17 Tubus nituꞌ binunag na sop nog ikopitu nong malaikat og gungod nok ponaksanin sok kogaluꞌ-galuan,
bu ongon ok tingog nog landuꞌ kopagas miktidu sog Baloy nok Tuhan dituꞌ sok trunu nin,
taluꞌ in,
“Midoksuꞌ na.”
18 Na sododuun mikkillap-killap nok kilat,
miktonug-tonug,
miglugung-lugung bu miglinug nog landuꞌ kopagas.
Tidu sok pokpoongon nong manusiyaꞌ sog dunya,
daꞌdun sibon og linug nong maꞌ niyon kopagas.
19 Dadi og Babilon,
ong mibantug nok siyudad koyon,
mibolaꞌ nok tolu bahagiꞌ,
bu miladak da sop ong mga siyudad nok kobangsa-bangsahan.
Ondaꞌ da kolingowoy nok Tuhan ong mga kodusahan nong miinang song mibantug nok siyudad nog Babilon,
saan na pinanamin tokodoy dinilon ok siksaꞌ nong mulkaꞌ in.
20 Mitalop ok kotanan nok puluꞌ,
bu daꞌdun na og bontud motongow.
21 Kanaꞌ tibuwa niyon,
pidupian pa tokodoy nok Tuhan ong mga manusiyaꞌ nong mosolag nog ays,
og bogatin mga lima puluꞌ kilu.
Dadi sinuknaan nong mga manusiyaꞌ ok Tuhan pasal sog balaꞌ koyon nong mokondok-ondok tokodoy nok pidatongin dinilon.