Ok Pitubuk Malaikat bu ok Pitubuk Balaꞌ
15
Pokpuwas nituꞌ mitongowu na sop og len nog gindanan sog langit nog landuꞌ kosobuꞌ-sobuꞌ.
Ongon pitu buk malaikat nok pingandolan nok pitu balaꞌ nog yonin na ok kodoksuan nong mulkaꞌ nok Tuhan song mga manusiyaꞌ.
2 Doksuꞌ mikotongowu mamaꞌ hantang nog dagat nog landuꞌ kotinow mamaꞌ nok solamin nog ongon mikolimugoy dun nog gapuy.
Mitongowu da sop ong mga tow nong mimondag kituꞌ.
Mimondag ilon poꞌ ondaꞌ ilon poksumbaꞌ sok sottuwa bug barhalaꞌ in bu daꞌ pokpotatak song numero nong migmaana nong ngalanin.
Dituꞌ ilon migindog sog dagat koyon,
bu migonggayd ilon nog biyulla nog binogoy nok Tuhan.
3 Bu mikkolangan ilon nong mamaꞌ kolangan ni Nabi Musa,
ok sosuguon nok Tuhan,
bu yonin da sop ok kolangan nog Bataꞌ Bilibili.
Yonin na kini,
“U Pogbayaꞌ-bayaꞌ,
ika ok Tuhan Mokowasa,
mokosobuꞌ-sobuꞌ tokodoy kotanan nong mga pinginang nu!
Mologdong bu mosobonnal ong mga ginang nu.
Ika ok Sultana sog lam nok kobangsa-bangsahan solama-lama.b
4 Sima buwan og diꞌ mondok dinika,
u Tuhan?
Sima buwan sop og diꞌ mokpotas song ngalan nu,
poꞌ ika da ok solobuk-lobuk sutsi.
Ok kotanan nog bangsa mangoy diyon dinika sumumba,
poꞌ kiosunan na nong mologdong ong mga ginang nu.”c
5 Pogdoksuꞌ nituꞌ mitongowu nong mibukaꞌ og Baloy nok Tuhan sok surgaꞌ bu sog diyalomin og Bilik Mahasutsi bug ayin mikobotang ok pigjanjian.
6 Dadi ok pituꞌ buk malaikat nok pingandolan nok pitu ginis nog balaꞌ kituꞌ,
linumuwas ilon sog Baloy nok Tuhan sok surgaꞌ.
Ok ponapot nilon landuꞌ koputiꞌ,
molissin bug mosilow,
bu linibutan nog bulawan og dapit digdob nilon.
7 Doksuꞌ nituꞌ mitongowu ok solobuk tidu sok pat buk piongon koyon sog gadapan nok trunu nok Tuhan.
Binogoyanin ok pitu buk nong malaikat koyon nong mga ponaksan nog bulawan.
Miponuꞌ ong mga ponaksan koyon nong mulkaꞌ nok Tuhan,
ok totubuꞌ solama-lama.
8 Dadi milokop nog bold og Baloy nok Tuhan tidu sok kowasa bug kotasin.
Daꞌdun ong mokosolod diyon sog bon nog diꞌ modoksuꞌ ok pitu buk mulkaꞌ nok poponogon nok pitu malaikat kituꞌ.