Og Bataꞌ Bilibili bug Piktowanin
14
Poktontongu,
mitongowu og Bataꞌ Bilibili dituꞌ migindog sog Bontud Sion dunut sogatus bu pat puluꞌ bu pat ngibu kotow.
Tinatakan og buna nilon nong ngalan nog Bataꞌ Bilibili bug ngalan nog Gommaꞌ in nog yonin na ok Tuhan.
2 Bu midongogu ok tingog nok tidu sok surgaꞌ mamaꞌ sopantun nok tingog nog logosan nog bosoy atawa litobong nog lugung nong mopagas.
Ok tingog kituꞌ mamaꞌ da sop sopantun nong mga tow migdongan-dongan mokpotukar nog biyulla.
3 Mikkolangan ok sogatus bu pat puluꞌ bu pat ngibu kotow nog bogu kolangan sog gadapan nok trunu nok Tuhan,
bu pat buk piongon koyon,
sampoy duwaꞌ puluꞌ bu pat migmokogulang koyon.
Daꞌdun ong mokokosun nok kolangan kini muwal da ok sogatus bu pat puluꞌ bu pat ngibu kotow kini nog linokat sog dunya.
4 Linokat ilona moimung nok ponognaan sukuꞌ nok Tuhan bug Bataꞌ Bilibili tidu sok kodakolan nong manusiyaꞌ.
Mamaꞌ ilon nong mikuna songkuꞌ nog inuwakil sok Tuhan bug Bataꞌ Bilibili.
Ilon kini ong migunut-unut sog Bataꞌ Bilibili bisan ayin yanin posunguꞌ.
Mosutsi ilon,
mamaꞌ ilon nong mga subul nog ondaꞌ pa sibon kosammal pasal sog libun.
5 Daꞌ da sop ilon sibon pokopogloput,
bu daꞌdun tokodoy ong mosallaꞌ dinilon.
Ok Tolu buk Malaikat
6 Doksuꞌ nituꞌ mitongowu ok solobuk malaikat miglayug-layug sok tas gawan.
Migoyit yanin nong Mobais nok Suksugan nog diꞌ mopinda solama-lama bagun posampoyon song mga manusiyaꞌ sog dunya,
sog lam nok kobangsa-bangsahan,
pangkatan bug bahasa.
7 Miktaluꞌ yanin nong mopagas,
longin,
“Kondok amu sok Tuhan bu potas niyu yanin,
poꞌ midopot na ok poghukumin sok kotanan nong manusiyaꞌ.
Sumba niyu ok Tuhan,
ong migimung nog langit bug lupaꞌ,
dagat bug mga kotubud-tubudan nok tubig.”
8 Ongon og ikoduwaꞌ malaikat nok sinumunud diyanin,
bangka poktaluꞌ,
“Milubu na,
milubu na ok siyudad nok pogingalanan nog Babilonb,
ong mibantug nok siyudad.
Ok siyudad kini mamaꞌ nog libun bayadan nong migoyit nong mga kobangsa-bangsahan minum nong mokolangu bagun mogunut diyanin monginang nong mokosipog-sipog.”
9 Ongon na sop og ikotolu malaikat nok sinumunud dinilon bangka poktaluꞌ nong mopagas,
“Ok sosuku manusiyaꞌ nok sinumumba sok sottuwa kituꞌ bu sog barhalaꞌ in bu tinumabuk nok tatakin sog buna atawa sok komot nilon,
10 mokonanam na dodaꞌ ilon nog landuꞌ nog boluꞌ bug mulkaꞌ nok Tuhan.
Siksaon ilon biyan song miksuliyab nog gapuy taga asupri sog gadapan nong mga malaikat nok Tuhan bug Bataꞌ Bilibili.
11 Daꞌdun ok kodoksuan nok pogbol nog gapuy nok poniksaꞌ dinilon.
Sima-sima ok sinumumba sok sottuwa kituꞌ bug barhalaꞌ in bu mikpotatak nok komot atawa buna nilon song ngalanin,
daꞌdun tokodoy gulali nilon sok kosiksaan gobi-gondow.”
12 Saan na amu mga sukuꞌ nok Tuhan nok tumombaꞌ song mga suguanin bu mongandol ni Isa Al-Masih,
sumboy moktiggol amu.
13 Pogdoksuꞌ nituꞌ midongogu na sop ok tingog tidu sog langit,
taluꞌ in,
“Sulat nu kini.
Tidu ningkomun,
mobarakat ong matoy sok poksolobuk nilon ni Panghuꞌ Isa.”
Bu tinumabal og Ruh nok Tuhan,
“Motud tokodoy.
Mokulali na ilon sok tiksaꞌ nilon poꞌ diꞌ mobolong ok tumbas nok pinginang nilon.”
Ok Pononggiꞌ pasal sok Poghukum
14 Puwas nituꞌ sunoy pa mitongowu og gabun nok putiꞌ,
bu ongon ong migingkud dun mamaꞌ hantang nog bataꞌ nong manusiyaꞌ.
Og gulu nin taga kuruna nog bulawan,
bu mikketeng yanin nog garab mokutong.c
15 Na ongon og len nong malaikat linumuwas tidu sog Baloy nok Tuhan bangka poktaluꞌ nong mopagas song migingkud kituꞌ sog gabun,
taluꞌ in,
“Gamit nu na og garab nu koyon ponggani,
poꞌ minatong na ok timpu ponggani,
bu minug na og ganihon sog dunya.”
16 Dadi sododuun linabad nong migingkud kituꞌ sog gabun og garabin,
bangka nin ganihoy og ganihon dini sog dunya,
bu mitipotin.
17 Ongon na sop og len nong malaikat linumuwas tidu sog Baloy nok Tuhan sok surgaꞌ.
Migoyit da sop yanin nog garab nong mokutong.
18 Doksuꞌ niyon ongon na sop og len nong malaikat linumuwas sog dapit poktutungan nok komanyan.
Yanin ok taga kopatut sog gapuy.
Tinaluanin ong malaikat nong migoyit nong mokutong nog garab,
longin,
“Gamit nu na og garab nu sok pongalap nog bunga anggul sog dunya poꞌ minug na.”
19 Sododuun linabad nong malaikat koyon og garabin bangka nin ganihoy ong mga bunga angguld bu pinilakin song mosolag nok poglegekan nok Tuhan.
Ok poglegekan kini tandaꞌ nong mulkaꞌ nok Tuhan song mga manusiyaꞌ nog daꞌ tombaꞌ diyanin.
20 Doksuꞌ nituꞌ milegek ong mga bunga anggul sog luwasan nok siyudad.
Na tidu sok piglegekan koyon,
migbaꞌ nog duguꞌ nong mga tow nok pigmulkaan nok Tuhan.
Og layuꞌ nok kidopotan nog baꞌ koyon mga tolu gatus kilumetro,
bu lam-lam sodopa og dalomine.