Ok Sottuwa nong Minawon tidu sog Dagat
13
Puwas nituꞌ mitongowu ong mokondok-ondok nok sottuwa tinumunga bu minawon sog dagat.
Og gulu nin pitu buk,
bu sopuluꞌ buk ok sungagin.
Kada sungagin tinangonan nok kuruna,
bu ong mga gulu nin sinulatan nong ngalan nok ponglaat sok Tuhan.
2 Ok sottuwa koyon mamaꞌ hantang nok tigre,
sugaid og babaꞌ in mamaꞌ nog liyun,
bu og botisin mamaꞌ nog boluwang,
mosolag bu mokutong ok kinuku nin.
Winakil nog dragun dituꞌ sok sottuwa koyon ok kowasa nin bu ong mosolag nok kopatutin mokopogbayaꞌ.
3 Na ok solobuk nog gulu nok sottuwa koyon,
mamaꞌ nog bakas pinatoy,
sugaid kiulian na og gangol kituꞌ nong mokomula bosiya diyanin.
Saan na og lam nong mga tow sog dunya misobuꞌ dun bu migunut na doma sok sottuwa koyon.
4 Sinumba nilon og dragun,
poꞌ yanin koyon ong migbogoy nok kopatutin sok sottuwa koyon,
bu sinumumba da sop ilon sok sottuwa koyon.
Taluꞌ nilon,
“Daꞌdun ong mokobatuk sok sottuwa kini,
bu daꞌdun ong mokatu mogbunuꞌ diyanin.”
5 Ok sottuwa kini binogoyan nok kopatut mogabbu bu monaluꞌ-naluꞌ nong molaat,
bu mogbayaꞌ sog dunya sog bon nok pat puluꞌ bu duwaꞌ bulan.
6 Dadi minaluꞌ-naluꞌ yanin nong molaat posunguꞌ sok Tuhan.
Pigunda-undahanin ong ngalan nok Tuhan bu ok pigononganin bu sosuku nong migonong sok surgaꞌ.
7 Na kinumboy ok sottuwa kini momunuꞌ bagun dagonin ong mga tow sukuꞌ nok Tuhan.
Binogoyan da sop yanin nok kopatut mogbayaꞌ song mga manusiyaꞌ nok tidu sog lam nok pangkatan,
bahasa bug kobangsa-bangsahan.
8 Dadi og lam nong manusiyaꞌ nog daꞌ kosulat ong mga ngalan nilon sok Kitab Kotubuꞌ sog daꞌ pa koongon og dunya,
sinumumba ilon sok sottuwa kini.
Ok Kitab Kotubuꞌ kini yonin na ok poksulatan nong mga ngalan nong mga mosurgaꞌ solama-lama.
Og gapuꞌ nok Kitab Kotubuꞌ kini yonin na og Bataꞌ Bilibili nog bakas pinatoy.
9 Dadi sosuku nong monginongog,
sumboy unutonin pahatul.
10 Ok tow nok sukudin mopirisu,
na mopirisu na dodaꞌ.
Bu sima-sima sop ok sukudin nong matoy biyan sok kalis,
na matoy da sop biyan sok kalis.a
Dadi amu mga sukuꞌ nok Tuhan sumboy poogoton niyu ok poktiggol bug kotombaꞌ niyu.
Ok Sottuwa nog Linumuwas sog Lupaꞌ
11 Doksuꞌ nituꞌ mikotongowu na sop nog len nong mokondok-ondok nok sottuwa linumuwas tidu sog diyalom lupaꞌ.
Ongon duwaꞌ buk sungagin mamaꞌ sungag nog bataꞌ bilibili,
sugaid ok tingogin mamaꞌ nog dragun.
12 Kiwakilan ok sottuwa kini nog lam nok kopatut nong mikuna nok sottuwa kituꞌ nok taga gangol nong matoy bosiya yanin dun.
Dadi ginamitin ok kopatutin sog gadapan nong mikuna nok sottuwa kituꞌ,
bu mipotombaꞌ in ong mga manusiyaꞌ sumumba song mikuna nok sottuwa kituꞌ.
13 Ok sottuwa nog ikoduwaꞌ kini,
minginang yanin nog landuꞌ kosobuꞌ-sobuꞌ nong mga gindanan.
Bu mikpoponog da sop yanin nog gapuy tidu sog langit sog gadapan nong mga manusiyaꞌ.
14 Pasal sok kotanan nong mokosobuꞌ-sobuꞌ nog gindanan nog binogoy diyanin inangon sog gadapan nong mikuna nok sottuwa kini,
kiakkalanin ong mga manusiyaꞌ sog dunya.
Sinuguꞌ in ilon mogimung nog bayuꞌ-bayuꞌ nong mikuna sottuwa nong miangol nok kalis sokaliꞌ mitubuꞌ da.
15 Og ikoduwaꞌ sottuwa kini binogoyan nok kowasa mogbogoy nog ginawa sog barhalaꞌ kituꞌ bagun mokopoktaluꞌ bu mokopomatoy sok sosuku nong manusiyaꞌ nog ondiꞌ sumumba sog barhalaꞌ kituꞌ.
16 Tinogolin tatakan ok kotanan nok tow,
mobeteꞌ bu mosolag,
miskinan atawa dayahan,
gulipon atawa kanaꞌ gulipon.
Sumboy mokpotatak ilon sog lintu nok komot nilon atawa sog buna nilon,
og gindanan nok sukuꞌ ilon dun.
17 Migbayaꞌ og ikoduwaꞌ sottuwa kini mamaꞌ nituꞌ bagun daꞌdun ong mokosaluy atawa mokodagang nog bisan olo-olo nituꞌ bilaꞌ daꞌdun ok tatak nilon nong ngalan nong mikuna nok sottuwa kituꞌ atawa ong numeru nong migmaana nong ngalanin.
18 Na sumboy ok tow modalom ok kokosunin bagun mobogbadin ong maana nong numeru nok sottuwa kini.
Poꞌ ong numeru kini migmaana nong ngalan nok tow,
bu ong numeru kini nom gatus bu nom puluꞌ bu nom.