Og Libun bu og Dragun
12
Puwas nituꞌ ongon og landuꞌ kosobuꞌ-sobuꞌ nog gindanan tinumuwaꞌ sog langit.
Mitongowu solobuk libun mimonapot nong mata gondow.
Ok kuruna nin,
ok sopuluꞌ bu duwaꞌ buk bitun,
bu migindog yanin sog bulan.
2 Og libun kini bodos bu posunguꞌ na mogbataꞌ,
dadi migaduy poꞌ pinakitan na.
3 Na sunoy pa ongon na sop og len nong mokosobuꞌ-sobuꞌ nog gindanan tinumuwaꞌ sog langit.
Mitongowu ong mosolag nog dragun pula,
pitu buk gulu nin bu sopuluꞌ buk sungagin.
Kada solobuk gulu nog dragun koyon,
ongon ok kuruna nin.
4 Pinompel nog gikugin og ikotolu bahagiꞌ nog bitun bangka nin pilakoy sog lupaꞌ.
Minindog yanin sog gunahan nog libun nok posunguꞌ mogbataꞌ bagun mokanin mogdayun bilaꞌ lumuwas na og bataꞌ kituꞌ.
5 Dadi binataꞌ na nog libun kini ok solobuk bataꞌ nog laki,
sugaid ondaꞌ yanin koolo nog dragun kituꞌ,
poꞌ inalap mogdayun nok Tuhan bangka oyitoy dituꞌ sok trunu nin sok surgaꞌ.
Og bataꞌ koyon,
yanin ong mogbayaꞌ sog lam nong mga kobangsa-bangsahan biyan sok kowasa nin nong mamaꞌ hantang tungkod bosi.
6 Og libun kituꞌ pogdoksuꞌ in mogbataꞌ,
milaguy yanin posunguꞌ sog ginlupaan mimala.
Yonin kituꞌ og bonuwa nok tinogama nok Tuhan diyanin bagun motolagad yanin sog bon nok songibu bu duwaꞌ gatus bu nompuluꞌ ondow.
7 Pogdoksuꞌ nituꞌ,
miktagnaꞌ na og bunuꞌ sok surgaꞌ.
Migbunuꞌ si Mikael bug mga kodumahanin nong malaikat sog dragun kituꞌ dunut mga ponindogin.
8 Sugaid og dragun bug mga duma nin,
diꞌ mokatu sok pagas nong mga malaikat,
saan na midinag ilon dun bangka na bugowoy sok surgaꞌ.
9 Pinilak og dragun dunut nong mga ponindogin sog lupaꞌ.
Ong mosolag nog dragun kini,
yonin na ong mamak song masa tagnaꞌ kituꞌ.
Tinawag sop yanin nog Iblis bug kounutan nong mga soytan.
Yanin og lolayun mongakkal song mga tow sog dunya kini bagun ilon mokodusa.
10 Pokpilak nog dragun bug mga duma nin sog lupaꞌ,
midongogu ok tingog nog landuꞌ kopagas sog langit,
taluꞌ in,
“Minatong na ok pogawon,
kowasa bug pomarinta nok Tuhan,
bu miongon na ok kopatut nog Al-Masih ok piniliꞌ in mogbayaꞌ,
poꞌ linabuꞌ na sog dunya og Iblis kituꞌ nong mongakkal na hadja gondow-gobi sok koilugan ta.
Gobi-gondow susunanin ok koilugan ta sok kotombaꞌ posunguꞌ sok Tuhan.
11 Dinag og Iblis nong mga koilugan ta pasal sok kopongandol bu poksaksiꞌ nilon.
Poꞌ tinumombaꞌ ilon nong mibuyus og duguꞌ nog Bataꞌ Bilibili sok kopatoyin bagun mopapas ong mga dusa nilon,
bu sinumaksiꞌ ilon pasal dun.
Lamig ilon matoy pasal sok pogunut nilon diyanin.
12 Dadi pogloliyag amu mga migonong sok surgaꞌ.
Sugaid mokondok-ondok ok kobiyan-biyanan nong mga migonong sog ginlupaan bu sog dagat poꞌ diyon na minonog og Iblis.
Landuꞌ tokodoy og lingitin poꞌ kiosunanin nong mopolok na og ginantaꞌ diyanin nog waktu.”
13 Dangan kisayuhan nog dragun nok pinilak na yanin sog ginlupaan,
ginonatin og libun kituꞌ nong migbataꞌ nog laki.
14 Sugaid binogoyan nok Tuhan og libun kituꞌ nok pokpak mamaꞌ nok pokpak nong mosolag nog banug bagun mokolayug yanin polayuꞌ sog dragun.
Dadi mikolayug yanin posunguꞌ sog bonuwa nok tinogama diyanin sog ginlupaan mimala bagun tolagadon yanin dituꞌ sog bon nok tolu tahun bu tongaꞌ.
15 Na binulahan og libun kituꞌ nog dragun nog landuꞌ kodakol nok tubig mamaꞌ nok subaꞌ,
bagun moanud yanin.
16 Tibuwa sododuun tinabangan nog lupaꞌ og libun kituꞌ,
dadi binukaꞌ nog lupaꞌ og babaꞌ in bangka tosop ok tubig.
17 Na migdungag og lingit nog dragun sog libun kituꞌ.
Minangoy yanin mogbunuꞌ song mga duma ponupuꞌ nog libun nog yonin na ong mga manusiyaꞌ nok tinumombaꞌ sok suguan nok Tuhan bu mikpomotud sok pononduꞌ ni Isa.
18 Tubus nituꞌ minindog og dragun koyon sok pontaran nog dagat.