Og Duwaꞌ kotow Mokposobonnal pasal sok Tuhan
11
Doksuꞌ binogoyan ku nok kayu para poksukud,
bu tinaluan ku,
“Angoya bangka nu sukudoy og Baloy nok Tuhan bu ok pokkurbanan,
bu itung nu sop bug sanu kotow ok sinumumba diyon.
2 Sugaid diꞌ nu ampuon sumukud og loma-lomahan sog luwasan nog Baloy nok Tuhan,
poꞌ binogoy koyon song mga tow sok kobangsa-bangsahan.
Dodjak-dodjakan nilon ong mosutsi nok siyudada sog bon nok pat puluꞌ bu duwaꞌ bulan.
3 Sugaid poyton ku og duwaꞌ kotow momonapot nok kadut nong mokposobonnal pasal dinakon.
Bogoyan ku ilon nok kopatut mokposampoy nok Parman ku mamaꞌ nong nabi sog bon nok songibu bu duwaꞌ gatus bu nompuluꞌ ondowb.”
4 Og duwaꞌ kotow nong mokpoposobonnal kini,
yonin na og ginollalan sog diyalom Kitab Sutsi nog duwaꞌ buk kayu jaytun bu duwaꞌ buk nok politaanc.
Diyon ilon sog gadapan nok Pogbayaꞌ-bayaꞌ,
ok Tuhan sog liwag nog ginlupaan.
5 Bilaꞌ ongon og lumaat dinilon,
miyan og gapuy tidu sog babaꞌ nilon monglaat sog banta nilon.
Dadi sima-sima ok sumuloy lumaat dinilon,
matoy na dodaꞌ nong mamaꞌ niyon.
6 Taga kopatut og duwaꞌ kotow nabi kini tumambol nog langit bagun diꞌ mogdupiꞌ sog bon nilon mokposampoy nok Parman nok Tuhan.
Ongon sop ok kopatut nilon imungon nog duguꞌ ok kotubigan.
Taga kopatut da sop ilon mokpodatong nong miglologinis nog balaꞌ sog dunya bisan olo waktuhoy bilaꞌ kolegan nilon.
7 Na sog waktu nong modoksuꞌ na mokposampoy og duwaꞌ kotow kini,
ongon ok sumaggaꞌ dinilon ong mokondok-ondok nok sottuwa.
Lumuwas yanin tidu sog luwang nog diꞌ tokodoy motokkad og dalomin bangka pogbunuꞌ sog duwaꞌ kotow kini.
Momondag ok sottuwa koyon dinilon,
bu mopatoyin ilon.
8 Ong mga bangkoy nog duwaꞌ kotow kini diyon pitiyangan sog dalan nong mibantug nok siyudad bug ayin dapit linansang ok Panghuꞌ nilon sok kayu.
Ok siyudad kini mamaꞌ sopantun nong mga bonuwa Sodom bu Misird.
9 Sog bon nok tolu ondow bu tongaꞌ moktontong nog bangkoy nilon ong mga tow tidu sog len-len pangkatan,
bahasa bug bangsa,
bu diꞌ nilon kumboyon pokubul.
10 Landuꞌ og loliyag nong mga manusiyaꞌ dini sog dunya sok kopatoy nilon.
Dadi moglami-lami ilon bu mogbinogoyoy sok pokasi nilon pasal minatoy na og duwaꞌ kotow nabi nok Tuhan kini.
Poꞌ sog daꞌ pa ilon patoy,
ilon ok piktiduhan nok kobinsanaan nong mga tow sog dunya.
11 Sugaid pogdoksuꞌ nok tolu ondow bu tongaꞌ,
pitubuꞌ ilon mokpuliꞌ nok Tuhane bangka na ilon indog,
bu kiondokan tokodoy ong mga tow nong mikotongow dun.
12 Doksuꞌ nituꞌ ongon ong mopagas nok tingog tidu sog langit moktaluꞌ dinilon,
“Angoy amu dini sok tas.”
Na sododuun inoyit og duwaꞌ kotow nabi kini nog gabun posunguꞌ sog langit soliyan miglonglong ong mga banta nilon.
13 Sunoy pa miglinug nog landuꞌ kopagas.
Miladak og ikosopoluꞌ bahagiꞌ nok siyudad koyon,
bu minatoy ok pitu ngibu kotow.
Na ok sosuku nok tow nog ondaꞌ patoy sog waktu niyon,
miondok ilon tokodoy,
bu pinudji nilon ok kotas nok Tuhan sok surgaꞌ.
14 Dadi miniyan na og ikoduwaꞌ nong mokondok-ondok nog balaꞌ,
bu posunguꞌ na sop matong og ikotolu.
Og Balaꞌ nong Miongon sok Pogoyup nog Ikopitu Malaikat
15 Doksuꞌ inoyup nog ikopitu malaikat ok tombuli nin,
bu ongon ong mga tingog nog landuꞌ kopagas sok surgaꞌ,
taluꞌ nilon,
“Na ok pomarintahan sok tibuk nog dunya,
ok sukuꞌ na nok Pogbayaꞌ-bayaꞌ bu og Al-Masih nok piniliꞌ in,
yonin na ong momarinta solama-lama.”
16 Na og duwaꞌ puluꞌ bu pat migmokogulang nong miningkud diyon song mga trunu nilon sog gadapan nok Tuhan,
sinumudjud bangka nilon sumbahoy ok Tuhan.
17 Taluꞌ nilon,
“U Pogbayaꞌ-bayaꞌ,
ika ok Tuhan Mokowasa,
og asal na ongon tidu sok tolipunan mangoy song ningkomun.
Moksarang-sukul ami tokodoy dinika poꞌ pitongow nu og landuꞌ nok kowasa nu,
bu tinagnaan nu na ok pomarinta nu sog dunya.
18 Landuꞌ tokodoy og lingit nong mga manusiyaꞌ nog ondaꞌ tombaꞌ dinika,
sugaid dinumatong na og waktu nok pogmulkaꞌ nu.
Midopot na ok poghukum nu song mga manusiyaꞌ nong minatoy na,
bu waktu nok tumbasan nu ong mga sosuguon nu,
mga konabihan nu,
bu mga sukuꞌ nu nong mogogondok dinika,
mobeteꞌ bu mosolag.
Minatong na og waktu nok siksaon nu na ong mga manusiyaꞌ nong minglaat sog dunya.”
19 Doksuꞌ nituꞌ mibukaꞌ og Baloy nok Tuhan sok surgaꞌ,
bu mitongowu ok Kaban Pigjanjian dituꞌ sog diyalomin.
Na sododuun mikkillap-killap ok kilat,
miktonug-tonug,
miglugung-lugung,
miglinug bu migdupiꞌ sop nog ays nong mamaꞌ nong mokosolag nog batu.