Ong Malaikat bu ong Mikaan nok Kitab
10
Doksuꞌ mitongowu na sop og len nong mokowasa nong malaikat minonog tidu sog langit.
Miputus yanin nog gabun bu taga binaddali sok tas nog gulu nin.
Ong muluꞌ in sinumilak mamaꞌ nong mata gondow,
bu og botisin miksuliyab mamaꞌ nog gapuy.
2 Ongon ok kitab miboklad nog inonggaydanin.
Pogdatongin sog dunya,
dinidjakin og botisin nog lintu sog dagat,
bu og botisin nog bibang dinidjakin sog ginlupaan.
3 Doksuꞌ migekes yanin mamaꞌ nok tingog nog liyun.
Pokpuwasin mogekes,
tinumabal og lugung pitu kali.
4 Sulaton ku na bosiya ok tinaluꞌ nok pitu lugung kituꞌ,
sugaid ongon ong midongogu nok tingog tidu sog langit,
longin,
“Diꞌ nu sulaton ok taluꞌ nog lugung pitu kali.
Diꞌ nu posunon.”
5 Doksuꞌ ong malaikat nong mitongowu kituꞌ nong minindog sog dagat bu sog lupaꞌ,
ininatin ok komotin nog lintu sog langit.
6 Bu sinumapa yanin song ngalan nok Tuhan nok totubuꞌ solama-lama,
nog yonin na ong migimung nog langit,
lupaꞌ,
dagat bug lam nog olo-olo nituꞌ.
Miksapa yanin nog diꞌ na pobonon nok Tuhan.
7 Poꞌ mongmattan na ong mibuni nong maksud nok Tuhan nok pisampoyin song mga sosuguonin nok konabihan tagnaꞌ.
Mounut na koyon bilaꞌ moguyup og ikopitu malaikat kituꞌ nok tombuli nin.
8 Miktaluꞌ na sop dinakon mokpuliꞌ ok tingog kituꞌ tidu sog langit,
longin,
“Angoy nu ong malaikat nong migindog dituꞌ sog dagat bu sog lupaꞌ,
bu alap nu ok kitab nong miboklad kituꞌ sok komotin.”
9 Dadi mikpolani u song malaikat bangka u pongonihoy ok kitab kituꞌ.
Tinaluanin akon,
“Alap nu bangka nu kanoy.
Momis koyon mamaꞌ nok tonob sog bon nog diyon pa sog babaꞌ nua,
sugaid poguglon nu dun,
na sumakit na ok tiyan nu.”
10 Dadi inalapu ong mikaan nok kitab koyon sok komotin bangka u kanoy.
Mamaꞌ dodaꞌ nok tonob ok komisin sog diyalom babaꞌ u,
sugaid poguglon ku dun,
sinumakit ok tiyan ku dun.
11 Doksuꞌ nituꞌ ongon miktaluꞌ dinakon,
“Sumboy nu posampoyon mokpuliꞌ ok pidinsamaꞌ tumaluꞌ nok Tuhan pasal song mga manusiyaꞌ nog ginis-ginisan nog bangsa bug bahasa sampoy song mga kosultanan nilon.”