Og Balaꞌ sok Pogoyup nog Ikolima Malaikat
9
Doksuꞌ inoyup na sop nog ikolima malaikat ok tombuli nin,
bu mitongowu og bitun nog bakas midogdag sog dunya tidu sog langit.
Binogoyan og bitun kituꞌ nok kunsiꞌ sog luwang nog diꞌ motokkad og dalomin.
2 Dangan binukaan nog bitun og luwang kituꞌ,
ongon og linumuwas nong modikpol nog bol mamaꞌ tidu song mosolag nok tutung.
Dadi migdolom og langit sampoy og gondow poꞌ kidigbunan nog bol.
3 Na tidu sog bol koyon linumuwas ong mga mokosolag nok tolompisunga bangka tukpa sog lupaꞌ.
Binogoyan ilon nok kowasa mokposakit song mga manusiyaꞌ mamaꞌ nok sakit nog bisa nog gulasulas.b
4 Sugaid pigondian ilon monglaat nong mga sigbot,
mga pomulan bu ong mga kayu.
Og binasahon nilon tibuwa,
ong mga manusiyaꞌ nog daꞌdun tatak nok Tuhan sog buna nilon.
5 Pigondian ilon nog diꞌ nilon pomatoyon ong manusiyaꞌ,
sugaid posakitan hadja sog bon nog lima bulan.
Na ok sakit nok pinanam diyon dinilon mamaꞌ nog inugditan ilon nog gulasulas.
6 Sog waktu nok pominasa song mga manusiyaꞌ,
monontong ilon nok kopatoy,
sugaid daꞌ ilon tokodoy pokobalak.
Meleg na tokodoy ilon matoy,
sugaid tumangkis dinilon ok kopatoy.
7 Ong mga tolompisung kituꞌ mamaꞌ sopantun nong mga kudaꞌ nong migluyud-luyud togama na mogbunuꞌ.
Og gulu nilon mamaꞌ nok taga kuruna bulawan,
bu ong muluꞌ nilon mamaꞌ nong manusiyaꞌ.
8 Og buk nilon moyabaꞌ mamaꞌ nog buk nong mga kolibunan,
bu ong mga ngisi nilon mamaꞌ nong ngisi nog liyun.
9 Ong mga digdob nilon mamaꞌ nok taga taming nog bosi,
bu ok tingog nong mga pokpak nilon mamaꞌ nog golongkol bug litopak nong mga kudaꞌ dunut mga korumata nilon nog gumobok posunguꞌ sok pogbunuan.
10 Ong mga gikug nilon taga tobok nong mobisa mamaꞌ nog gulasulas,
bu yonin koyon og gamiton nilon pominsanaꞌ nong mga manusiyaꞌ sog bon nog lima bulan.
11 Ok sultan nilon yonin na solobuk soytan nong migbayaꞌ sog luwang nog daꞌdun tokodoy mokotokkad dun.
Ong ngalanin sog bahasa Ibrani,
Abaddon,
bu sog bahasa Grik,
Apolyon,
ong maana nin,
ong monglaat.
12 Midoksuꞌ na ong mikuna nong mokondok-ondok nog balaꞌ.
Sugaid ongon pa duwaꞌ ginis nog balaꞌ nok podatongon nok Tuhan.
Og Balaꞌ sok Pogoyup nog Ikonom Malaikat
13 Doksuꞌ inoyup na sop nog ikonom nong malaikat ok tombuli nin.
Pogoyupin,
midongogu ok tingog tidu sog dapit pat pidjulu song mobeteꞌ lomisahan poktutungan nok komanyan nong miputus nog bulawan kituꞌ dituꞌ sog gadapan nok Tuhan.
14 Miktaluꞌ ok tingog kituꞌ song malaikat nong migoyup nok tombuli nin,
longin,
“Bogbadoy nu ok pat buk malaikat nog ginapus dituꞌ song mosolag nok subaꞌ nog Alpurati.”
15 Dadi binogbadanin mogdayun ok pat buk malaikat kituꞌ.
Binoluy ilon sok tahun,
bulan,
gondow bug oras nok tinogama para dinilon bagun pomatoyon nilon og ikotolu bahagiꞌ nong manusiyaꞌ dini sog dunya.
16 Midongogu og dakol nong mga sundalu nilon mingudaꞌ,
ongon duwaꞌ gatus milyon.
17 Sog diyalom ponontongu,
mitongowu og bayuꞌ-bayuꞌ nong mga kudaꞌ nilon bu ong mga mingudaꞌ dun.
Og digdob nong mga sundalu taga taming bosi nong mopula mamaꞌ nog gapuy,
bilu bu modalag.
Og gulu nong mga pingudaan nilon koyon mamaꞌ nog liyun bu linumuwas sog babaꞌ nilon og gapuy,
bol bug asupri.
18 Dadi mimatoy og ikotolu bahagiꞌ nong mga manusiyaꞌ sog dunya kobalan nog gapuy,
bol bug asupri nok tidu sog babaꞌ nilon.
19 Og bisa mokopatoy tidu sog babaꞌ bu gikug nong mga pingudaan nilon kini.
Poꞌ og gikug nilon taga gulu mamaꞌ nong mamak nog yonin da sop ong mokomula song manusiyaꞌ.
20 Tibuwa og duma nok tow nog daꞌ patoy nog balaꞌ kini,
ondaꞌ poktowbat nong mga dusa nilon.
Pidayun nilon ok poksumba song mga soytan bug mga tuhan-tuhan.
Ok poksumbahon nilon,
inimung tidu sog bulawan,
silber,
tumbaga,
batu bug kayu nog diꞌ tanan mokotongow,
diꞌ mokodongog,
bu diꞌ da sop mokopanow.
21 Ondaꞌ nilon da sop poktowbatoy ok pinginang nilon nong momunuꞌ,
monginang-inang,
mogjina,
bu monakow.