Inawaꞌ nog Bataꞌ Bilibili og Ikopitu Podokot nok Kitab Linulun
8
Dangan inawaꞌ nog Bataꞌ Bilibili og ikopitu buk podokot sok kitab linulun,
na daꞌdun na og gonek sok surgaꞌ sog bon nok tongaꞌ oras.
2 Pokpuwas nituꞌ mitongowu ok pitu buk malaikat nong migindog madap sok Tuhan,
bu pimogoyan ong monolokotow dinilon nok tombuli.
3 Ongon na sop og len nong malaikat migoyit nok pogungodan nong miglunsan bulawan para sok komanyan.
Minangoy yanin mindog song molani nong mobeteꞌ lomisahan poktutungan nok komanyan.
Tubus binogoyan yanin nong modakol nok komanyan bagun posunuonin song mga pongoni-ngoni nog lam nong mga tow sukuꞌ nok Tuhan.
Dadi tutungonin ok komanyan diyon sok poktutungan kituꞌ nong miputus nog bulawan sog gadapan nok trunu nok Tuhan.
4 Tubus mikpodibabow og bol nok komanyan posunguꞌ sok Tuhan dunut nong mga pongoni-ngoni nong mga tow sukuꞌ in.
5 Doksuꞌ inalap nong malaikat ok pogungodan nok komanyan bangka nin ponuoy nog baga nog gapuy tidu sok poktutungan bangka nin pilakoy sog dunya.
Na sododuun miglugung-lugung,
miktonug-tonug,
bu mikkillap-killap ok kilat bu miglinug.
Ong mga Balaꞌ sok Poguyup nong Mikuna nok Pat buk nok Tombuli
6 Tubus ok pitu buk nong malaikat nong migoyit nok pitu buk tombuli,
mikpodinsamaꞌ na ilon mogoyup dun.
7 Na doksuꞌ inoyup nong mikuna malaikat ok tombuli nin bangka pogdupiꞌ sog dunya nog ays bug gapuy nong migampuꞌ bug duguꞌ.
Mitutung og ikotolu bahagiꞌ nog dunya bu og ikotolu bahagiꞌ nok kokayuhan bug kotanan nok sigbot.
8 Doksuꞌ inoyup nog ikoduwaꞌ malaikat ok tombuli nin.
Sododuun ongon mitongowu mamaꞌ nong mosolag nog bontud miksuliyab nog gapuy,
bangka pilakoy sog dagat.
Dadi miimung nog duguꞌ og ikotolu bahagiꞌ nog dagat.
9 Minatoy og ikotolu bahagiꞌ nong mga totubuꞌ sog diyalom nog dagat,
bu miladak og ikotolu bahagiꞌ nong mga sosakoyan diyon.
10 Doksuꞌ inoyup na sop nog ikotolu malaikat ok tombuli nin.
Na sododuun ongon ong midogdag nong mosolag nog bitun tidu sog langit bangka poglalak mamaꞌ nok tanjuꞌ.
Midogdag og bitun koyon sog ikotolu bahagiꞌ nong mga sapaꞌ bug subaꞌ bu song mga kotubud-tubudan nok tubig.
11 Ong ngalan nog bitun koyon si Mopet.
Dadi mopet na ong nanam nog ikotolu bahagiꞌ nok tubig,
bu modakol manusiyaꞌ ong mimatoy pasal sok poginum nilon poꞌ milassun ilon dun.
12 Doksuꞌ inoyup nog ikopat malaikat ok tombuli nin.
Sododuun misugat og ikotolu bahagiꞌ nog gondow,
bulan bug bitun bangka kopapas og ikotolu bahagiꞌ nok sahaya nilon.
Saan na kikulangan og dolag sog waktu nog gondow bug gobi nog ikotolu bahagiꞌ.
13 Puwas nituꞌ tinumongalu sok tas,
bu mitongowu og banug miglayug-layug.
Midongogu yanin migekes nong monamal,
longin,
“Mokondok-ondok,
mokondok-ondok,
landuꞌ kondok-ondok ok koposunguan nong mga manusiyaꞌ sog dunya pasal podatongan ilon pa nong mga balaꞌ,
poꞌ ongon pa tolu buk malaikat mogoyup nok tombuli nilon.”