Ok Sogatus Pat Puluꞌ bu Pat Ngibu Kotow Israel nok Tinatakan
7
Doksuꞌ mitongowu nog ongon ok pat buk malaikat sok pat pidjulu nog dunya.
Sinaggaan nilon ok pat pidjulu nog galuꞌ bagun diꞌ mosugat og lupaꞌ,
dagat bug mga kokayuhan.
2 Tubus nituꞌ mitongowu da sop og len nong malaikat tinumuwaꞌ tidu sok silangan.
Migoyit yanin nok pongtatak nok Tuhan nok totubuꞌ solama-lama.
Inekesanin nong mopagas ok pat buk malaikat nog binogoyan nok Tuhan nok kopatut lumaat nog lupaꞌ bug dagat.
3 Ok taluꞌ in,
“Diꞌ niyu pa laaton og dagat bug lupaꞌ bu ok kokayuhan sog bon nog diꞌ nami kotatakan ong mga buna nong mga gulipon nok Tuhan.”
4 Doksuꞌ nituꞌ midongogu og dakol nok kitatakan.
Ongon sogatus bu pat puluꞌ bu pat ngibu tidu sok kotanan nok pangkatan nok tow Israel.
5 Tidu sok ponupuꞌ ni Yahud,
ongon sopuluꞌ bu duwaꞌ ngibu kotow nok kitatakan,
tidu sok ponupuꞌ ni Ruben,
sopuluꞌ bu duwaꞌ ngibu kotow,
bu tidu sok ponupuꞌ ni Gad,
sopuluꞌ bu duwaꞌ ngibu kotow.
6 Na tidu sok ponupuꞌ ni Aser,
sopuluꞌ bu duwaꞌ ngibu kotow,
tidu sok ponupuꞌ ni Naptali,
sopuluꞌ bu duwaꞌ ngibu kotow,
bu tidu sok ponupuꞌ ni Manasse,
sopuluꞌ bu duwaꞌ ngibu kotow.
7 Tubus tidu sok ponupuꞌ ni Simeon,
sopuluꞌ bu duwaꞌ ngibu kotow,
tidu sok ponupuꞌ ni Lebi,
sopuluꞌ bu duwaꞌ ngibu kotow,
bu tidu sok ponupuꞌ ni Issakar,
sopuluꞌ bu duwaꞌ ngibu kotow.
8 Doksuꞌ tidu sok ponupuꞌ ni Sebulun,
sopuluꞌ bu duwaꞌ ngibu kotow,
tidu sok ponupuꞌ ni Yusup,
sopuluꞌ bu duwaꞌ ngibu kotow,
bu tidu sok ponupuꞌ ni Benhamin,
ongon ok sopuluꞌ bu duwaꞌ ngibu kotow nok kitatakan.
Og Landuꞌ Kodakol nok Tow sog Gadapan nok Trunu nok Tuhan
9 Doksuꞌ nituꞌ sunoy pa mitongowu ok tumpukan nog landuꞌ kodakol nok tow nog daꞌdun ong mokitung dun.
Tidu ilon sog lam nok kobangsa-bangsahan,
pangkatan bug bahasa.
Migindog ilon sog gadapan nok trunu nok Tuhan bug Bataꞌ Bilibili.
Migjuba ilon kotanan nok putiꞌ,
bu migoyit ilon kokoniya mamaꞌ nog langkoy nong niyug,
og gindanan nog loliyag nilon.
10 Pogdoksuꞌ nituꞌ miggekes ilon nong monamal,
taluꞌ nilon,
“Ok kopogawon tidu sok Tuhan ta,
ong migingkud sok trunu nin
bu sog Bataꞌ Bilibili.”
11 Migindog ok kotanan nong malaikat sog lumibut nok trunu nok Tuhan bu mga migmokogulang koyon,
bug pat buk piongon koyon.
Doksuꞌ sinumudjud ilon sok Tuhan bangka poksumba.
12 Taluꞌ nilon,
“Amin.
Og lam nok pokpudji,
pokpotas bug kokosun,
poksarang-sukul,
pogbantug,
kowasa bug kopagas
diyon sok Tuhan ta solama-lama.
Amin.”
13 Doksuꞌ nituꞌ miksak dinakon ok solobuk migmokogulang kituꞌ,
taluꞌ in,
“Sima ong mga migjuba nok putiꞌ koyon,
bu ayin ilon koyon miktidu?”
14 Ok sambungu,
“Tuwan,
ondiꞌ u kosunan.
Ika da ong mokosun dun.
Posunan nu akon busung-busung.”
Dadi piosunanin akon,
taluꞌ in,
“Yonin koyon ong mga manusiyaꞌ nong mikobiyan nog landuꞌ nok kobinsanaan.
Dinoktakan nilon og juba nilon biyan sog duguꞌ nog Bataꞌ Bilibili bagun moputiꞌ.
Dadi miawaꞌ na ong mga dusa nilon.
15 Saan na diyon ilon sog gadapan nok trunu nok Tuhan.
Gobi-gondow moktolagad ilon diyanin sok pogononganin,
bu linoklupin ilon.
16 Ondiꞌ nilon na monanam og gutom bug kuwow.
Bu ondiꞌ na sop ilon mopasuꞌ sog ginit nog gondow atawa molossahi nog bisan olo nog landuꞌ kinit.a
17 Poꞌ diyon og Bataꞌ Bilibili song molani nok trunu nok Tuhan,
bu yanin ong mogipat dinilon.
Oytonin ilon song mga tubud nok tubig nong mokobogoy nok kotubuꞌ,
bu punasan nok Tuhan ong mga luwaꞌ nilon.”