Inawaꞌ nog Bataꞌ Bilibili ong Nom buk sok Pitu buk Podokot nok Kitab
6
Na mitongowu nog inawaꞌ nog Bataꞌ Bilibili ong mikuna podokot sok pitu buk podokot nok kitab linulun.
Doksuꞌ midongogu ok tingog nok solobuk sok pat buk piongon koyon,
miktaluꞌ yanin nong mopagas mamaꞌ nog lugung,
longin,
“Luwasa dini.”
2 Poktontongu,
mitongowu nog linumuwas ok putiꞌ nok kudaꞌ dunut nong mingudaꞌ dun nong migoyit nok panaꞌ.
Binogoyan yanin nok kuruna bangka pokpogobok nok kudaꞌ in posunguꞌ sok pogbunuan,
bu lolayun yanin momondag.
3 Pogawaꞌ nog Bataꞌ Bilibili nog ikoduwaꞌ podokot sok kitab linulun,
midongogu og ikoduwaꞌ nok piongon kituꞌ miktaluꞌ,
“Luwasa dini.”
4 Na linumuwas na sop ok kudaꞌ nok pula.
Ong mingudaꞌ dun kini,
binogoyan nong mosolag nok kalis bug kopatut mokpapas nok poksulut-sulut sog dunya.
Dadi mokpinatoyoy ong mga manusiyaꞌ.
5 Pogawaꞌ nog Bataꞌ Bilibili nog ikotolu podokot sok kitab linulun,
midongogu ok taluꞌ nog ikotolu nok piongon kituꞌ,
longin,
“Luwasa dini.”
Poktontongu,
mitongowu og gitom nok kudaꞌ,
bu ong mingudaꞌ dun kini,
mikketeng nok timbangan.
6 Pokpuwas nituꞌ midongogu ong mamaꞌ nok tingog tidu sok titongaꞌ nok pat buk piongon koyon,
taluꞌ in,
“Og gadji nok tow sondow sumboy topot hadja ponaluy sokaltika nong mobais nok tirigu atawa tolu kaltik nok kanaꞌ mobais nok tirigu.
Sugaid og bunga jaytun bug bunga anggul sumboy diꞌ poglaatan.”
7 Pogawaꞌ nog Bataꞌ Bilibili nog ikopat nok podokot sok kitab linulun,
midongogu ok taluꞌ nog ikopat nok piongon kituꞌ,
longin,
“Luwasa dini.”
8 Poktontongu,
mitongowu ok kudaꞌ nong mimuksiꞌ.
Ong mingudaꞌ dun iningalanan nok Kopatoy,
bu ong migunut sog binayaanin iningalanan nok Poglihanan nong mga Minatoy.
Binogoyan ilon nok kopatut momunuꞌ sog ikopat bahagiꞌ nog dunya biyan sok kalis,
gunus,
saki bug mga binatang talun.
9 Na dangan inawaꞌ nog Bataꞌ Bilibili og ikolima nok podokot sok kitab linulun,
mitongowu ok pokkurbanan.
Sok silung nok pokkurbanan koyon mitongowu ong mga nyawa nong mga tow nog binunuꞌ kobalan sok pokposampoy nilon nok Parman nok Tuhan,
bu pasal sok pomologbog nilon sumaksiꞌ pasal sog Al-Masih.
10 Migdongan-dongan ilon moktaluꞌ nong monamal,
long nilon,
“U Tuhan Mokowasa,
ika ong Mahasutsi bu ok Kosobonnalan.
Andun nu pa hukumoy bu sulioy ong mga manusiyaꞌ sog dunya nong mimunuꞌ dinami?”
11 Dadi binogoyan ong monolokotow dinilon nog juba nog landuꞌ koputiꞌ.
Tubus tinaluan ilon nong mogbagad-bagad na toktob song mojukup og ginantaꞌ nog dakol nong mga duma nilon gulipon nok Tuhan nog bunuon.
Poꞌ bunuon pa ong mga pigilugan nilon sok kotombaꞌ mamaꞌ nong miinang dinilon.
12 Doksuꞌ sunoy pa mitongowu nog inawaꞌ nog Bataꞌ Bilibili og ikonom nok podokot sok kitab linulun.
Na tokkow miglinug nong mopagas.
Miktimaluy gitom ong mata gondow mamaꞌ sopantun nok kokanaꞌ gitom,
bu miktimaluy pula ok tibuk bulan mamaꞌ sopantun nog duguꞌ.
13 Mikpoglabuꞌ sog lupaꞌ ong mga bitun,
mamaꞌ hantang nog gilow nog bunga kayu nong midogdag bilaꞌ mokuyung nong mopagas nog galuꞌ.
14 Og langit mipapas mamaꞌ sopantun nok kolatas nog linulun,
bu mikpokpinda sok kibotangan dun sosuku nok kobontudan bug kopuluan.
15 Dadi miksolobuni ong mga manusiyaꞌ sog diyalom mga langub bu song mga mokosolag nog batu sok kobontudan.
Miksolobuni ong mga sultan bug len miglokounutan sog dunya,
mga kapitan nong mga sundalu,
mga taga kowasa bug mga dayahan.
Song motudin,
kotanan nong manusiyaꞌ,
gulipon bug kanaꞌ gulipon miksolobuni.
16 Mikpokilolat ilon song mga bontud bug mga mokosolag koyon nog batub,
long nilon,
“Dungmaoy niyu ami,
bu buni niyu ami bagun ondiꞌ ami motongow nong migingkud kituꞌ sok trunu,
bu diꞌ ami mosugat nong mulkaꞌ nog Bataꞌ Bilibili.
17 Poꞌ minatong na og waktu nok poghukum nok kotanan manusiyaꞌ,
bu sima na buwan ong mokotatas nong mulkaꞌ nilon?”