Ok Kitab Linulun bu og Bataꞌ Bilibili
5
Doksuꞌ ongon ong mitongowu nok kitab linulun sog lintu nok komot nong migingkud sok trunu koyon.
Ongon ok sinulat sok sobolaꞌ-posobolaꞌ nok kitab bu binotangan nok pitubuk podokot bagun diꞌ moukad.
2 Na mitongowu ong mopagas nong malaikat nog landuꞌ kosolag ok tingogin,
taluꞌ in,
“Sima ok taga kopatut mokawaꞌ nong mga podokot koyon bagun mobukaꞌ og linulun nok kitab koyon?”
3 Sugaid daꞌdun sog langit,
sog lupaꞌ atawa sog diyalom nog lupaꞌ nok taga kopatut mogukad nog linulun nok kitab atawa mogbasta dun.
4 Dadi mikopogaduyu tokodoy poꞌ daꞌdun ong mibalak nok taga kopatut mogukad nok kitab linulun atawa tontongon og diyalomin.
5 Sokaliꞌ ongon ok solokotow tidu song mga migmokogulang miktaluꞌ dinakon,
longin,
“Diꞌ a na mogaduy poꞌ ongon ok tinawag nog Liyon sok pangkatan ni Yahuda nok tidu sok ponupuꞌ ni Sultan Daudb.
Tontong nu ba,
mokowasa yanin poꞌ mimondag yanin sok kowasa nog Iblis,
dadi taga kopatut yanin mogawaꞌ nok pitu buk pidokot bagun moukad ok kitab linulun.”
6 Doksuꞌ ongon ong mitongowu nog Bataꞌ Bilibilic nok taga biyaꞌ gangol mamaꞌ nog bakas na yanin pinatoy.
Migindog yanin song molani nong migingkud sok trunu koyon,
bu linibutan yanin nok pat buk piongon koyon bug mga migmokogulang koyon.
Og Bataꞌ Bilibili koyon ongon pitu buk sungagin bu pitu buk sop ong mata nin,
nog yonin na ok pitu ruh nok Tuhan nok piangoyin sog liwag nog dunya.
7 Mikpolani og Bataꞌ Bilibili koyon sok trunu bangka nin alapoy ok kitab linulun tidu sog lintu komotin.
8 Pogdoksuꞌ alapoy nog Bataꞌ Bilibili ok kitab nog linulun,
sinumudjud diyanin ok pat buk piongon bu og duwaꞌ puluꞌ bu pat migmokogulang.
Sosuku dinilon ongon og ginisan nog biyullad.
Bu ok sosolokotow dinilon taga ponaksan nog bulawan nong miponuꞌ nok komanyan,
nog yonin koyon ong mga pongoni-ngoni nong mga sinutsi nok sukuꞌ nok Tuhan.
9 Puwas nituꞌ bangka ilon pokkolangan nog bogu kolangan nong mamaꞌ nini,
“Ika da ok taga kopatut malap nok kitab linulun
bangka pongawaoy ong mga podokotin bagun mobukaꞌ.
Poꞌ pinatoya
bu mibuyus og duguꞌ nu
bagun molokat nu ong mga tow
supaya ilon moimung nok piktowan nok Tuhan
tidu sog lam nok pangkatan,
bahasa bug kobangsa-bangsahan.
10 Bu inimung nu ilon nong mga sukuꞌ sok Pomarinta nok Tuhan ta
bu mga gimam nong moktolagad diyanin,
bu ilon ong mogbayaꞌ sog dunya.”
11 Doksuꞌ mitongowu bu midongogu ong mga tingog nog landuꞌ kodakol nong malaikat nog diꞌ moitung.
Miglumpuk ilon sog lumibut nok trunu koyon,
sok pat buk piongon bu song mga migmokogulang.
12 Miktaluꞌ ilon nong mopagas nong mamaꞌ nini,
“Og Bataꞌ Bilibili nog bakas pinatoy mopatut potason,
pogbantugon bu pudjihon.
Diyon diyanin ok kowasa,
daya,
kokosun bug pagas.”
13 Doksuꞌ midongogu og lam nok piongon nok Tuhan sog langit,
sog ginlupaan,
sog dagat bu sog diyalom nog lupaꞌ.
Taluꞌ nilon kotanan,
“Og lam nok pokpudji,
pogbantug,
pokpotas,
bug kowasa
diyon sok Pogbayaꞌ-bayaꞌ bu sog Bataꞌ Bilibili solama-lama.” e
14 Na tinumabal ok pat buk piongon koyon,
long nilon,
“Amin.”
Bu sinumudjud mokpudji ong mga migmokogulang.