Pokpudji sok Surgaꞌ
4
Pogdoksuꞌ ongon na sop len nok pitongow dinakon.
Sunoy pa mitongowu ok pintuan sok surgaꞌ nong mibukaꞌ bangka u pokodongog nok tingog nong mamaꞌ nok tombuliꞌ nong miktaluꞌ kituꞌ dinakon tagnaꞌ,
longin,
“Poneka dini poꞌ potongowon ku dinika bug olo og ginantaꞌ matong sog loma-dinglag.”
2 Sododuun sinolodu nog Ruh nok Tuhan,
bu sunoy pa mitongowu sok surgaꞌ ok trunu,
bu ongon ong migingkud dun.
3 Na ong migingkud koyon mosahaya og bayuꞌ-bayuꞌ in mamaꞌ sopantun nog landuꞌ kolingkat nong mga kumalaꞌ nog yasper bug karnelian.
Bu ongon sop sog lumibut nok trunu nin nog binaddali nong mamaꞌ nong mongillap nok kumalaꞌ nog emerald.
4 Pilibutan ok trunu nin nog duwaꞌ puluꞌ bu pat trunu nok pigingkudan nog duwaꞌ puluꞌ bu pat migmokogulang.
Mimonapot ilon nok putiꞌ bu miksolug ilon nok kuruna nog bulawan.
5 Na tidu sok trunu koyon ongon mikkillap-killap nok kilat,
miktonug-tonug bu miglugung-lugung.
Sog gadapan nok trunu koyon ongon pitu buk miksahaya nog ligaꞌ nog yonin na ok pitu ruh nok Tuhana.
6 Sog gunahan nok trunu koyon ongon mamaꞌ hantang nog dagat nog landuꞌ kotinow mamaꞌ nok solamin.
Sog lumibut nok trunu koyon ongon ok pat buk piongon nong milokop nong mata og lawas nilon.
7 Ong muna,
mamaꞌ sopantun nog liyun,
og ikoduwaꞌ mamaꞌ sopantun nok turu sapiꞌ,
og ikotolu,
og dagbosin mamaꞌ sopantun nok tow.
Bu og ikopat koyon mamaꞌ sopantun nong miglayug-layug nog banug.
8 Ong monolobuk dinilon ongon ok pokpak nom buk bu milokop nong mata sog diyalom bug dibabow.
Gobi-gondow daꞌdun lotaꞌ nilon mokpudji,
taluꞌ nilon,
“Sutsi,
sutsi,
sutsi ok Tuhan Pogbayaꞌ-bayaꞌ nong Mokowasa,b
og asal na ongon tidu sok tolipunan mangoy song ningkomun,
sampoy solama-lama.”
9 Ok pat buk piongon kini mokpotas,
mogbantug bu moksarang-sukul sok Tuhan nok totubuꞌ solama-lama bu migingkud sok trunu nin.
10 Soliyan nilon mokpudji,
sinumudjud mokpudji og duwaꞌ puluꞌ bu pat migmokogulang koyon sok Tuhan nok solama-lama ongon.
Pingawaꞌ nilon ok kuruna nilon bangka botangoy sog gadapan nok trunu nin,
bu taluꞌ nilon,
11 “U Pogbayaꞌ-bayaꞌ,
ok Tuhan nami,
ika da ong mopatut potason,
pogbantugon bu pudjihon.
Poꞌ ika ong mokowasa nong migimung nok kotanan nituꞌ,
bu pasal sok kolegan nu miongon ok kotubuꞌ nog lam nok piongon nu.”