Ok Sulat ni Isa Al-Masih sog Jomaa sok Sardis
3
Bu miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Sardis:
Ok pokposun kini tidu dinakon,
ok taga pitu ruh nok Tuhana bu ong migonggayd nok pitu buk bitun kituꞌ.
Na yonin kini ok taluꞌ u diniyu:
Kiosunan ku ong mga pinginang niyu.
Totubuꞌ dow ok kotombaꞌ niyu,
sugaid song motudin mamaꞌ amu sopantun nok patoy.
2 Dadi pokpotubud amu bangka niyu popagon ong misamaꞌ koyon nok kopongandol niyu,
bagun ondiꞌ mobolong nok tantu.
Poꞌ mitongowu ok kokohinang niyu kanaꞌ mosuat sok kolegan nok Tuhan ku.
3 Pokpuliꞌ amu sok kosobonnalan nog bakas niyu midongog bu tinabuk.
Unutoy niyu pahatul,
bu poktowbatoy niyu ong mga dusa nong miinang niyu.
Sugaid bilaꞌ diꞌ amu mokpotubud,
matongu nong motokkow mamaꞌ hantang nok polonakow nog diꞌ kosunan og datongin.
4 Sugaid ongon sanu kotow diniyu diyon sog bonuwa Sardis og ondaꞌ tokodoy kopalitoy nok kolaatan.
Mogunut ilon dinakon poꞌ ilon koyon sutsi bu motolop moksolug nok putiꞌb.
5 Sima-sima ong momondag sok poksuloy,
posolugon ilon nog juba putiꞌ,
bu diꞌ u tokodoy papason ong mga ngalan nilon sok Kitab Kotubuꞌ nog yonin na poksulatan nong mga ngalan nong mga mosurgaꞌ solama-lama.
Angkonon ku nog ilon koyon mga sukuꞌ u sog gadapan nog Gommaꞌ u bu song mga malaikatanin.
6 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nog jomaa.”
Ok Sulat ni Isa Al-Masih sog Jomaa sok Piladelpiya
7 Na migdayun pa mokposampoy ong mamaꞌ nog bataꞌ nong manusiyaꞌ kituꞌ dinakon,
ok taluꞌ in,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Piladelpiya:
Ok pokposun kini tidu dinakon,
ong Mahasutsic bu ok Kosobonnaland,
bu ok taga kopatut mogonggayd nok kunsiꞌ nok pogbayaan ni Sultan Daud.
Akon ong mokobukaꞌe,
bu daꞌdun muwal mokotambol dun.
Bu bilaꞌ sop tambolon ku,
daꞌdun sop muwal ong mokobukaꞌ dun.
Na yonin kini ok taluꞌ u diniyu:
8 Kiosunan ku ong mga pinginang niyu.
Ponginongog amu!
Binukaꞌ u na og bongowan para diniyu nog daꞌdun bisan sima ong mokotambol dun.
Poꞌ bisan kulang ok kopagas niyu,
tinombaan niyu ok pinonduꞌ u,
bu daꞌ niyu akon poliluhoy.
9 Na ongon diyon ong mga tow nong mangkon nog Yahudi ilon,
ok piktowan nok Tuhan,
sugaid kanaꞌ koyon motud.
Moloput ilon,
poꞌ sukuꞌ ilon nog Iblis.
Ponginongog amu!
Ongon da og waktu nok posudjudon ku ilon diyon sog gadapan niyu,
bangka nilon kosunoy nong molasa u diniyu.
10 Ongon matong og landuꞌ nok sigpit gantaꞌ poksuloy sog lam nong manusiyaꞌ sog dunya.
Sugaid puwason ku amu sok sigpit koyon poꞌ inunut niyu ok suguan ku nok sumboy mosabar amu.
11 Ondiꞌ na mobon,
matongu da.
Diꞌ niyu tibuwa lukatan ok pongandol niyu,
bagun daꞌdun bisan sima ong mokodagit nok tumbas nog bogoyon ku diniyu.
12 Sima-sima ong momondag sok poksuloy,
imungon ku yanin mamaꞌ sopantun nong mopagon nog gugdok sog Baloy nok Tuhan ku,
bu diꞌ na ilon mawaꞌ sok pogonongan nok Tuhan solama-lama.
Sulatan ku ilon nong ngalan nok Tuhan ku,
og gindanan nok sukuꞌ in ilon,
bu ong ngalan nok siyudadin,
nog yonin na og bogu Jerusalem nok poponogonin tidu sok surgaꞌ.
Sulatan ku da sop ilon nog bogu ngalan ku.
13 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nog jomaa.”
Ok Sulat ni Isa Al-Masih sog Jomaa sog Laudikiya
14 Na miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Laudikiya:
Ok pokposun kini tidu dinakon,
ok tinawag nog Amin,
bu ok kopongandolan mokposobonnal pasal sok Tuhan.
Akon ok piktiduhan sok kotanan nog inimung nok Tuhan.
Na yonin kini ok taluꞌ u diniyu:
15 Kiosunan ku ong mga pinginang niyu.
Mamaꞌ amu sopantun nok tubig nok kanaꞌ tantu minit bu kanaꞌ da sop tantu motigdow.
Golom pa bosiya bilaꞌ minit atawa motigdow.
16 Dadi pagga kanaꞌ ikhlas ok pogunut niyu dinakon,
awaon ku amu sog diyaloman ku mamaꞌ sopantun nog luwaon og ginumon nong molaton nanamin.
17 Poꞌ miktaluꞌ amu nog dayahan kamu,
mikalap amu nong modakol nog gartaꞌ,
bu daꞌdun na mga kulang niyu.
Sugaid ondaꞌ niyu kosabut nog landuꞌ amu kololat-lolat,
poꞌ sok ponontong nok Tuhan miskin amu tokodoy,
buta amu pasal sok kosobonnalan,
bu miglobas amu sok ponontong nok Tuhan.
18 Dadi,
pituwahan ku amu.
Alap amu dini dinakon nong motud nog bulawan nok pibiyan ku sog gapuy bagun kamu moimung motud nog dayahan sok ponontong nok Tuhan.
Alap amu da sop dinakon nok ponapot nok putiꞌf bagun mawaꞌ na ok sipog niyu pasal sok poglobas niyu.
Bu alap amu dini dinakon nog bulung pongloklas song mata niyu bagun motongow niyu ok kosobonnalan nong mokoyt diniyu sok kotubuꞌ solama-lama.
19 Ok sosuku nok kolasahan ku,
pogbinaan bu paaton ku,
bu tintuluon ku ilon posunguꞌ sog dalan mologdong.
Dadi poktowbat amu bu pogikhlas niyu ok pogunut niyu dinakon.
20 Ponginongog amu!
Migindogu diyon sok pintuan nok pongatoyan niyu bangka u ponoktok mokibukaꞌ.
Dadi sima-sima ong mokodongog nok tingogu bangka nin akon bukaoy,
sumolodu bangka u salu kuman dunut diyanin.
21 Sima-sima ong momondag sok poksuloy,
pingkudon ku yanin sok trunu u mogbayaꞌ dunut dinakon,
mamaꞌ nong mimondagu bu migingkudu sok trunu nog Gommaꞌ u mogbayaꞌ dunut diyanin.
22 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nog jomaa.”