Ok Sulat ni Isa Al-Masih sog Jomaa sog Epesus
2
Miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa sog bonuwa Epesus:
Ok pokposun kini tidu dinakon,
ong migonggayd nok pitu buk nog bitun sog lintu nok komotu,
bu mipanow kituꞌ sok titongaꞌ nok pitu buk pogontudan nok politaan miglunsan bulawan kituꞌ.
Na yonin kini ok taluꞌ u diniyu:
2 Kiosunan ku ong mga kokohinangan niyu,
bu kisuatan ku sok koponamal nok poktiksaꞌ niyu bug poksabar niyu.
Kisuatan ku da sop nong mosusa amu sok kolaatan nong mga tow.
Pinoligsaꞌ niyu ong mga minangkon nong mokpoposampoy ilon pasal dinakon,
sugaid kanaꞌ da motud,
bu kisaksian niyu nong migloput ilon.
3 Miksandal amu,
bu tiniggolan niyu og olo-olo nituꞌ pasal song ngalan ku,
bu daꞌ niyu da lukatoy ok kotombaꞌ niyu.
4 Sugaid ongon ok sinallaꞌ u diniyu,
yonin na og lasa niyu kanaꞌ na mamaꞌ nog lasa niyu tagnaꞌ nog bogu tombaꞌ amu.
5 Pomondom niyu bug andun kosolag og lasa niyu tagnaꞌ kituꞌ,
bu poktowbat amu bangka niyu inang mokpuliꞌ ong mga pinginang niyu kituꞌ tagnaꞌ.
Bilaꞌ diꞌ amu moktowbat,
mangoyu diyon bangka u awaoy ok pogontudan nok politaan sog binotangan dun.
6 Sugaid ongon pa ok kisuatan ku diniyu,
kilingitan niyu ok pinginang nok tumpukan ni Nikolay nok kilingitan ku da sop pasal sok kolaatan nilon.a
7 Dadi sosuku nong monginongog,
unut niyu ok taluꞌ nog Ruh nok Tuhan song mga jomaa nong mga moktotombaꞌ.
Sima-sima ong momondag sok poksuloy,
duhulan ku nok kopatut kuman nog bunga kayu nong mokobogoy nok kotubuꞌ solama-lama nog dituꞌ sog landuꞌ kolingkat nok pogonongan nok Tuhan.”
Ok Sulat ni Isa Al-Masih sog Jomaa sog Ismirna
8 Miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Ismirna:
Ok pokposun kini tidu dinakon,
ong Muna bu og Binayaꞌ.
Bakasu minatoy,
tibuwa mitubuꞌ u mokpuliꞌ.
Na yonin kini ok taluꞌ u diniyu:
9 Kiosunan ku ok kobinsanaan niyu bu ok komiskinan niyu.
Sugaid song motudin,
dayahanb amu sok surgaꞌ.
Kiosunan ku ok pogunda-unda diniyu nong mga tow nong mangkon nog Yahudi ilon,
ok piktowan nok Tuhan.
Sugaid kanaꞌ koyon motud,
poꞌ sukuꞌ ilon nog Iblis.
10 Diꞌ amu mondok sok sosuku nok kobinsanaan nog dumatong diniyu.
Ponginongog amu,
ongon sok kodumahan niyu og botangon nog Iblis sog diyalom pirisuhan gantaꞌ suloy diniyu.
Bu mobinsanaꞌ amu pasal sok kotombaꞌ niyu sog bon nok sopuluꞌ ondow.
Sugaid pogot niyu ok kotombaꞌ niyu dinakon,
bu naꞌ niyu bolongon bisan pa moposunguꞌ kini sok kopatoy,
poꞌ tumbasan ku amu nong mosannang nok kotubuꞌ solama-lama.
11 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nong mga jomaa.
Sima-sima ong momondag sok poksuloy,
diꞌ tokodoy mosugat nog ikoduwaꞌ kopatoy nog yonin na ok siksaꞌ solama-lama.”
Ok Sulat ni Isa Al-Masih sog Jomaa sok Pirgamu
12 Bu miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Pirgamu:
Ok pokposun kini tidu dinakon,
ok taga kalis kituꞌ nok sobolaꞌ-posobolaꞌ ok kutongin.
Na yonin kini ok taluꞌ u diniyu:
13 Kiosunan ku nong migonong amu sog bonuwa nong modakol ok pigbayaan nog Iblis,
sugaid mopagon da ok pongandol niyu dinakon.
Daꞌ niyu da akon tolikudoy bisan pa sog waktu nok pinatoy diyon sog bonuwa niyu si Antipas,
ong moliunungoy nong mokpoposampoy pasal dinakon.
14 Sugaid ongon ok sinallaꞌ u diniyu.
Ongon sok kodumahan niyu ong migunut song mga pononduꞌ ni Balaam song masa tagnaꞌ kituꞌ.
Tinonduꞌ in diyon ni Sultan Balak bug ponoy ok poksassat sog bangsa Israel.
Dadi mioyit ilon ni Sultan Balak mogdusa biyan sok pokkan nog jinamu para sok tuhan-tuhan bu biyan sok pogjina.
15 Bu ongon da sop mga kodumahan niyu migunut song molaat nok pononduꞌ nok tumpukan ni Nikolay.
16 Saan na poktowbat amu,
poꞌ bilaꞌ ondiꞌ,
mangoyu diyon nong mosompun bangka u amu bunuoy nok kalis kituꞌ tidu sog babaꞌ u.c
17 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nog jomaa.
Sima-sima ong momondag sok poksuloy,
bogoyan ku ilon nok kand nok tinogama u para dinilon sok surgaꞌ.
Ong monolokotow koyon bogoyan ku nog batu nok putiꞌ nok sinulatan nog bogu ngalanin nog daꞌdun ong mokokosun dun muwal da og binogoyan dun.”
Ok Sulat ni Isa Al-Masih sog Jomaa sok Tiyatira
18 Miktaluꞌ pa ong mamaꞌ nog bataꞌ nong manusiyaꞌ kituꞌ dinakon,
“Sulat nu kini posunguꞌ song mokpoposampoy kituꞌ sog jomaa nong mga moktotombaꞌ sog bonuwa Tiyatira:
Ok pokposun kini tidu dinakon,
og Bataꞌ nok Tuhan nok taga mata mamaꞌ nog ligaꞌ nog gapuy,
bu taga botis mamaꞌ nok tumbaga nong mosinow.e
Na yonin kini ok taluꞌ u diniyu:
19 Kiosunan ku ong mga pinginang niyu,
bug ponoy kosolag og lasa niyu,
kotombaꞌ niyu,
poktolagad bug kotabang niyu,
sampoy ok poksandal niyu sok kosigpitan.
Labi pa og ininang niyu song ningkomun kini tidu sok pinginang niyu kituꞌ tagnaꞌ.
20 Sugaid ongon ok sinallaꞌ u sok tumpukan niyu.
Pisagadan niyu og libun nok si Yesebelf nong mikpobaluꞌ-baluꞌ nabi.
Minonduꞌ yanin toktob nong midupangin og duma nog gulipon ku.
Dadi mioyit ilon mogjina bu kuman nog jinamu para sok tuhan-tuhan.
21 Binogoyan ku na yanin nog waktu mokopoktowbat,
sugaid diꞌ tokodoy yanin meleg lumotaꞌ sok pogjina nin.
22 Dadi ponginongog amu,
bogoyan ku na yanin nok saki toktob diꞌ na yanin mokobuwat.
Bu ok sosuku duma nin mogjina,
binsanaan ku da sop tokodoy bilaꞌ ondiꞌ nilon poktowbatan ok kolaatan koyon.
23 Ong mga mogogunut diyanin,
patoyon ku bagun kosunan nog lam nok tumpukan nog jomaa nok kiosunan ku og diyalom pongatoyan bug pikilan nilon,
bu tumbasan ku kokoniya song miinangin.
24 Sugaid amu,
mga duma diyon sok Tiyatira nog daꞌ pogunut sog loput nok ponintuluꞌ ni Yesebel,
bu daꞌ poganad nong modalom nok pononduꞌ nok tidu sog Iblis,
ongon ok taluon ku diniyu:
Ondiꞌ u amu dungagan nong mobogat nok suguan nok sumboy niyu unuton.
25 Sugaid diꞌ niyu tibuwa lukatan ok pongandol niyu taman sok kopokpuliꞌ u.
26 Dadi sima-sima ong momondag sok poksuloy bu mokpodayun moginang nok kolegan ku toktob sok kodoksuan,
bogoyan ku yanin nok kopatut mogbayaꞌ sok kobangsa-bangsahan,
27 mamaꞌ nog binogoyan ku da sop nog Gommaꞌ u.
Na daꞌdun ong mokatu sok pomarinta nilon.
Ong mongatu dun mongmula,
moimung mamaꞌ nog banggaꞌ nong molupot pasal sok pogbombal nok tungkod bosi.
28 Ong mga momondag bogoyan ku da sop nog labi mosahaya bu mosolag nog bitun nong motampal sog doliꞌ-ondow.g
29 Dadi sosuku nong monginongog,
unut niyu ok taluꞌ nog Ruh nok Tuhan song mga tumpukan nog jomaa.”