Miimung ita niyu nog Gumbataꞌ nok Tuhan
3
Pikil niyu ba ponoy kosolag og lasa nok Tuhan og Gommaꞌ ta dinita,
poꞌ tinawagin ita nong mga gumbataꞌ in.
Bu motud tokodoy nong miimung ita nong mga gumbataꞌ in.
Sugaid ong mga tow sog dunya nog daꞌ tombaꞌ,
ondaꞌ ilon pokokilala dinita nog gumbataꞌ ita nok Tuhan poꞌ daꞌ ilon buwan pokokilala sok Tuhan.
2 Na mga kolasahan,
mga bataꞌ ita niyu na nok Tuhan,
sugaid daꞌ pa potampaloy bug olo ok kobotang-botang ta lomaꞌ-dinglag.
Tibuwa pogdatong ni Isa Al-Masih dini mokpuliꞌ,
kiosunan ta nong moimung ita mamaꞌ diyanin poꞌ motongow ta bug ponoy tokodoy yanin.
3 Dadi sima-sima ong mingandol ni Isa Al-Masih bu migdodama sok pokpuliꞌ in,
lonuonin ok pongatoyanin poꞌ mosutsi si Isa Al-Masih.
4 Sima-sima ong mokodusa,
modugtulin ok suguan nok Tuhan,
poꞌ og dusa,
yonin na ok pogdugtul sok saraꞌ.
5 Sugaid kiosunan niyu nong minatong dini sog dunya si Isa Al-Masih bagun moawaꞌ in ong mga dusa ta.
Bu yanin,
daꞌdun tokodoy og dusa nin.
6 Dadi sosuku nok tow nok sinumolobuk diyon ni Isa Al-Masih,
hallian na nilon monginang nok kodusahan.
Sugaid sosuku nong mokpodayun monginang nok kodusahan,
ondaꞌ nilon kosunoy bug sima tokodoy og Al-Masih,
bu diꞌ nilon yanin kolilahan.
7 Mga piglogumbataan ku,
pokpotubud amu bagun diꞌ amu moyit sok kanaꞌ mosobonnal nok pononduꞌ nong mga migbalu-baluꞌ nog guru nong meleg moglimbung diniyu.
Sima-sima ong monginang nok kologdongan,
na yanin koyon mologdong,
mamaꞌ ni Isa Al-Masih.
8 Sugaid ok tow nong mogdayun monginang nog dusa,
na yanin koyon ampuꞌ sog Iblis poꞌ og Iblis minginang nok kodusahan tidu pa sok ponognaan.
Tibuwa og Bataꞌ nok Tuhan,
minatong yanin sog dunya bagun laatonin ong mga ginang nog Iblis.
9 Sosuku nong miimung na nog bataꞌ nok Tuhan,
diꞌ monginang nok kodusahan poꞌ binogu na nok Tuhan ok pongaddatanin.
Diꞌ na yanin mokodayun monginang nog dusa poꞌ binataꞌ yanin puliꞌa biyan sok kowasa nok Tuhan.
10 Dadi ningkomun motampal bug sima ong mga bataꞌ nok Tuhan bu sima ok piglogumbataan nog Iblis.
Sima-sima og diꞌ monginang nok kologdongan bu diꞌ lumasa sog gilugin sok kotombaꞌ,
na yanin koyon ondaꞌ koitung nog bataꞌ nok Tuhan.
Sumboy Moglinasahoy ita
11 Na sumboy moglasa-linasahoy ita niyu.
Yonin kini ok tintuluan nong midongog niyu tidu pa sok tolipunan nok tinumombaꞌ amu.
12 Diꞌ ta niyu pogdogilingan si Kabil.
Ok sukuꞌ yanin nog Iblis,
dadi pinatoyin og gilugin.
Na manu ma pinatoyin?
Pasal si Kabil minginang nok kolaatan,
bu og gilugin minginang nok kologdongan.
13 Saan na mga koilugan ku sok kotombaꞌ,
diꞌ amu mosobuꞌ bilaꞌ mogdumut diniyu ong mga manusiyaꞌ nog daꞌ tombaꞌ.
14 Tagnaꞌ mamaꞌ ita hantang nong mga patoy,
maana nin misuwoy ita sok Tuhan.
Sugaid ningkomun binogoyan ita nog bogu kotubuꞌ tidu diyanin,
saan na moglasa-linasahoy ita.
Tibuwa,
sosuku nog daꞌdun poglasa nin,
mamaꞌ pa yanin hantang tow patoy bu misuwoy pa sok Tuhan.
15 Sima-sima ong mogdumut sok pigiluganin,
mamaꞌ yanin nok polomunuꞌ,
bu kiosunan ta niyu ok polomunuꞌ daꞌdun ong mosannang nok kotubuꞌ in solama-lama.
16 Kiosunan ta bug ponoy ong motud nok poglasa,
poꞌ og Al-Masih piglillaꞌ in ok kotubuꞌ in para dinita.
Dadi ita,
sumboy da sop poglillaꞌ ta ok kotubuꞌ ta para song mga koilugan ta niyu.
17 Bilaꞌ ongon-ongonan ita,
sugaid ondiꞌ ita tumabang sog gilug ta nok kilogonan,
maana nin,
daꞌdun na ok poglasa ta sok Tuhan.
18 U mga piglogumbataan ku,
ok poglasa ta sumboy kanaꞌ tibuwa taman sok taluꞌ,
sugaid sumboy mopomotud biyan song mobais nog ginang.
19 Na bilaꞌ molasa ita sok koilugan ta,
kiosunan ta nong mogunut ita sok pononduꞌ nok kosobonnalan,
bu mopotonaꞌ ta ok pongatoyan ta bilaꞌ madap ita sok Tuhan.
20 Dadi bisan sok pikilan ta nok patut ita poponogan nog hukuman,
diꞌ ita mondok poꞌ labi mosolag ok Tuhan tidu sok pikilan ta,
bu yanin ong mikokosun sok kotanan.
21 Mga kolasahan,
bilaꞌ daꞌdun da og gondok ta nok poponogan ita nog hukuman,
motowakkal ita madap sok Tuhan.
22 Bu bogoyonin dinita ok pongonihon ta,
poꞌ unuton ta ok suguanin,
bu inangon ta ong mosuat diyanin.
23 Dadi yonin kini ok suguan nok Tuhan nok tumombaꞌ ita niyu song ngalan nog Bataꞌ in nok si Isa Al-Masih bu moglasa-linasahoy ita,
mamaꞌ na nok sinuguꞌ in dinita niyu.
24 Sima-sima ong mogunut sok suguan nok Tuhan,
na mokpotattap sok Tuhan,
bu mokpotattap ok Tuhan dinilon.
Na kiosunan ta nong mokpotattap ok Tuhan dinita pasal sog Ruh nin nog binogoyin dinita.