Ok Tagnaꞌ Saraꞌ pasal sok Poksumba sog Langgal
9
Na sog Dan Pigjanjian nok Tuhan bug mga tow,
ongon ong mga suguan pasal sok poksombahayang bu pasal sog Langgal nok pitindog nilon sog ginlupaan mimala.
2 Og Langgal kini,
duwaꞌ buk og bilikin,
bu inolot nok kurtina.
Og ikosolobuk bilik,
iningalanan nog Bilik Sutsi.
Diyon mibotang ok politaan,
lomisahan bug pan poksodokka nilon para sok Tuhan.
3 Og ikoduwaꞌ bilik sok sobolaꞌ nok kurtina,
iningalanan nog Bilik Mahasutsi.
4 Na sog bilik kituꞌ ongon ong mobeteꞌ lomisahan nok pidibabowan nog bulawan bug ayin nilon poktutungon ok komanyan.
Dituꞌ da sop ok kaban nok tinawag nok Kaban Pigjanjiana nong miputus nog bulawan.
Sog diyalomin ongon og banggaꞌ bulawan taga kan nong mannab,
ok tungkod ni Harun nok tinubuan nog dawon bu duwaꞌ buk batu lokpiꞌ nok sinulatan nok sopuluꞌ suguan nok Tuhan.
5 Sok tas nok Kaban Pigjanjian ongon duwaꞌ buk tow-tow bayuꞌ-bayuꞌ malaikatc miksunguꞌ,
yonin na og gindanan sok kotas nok Tuhan.
Ok pokpak nilon mamaꞌ nong migatop sok tutup bulawan nok Kaban Pigjanjian bug ayin pisikon og duguꞌ nok kurban para pogampun nog dusa.
Sugaid diꞌ ita pa mokopogabit-abit nok kotanan dun koyon ningkomun.
6 Dangan migusoy-usoy na ok kobotang nok kotanan nog langkap sog diyalom nog Langgal koyon,
gondow-gondow na sumolod ong mga gimam song mikuna nog bilik,
yonin na og Bilik Sutsi.
Dituꞌ ilon moktolagad bu moksumba sok Tuhan mounut sog winakil dinilon.
7 Sugaid sog Bilik Mahasutsi,
mokosolod hadja ok kinotasan nog gimam insan sotahun.
Sog waktu yanin sumolod,
mogoyit yanin nog duguꞌ nog wakilonin sok Tuhan para sog dusa nin bug dusa nok kotanan nok tow nog daꞌ nilon kosayuhoy.
8 Saan na mikpotampal og Ruh Mahasutsi nog ondiꞌ pa mobukaꞌ ok piktambol song Mahasutsi nog Bilik kituꞌd,
bagun mokosolod ok sima-sima towoy madap sok Tuhan sog bon nong mga tow sog diyaloman pa nog Dan Pigjanjian.
9 Og Langgal masa tagnaꞌ bu ong mga kibiyan-biyanan dituꞌ mopononggiꞌ song miinang ningkomun.
Poꞌ minsan mogoyit-oyit ong mga tow nok sodokka bu kurban posunguꞌ sok Tuhan,
diꞌ mosutsi ok pongatoyan nilon biyan dun.
10 Ong mga ininang nilon kituꞌ pasal da sok pongonganon bug poginumon,
bu ginisan pa nok poglonuꞌ nog olo-olo nituꞌ bug pogayir.
Dadi ong mga suguan koyon miunut hadja toktob piponog nok Tuhan og Bogu Pigjanjianin.
Og Duguꞌ ni Isa Al-Masih
11 Dangan minatong og Al-Masih,
nog yonin na ok Kinotasan nog Gimam sog Bogu Pigjanjian nong mobais pa tidu song mikuna kituꞌ,
sinumolod yanin sog labi motas bu jukup nok Poksosombahayangan.
Ok Poksosombahayangan koyon kanaꞌ inimung nok tow,
bu ondaꞌ kobotang sog dunya.
12 Insan da sinumolod si Isa sog Bilik Mahasutsi sok Poksosombahayangan koyon.
Bu kanaꞌ og duguꞌ nok kambing bug sapiꞌ og inoyitin,
sugaid og duguꞌ in tokodoy.
Dadi biyan sok kopatoyin,
linokatin ita bagun moampun ong mga dusa ta solama-lama.
13 Sog Dan Pigjanjian bilaꞌ mokodusa ong mga tow,
pisikan ilon nog duguꞌ nok kambing bug sapiꞌ nog laki,
sampoy og gabu nong nati sapiꞌ tinutung inampuꞌ sok tubig.
Yonin na og dalanan mosutsi ong mga lawas nilon mokpuliꞌ,
bu mokopoksombahayang na ilon.
14 Na og duguꞌ ni Isa Al-Masih labi pa tokodoy mokowasa tidu sog duguꞌ nong mga potubuon kituꞌ.
Biyan sok kowasa nog Ruh Mahasutsi nog daꞌdun ok kodoksuanin,
piglillaꞌ ni Isa og ginawa nin sok Tuhan para song mga manusiyaꞌ.
Yanin ok kurban nog daꞌdun ok sallaꞌ in.
Saan na og duguꞌ in ong mokosutsi nok pongatoyan bu pikilan ta niyu tidu song mga ponginangon nog ondiꞌ mokoawon dinita.
Dadi pasal niyon poktolagadan ta na ok Tuhan,
ok totubuꞌ solama-lama.
15 Saan na si Isa Al-Masih ong mongongolot sog Bogu Pigjanjian bagun motabuk nok sosuku nok tinawag nok Tuhan og jinanjiꞌ in nok pusakaꞌ nog daꞌdun ok kodoksuanin.
Poꞌ biyan sok kopatoyin,
linokatin ong mga tow nog dinumugtul song mga suguan sog diyaloman nog Dan Pigjanjian.
16 Na bilaꞌ soupama ongon ok tow mogimung nok sulat pusakaꞌ pasal sog gartaꞌ in,
sumboy pomotudon nong minatoy na ong migimung nini bangka pa kini taga bisa.
17 Poꞌ daꞌdun og bisa nok sulat pusakaꞌ bilaꞌ totubuꞌ pa ong migimung nini.
Ongon hadja og bisa nin bilaꞌ minatoy na ok tow kituꞌ.
18 Na mamaꞌ niyon da sop ok saraꞌ song mikuna nok pigjanjian kituꞌ.
Diꞌ mogdadi bilaꞌ daꞌdun ong matoy nok potubuon bu mobuyus og duguꞌ in,
poꞌ og duguꞌ,
ong mokpomotud nok pogjanjian.
19 Dangan miposampoy na ni Nabi Musa og lam nok suguan nok Tuhan song mga tow,
inalapin og duguꞌ nok sapiꞌ bug kambing bangka ampuoy sok tubig.
Doksuꞌ nituꞌ minalap na sop yanin nok sopungpung nok pomulan hissup bug bolohibu nog bilibili tininaꞌ nok pula bangka nin dulitoy sog duguꞌ.
Tubus pinisikin sok Kitab nok sinulatan nok suguan nok Tuhan,
bu pinisikanin da sop ok kotanan nong mga tow.
20 Puwas nituꞌ miktaluꞌ yanin,
“Og duguꞌ kini,
yonin na ok sinumaksiꞌ sok pigjanjian nok sinuguꞌ nok Tuhan dinita mogunut.”e
21 Pinisikanin da sop nog duguꞌ og Langgal bug kotanan nog langkap dituꞌ nog ginamit sok poktolagad sok Tuhan.
22 Song motudin,
mounut sok saraꞌ ni Nabi Musa,
lam-lam kotanan nog olo-olo sutsihon biyan sog duguꞌ.
Bu bilaꞌ daꞌ kobuyusoy nog duguꞌ nok kurban,
ondiꞌ moampun og dusa.
Si Isa Al-Masih, ok Kurban Pokpapas nog Dusa
23 Na og Langgal bu ong mga langkapin dini sog dunya,
mopononggiꞌ hadja sog olo-olo nog dituꞌ sok surgaꞌ.
Dadi dumait nok sutsihon dun og duguꞌ nok potubuon,
sugaid og duguꞌ nok kurban nog inoyit sok surgaꞌ sumboy labi pa tokodoy mohalgaꞌ tidu pa sog duguꞌ nong mga kurban nog oyiton sog Langgal tagnaꞌ.
24 Poꞌ daꞌ solod og Al-Masih sog Bilik Mahasutsi nog inimung nong manusiyaꞌ,
sugaid dituꞌ tokodoy sok surgaꞌ bagun madap sok Tuhan para dinita niyu.
25 Daꞌ solod og Al-Masih sok surgaꞌ bagun mokpuliꞌ-puliꞌ kurbanon og lawasin.
Kanaꞌ yanin mamaꞌ nok kinotasan nog gimam sog dunya nok kada tahun sumolod mogoyit nog duguꞌ nok potubuon sog Bilik Mahasutsi.
26 Poꞌ bilaꞌ mamaꞌ yanin nog duma nok koimaman nong mga Yahudi,
sumboy bosiya mokpuliꞌ-puliꞌ yanin mokobiyan nok kobinsanaan bug kopatoy tidu pa sok tolipunan nog dunya.
Tibuwa mikpotongow na yanin insan nog diꞌ na mobon ok kodoksuan nog dunya,
bagun papasonin og dusa ta biyan sok piglillaꞌ in og ginawa nin miimung nok kurban.
27 Asal na ginantaꞌ ong manusiyaꞌ nog insan da matoy,
doksuꞌ niyon hukumon ilon nok Tuhan.
28 Dadi si Isa Al-Masih sooy,
insan da minatoy.
Lamigin piglillaꞌ og lawasin moimung kurban bagun mopapas og dusa nong modakol nong manusiyaꞌ.
Mokpotongow yanin puliꞌ song mga tow loma-dinglag,
kanaꞌ na sabap sog dusa nilon,
sugaid bagun awononin ok sosuku nok tow nong mogbagad-bagad diyanin.