Si Isa ok Kinotasan nog Gimam
8
Dadi pologdongan ku na amu,
ongon na ningkomun ok Kinotasan nog Gimam ta niyu miningkud sog dapit lintu nok Tuhan Mahatinggi sok surgaꞌ.
2 Dituꞌ yanin ningkomun miktolagad sog landuꞌ kosutsi,
yonin na ong motud nok poksosombahayangan inimung nok Tuhan,
kanaꞌ inimung nong manusiyaꞌ.
3 Ok sosuku nok Kinotasan nog Gimam mipiliꞌ ilon mogwakil nok sodokka bug kurban sok Tuhan.
Dadi pagga miimung og Al-Masih nok Kinotasan nog Gimam,
ongon da sop og binogoyin sok Tuhan,
yonin na ok kopoglillaꞌ in nog ginawa nin.
4 Sugaid bilaꞌ dini pa si Isa sog dunya,
ondiꞌ yanin moimung nog gimam sog Langgal,
poꞌ ongon da dini ok koimaman nong mogwakil nok sodokka bug kurban sok Tuhan mounut sok saraꞌ nok piponog biyan ni Nabi Musa.
5 Ok poktolagad nong mga gimam dini sog dunya,
ok pononggiꞌ hadja nog olo-olo sok surgaꞌ.
Poꞌ dangan mikpindog si Nabi Musa nog Langgal,
pidinsamaan yanin nok Tuhan,
“Amoy-amoy nog imungon nu og lam nituꞌ
mounut sok pitongowu dinika dini sog bontud.”a
6 Sugaid song ningkomun kini,
landuꞌ pa kotas ok poktolagad ni Isa tidu sok kotanan nok koimaman sog Dan Pigjanjian,
poꞌ yanin ong mongongolot dinita sog Bogu Pigjanjian tidu sok Tuhan.
Mobais pa og Bogu Pigjanjian kini tidu sog dan kituꞌ,
poꞌ mobais pa ong mga janjiꞌ in.
7 Poꞌ bilaꞌ daꞌdun ok kulang sog Dan Pigjanjian,
ondiꞌ tokodoy gantian nok Tuhan nog len.
8 Sugaid ongon ok sinallaꞌ nok Tuhan sok piktowanin,
saan na miktaluꞌ yanin
“Matong da og waktu nok poongonon ku og bogu pogjanjian diyon diniyu mga taga Israel bu mga taga Yahudiya.b
9 Ok pogjanjian kini,
kanaꞌ batuk sog inimungu tagnaꞌ song mga pingapuꞌ niyu
dangan inoyitu ilon lumuwas tidu song Misir,
sugaid ondaꞌ nilon kounut ok pigjanjian ku dinilon.
Saan na kituꞌ,
pitiyangan ku ilon,”
taluꞌ nok Tuhan.
10 “Na yonin kini og bogu pogjanjian nog imungon ku song mga tow Israel sog gondow koyon.
Botangon ku ong mga suguan ku sok pikilan nilon,
bu sulaton ku diyon sok pongatoyan nilon.
Akon ong moimung nok Tuhan nilon,
bu ilon ong moimung nok piktowan ku.
11 Sog waktu koyon ondiꞌ na sumboy moktinintuluoy ok sosolokotow sog duma nin atawa sog gilugin pasal dinakon
sabap kotanan nok tow mokokilala dinakon tidu song mokobabaꞌ mangoy song mokotas.
12 Poꞌ pasal sok kololatu ampunon ku ong mga kodusahan nilon,
bu kolingowan ku na nok tantu ong mga ginang nilon nong molaat.”c
13 Dangan linabit nok Tuhan nog ongon og bogu pogjanjian,
motampal nog daꞌdun na og halgaꞌ nog Dan Pigjanjian,
bu posunguꞌ na mobolong.