Si Imam Malkisedek
7
Na ok pasal ni Malkisedek,
yanin ok sultan sok siyudad nok Salam,
bu gimam da sop yanin nok Tuhan Mahatinggi.
Linumpakin siloꞌ Ibrahim poguliꞌ nilon tidu sok pogbunuan nong mga sultana bangka nin pongoni-ngonihoy si Nabi Ibrahim nog barakat sok Tuhan.
2 Pogdoksuꞌ nituꞌ,
binogoy ni Nabi Ibrahim diyon ni Malkisedek og ikosopuluꞌ bahagiꞌ nong miawiꞌ in tidu sok pogbunuan.
Ong maana nong ngalan ni Malkisedek,
“Ok sultan nok kologdongan”.
Pasal sultan yanin sok siyudad nok Salam,
migmaana da sop kini nok sultan yanin nok kosannangan.
3 Si Malkisedek kini,
ondaꞌ kosulat sok Kitab bug sima og gommaꞌ bug ginaꞌ in atawa mga pingapuꞌ in.
Ondaꞌ sop kosunoy og gondow kobataꞌ diyanin,
atawa ok kopatoyin.
Saan na mamaꞌ yanin nog Bataꞌ nok Tuhan,
poꞌ mamaꞌ nog daꞌdun ok kodoksuan nok kopogimamin.
4 Pikil niyu bug ponoy kotas si Malkisedek,
poꞌ bisan si Nabi Ibrahim,
ok solobuk nong mibantug nok pingapuꞌ ta,
migbogoy diyanin nog jakat sok kinobaisan nog ikosopuluꞌ bahagiꞌ nong mialap nilon sok pogbunuan.
5 Na miunut sok saraꞌ nok piponog ni Nabi Musa,
si Lebi,
og gapuꞌ ni Nabi Ibrahim sog lulud,
ok piktiduhan nong mga koimaman.
Ong mga ponupuꞌ in koyon,
ok sumboy pogwakilan nog ikosopuluꞌ bahagiꞌ nog jakat.
Ong migjakat dinilon,
yonin da ok salu bangsa nilon nok ponupuꞌ da sop ni Nabi Ibrahim.
6 Sugaid si Malkisedek nok kanaꞌ ok ponupuꞌ ni Lebi,
mikotabuk da nog jakat tidu ni Nabi Ibrahim.
Tubus nituꞌ pingoni-ngonihanin si Nabi Ibrahim nog barakat dituꞌ sok Tuhan.
Na si Nabi Ibrahim kini ok tow nog jinanjian nok Tuhan.
7 Motampal nok si Malkisedek motas pa og gollalin tidu ni Nabi Ibrahim,
poꞌ ok kiwakilan nok Tuhan mogbarakat,
motas pa tidu sok tow nog barakatanin.
8 Na pasal song mga koimaman nok tinumabuk nog ikosopuluꞌ bahagiꞌ nog jakat,
og lam nilon matoy da.
Sugaid si Malkisedek ondaꞌ kosulat sok Kitab ok pasal sok kopatoyin,
tibuwa tinaluꞌ nok solama-lama ok kopogimamin.
9-10 Dangan migjakat si Nabi Ibrahim diyon ni Malkisedek,
mamaꞌ da sop nong misunuꞌ mogjakat si Lebi diyon ni Malkisedek.
Poꞌ dangan linumpak ni Malkisedek si Nabi Ibrahim,
ondaꞌ pa bataoy si Lebi,b
diyon pa yanin sog lawas nog gomboꞌ in.
Sugaid song matong nog gondow,
si Lebi da ong moktotabuk nog jakat biyan sok ponupuꞌ in.
11 Na sog waktu nok piponog ok saraꞌ diyon ni Nabi Musa,
si Harun bug mga duma nin ponupuꞌ ni Lebi og inuwakil mogimam.
Tibuwa kanaꞌ pa jukup ok kopogimam nilon,
poꞌ kanaꞌ mokopojukup ong mga manusiyaꞌ biyan dun.
Saan na sumboy ongon og len nog gimam mamaꞌ ni Malkisedek.
Ok kopogimamin kanaꞌ mamaꞌ nok kopogimam ni Harun.
12 Dadi pagga ginantian ok kopogimam niloꞌ Harun,
na ginantian da sop ok saraꞌ.
13-14 Ok Panghuꞌ ta Isa Al-Masih,
yonin na og ginantiꞌ song mga dan nong mga koimaman kituꞌ tagnaꞌ.
Kanaꞌ yanin ok ponupuꞌ ni Lebi,
poꞌ mibantug nok si Isa tidu sok ponupuꞌ ni Yahudc,
bu ondaꞌ kolabit ni Nabi Musa nong mokopogimam ok ponupuꞌ ni Yahud.
Si Panghuꞌ Isa bu si Malkisedek
15 Motampal na tokodoy nog ginantian na ong mga koimaman kituꞌ nong miktidu sok ponupuꞌ ni Lebi pagga ongon na ningkomun og len gimam nong mamaꞌ ni Malkisedek,
yonin na si Isa Al-Masih.
16 Ok kopogimam ni Isa kanaꞌ miktidu sok pangkatanin,
sugaid sok kowasa nin nong mitubuꞌ yanin solama-lama.
17 Poꞌ pidinsamaꞌ tumaluꞌ pasal diyanin sog diyalom Kitab,
“Ika og gimam solama-lama.
Ok kopogimam nu mamaꞌ nok kopogimam ni Malkisedekd.”
18 Saan na pininda nok Tuhan ok saraꞌ tagnaꞌ kituꞌ pasal sok kopogimam,
poꞌ daꞌdun og guna nin bug kowasa nin mogawon song manusiyaꞌ.
19 Poꞌ ok saraꞌ nok piponog diyon ni Nabi Musa,
ondiꞌ mokopojukup nong manusiyaꞌ.
Sugaid ongon na ok pogdodama ta nog landuꞌ kobais,
poꞌ biyan sok kopoglillaꞌ ni Panghuꞌ Isa nog ginawa nin,
mokopolani ita na sok Tuhan.
20-21 Poꞌ miimung gimam si Panghuꞌ Isa pobiyan sok sapa nok Tuhan diyanin,
taluꞌ in,
“Sinumapa ok Pogbayaꞌ-bayaꞌ,
bu ondiꞌ in pindahon og janjiꞌ in,
‘Ika og gimam solama-lama.’”
Dadi motongow ta nong miksobonnal ok Tuhan nog og Al-Masih yonin na og gimam solama-lama poꞌ sinapahanin kini.
Sugaid ondaꞌ yanin sapa song mga koimaman nok tidu sok ponupuꞌ ni Lebi.
22 Na pasal sok sapa nok Tuhan,
si Isa ong mikposobonnal nong mobais pa og Bogu Pigjanjian kini tidu song mikuna kituꞌ.
23 Bu tagnaꞌ kituꞌ modakol ong mga koimaman,
poꞌ bilaꞌ matoy ok solobuk nog gimam,
suklihan na sop nog duma.
24 Sugaid si Isa,
ondiꞌ na yanin kosuklihan sok kopogimamin,
poꞌ motubuꞌ yanin solama-lama.
25 Saan na moawon tokodoy ni Isa Al-Masih ong mga mokpolani sok Tuhan biyan diyanin bisan sima manusiyaoy bu olo waktuhoy,
poꞌ mitubuꞌ yanin lolayun bagun mongolot para song mga manusiyaꞌ.
26 Dadi si Isa ok Kinotasan nog Gimam nog dumait tumabang sog logon ta,
poꞌ mosutsi yanin,
diꞌ kotuntutan,
bu daꞌdun tokodoy og dusa nin.
Pisolen yanin tidu song mga tow baldusa,
bu binogoy diyanin ok kinotasan nog gollal dituꞌ sok surgaꞌ.
27 Kanaꞌ yanin mamaꞌ nog duma nok Kinotasan nog Gimam nok sumboy mokkurban sok Tuhan gondow-gondow pasal song mga dusa nilon,
bangka pa sog dusa nog duma nilon manusiyaꞌ.
Sugaid si Isa Al-Masih,
insan da yanin mikkurban nog ginawa nin para sog dusa nong mga manusiyaꞌ biyan sok kopoglillaꞌ in nong nyawa nin.
28 Ong mga tow tagnaꞌ nog inuwakil moimung nok kinotasan nog gimam mounut sok saraꞌ,
molamma poꞌ molomu moyit mogdusa,
bu matoy da sop ilon.
Sugaid si Isa,
og Bataꞌ nok Tuhan,
jukup yanin.
Na pogdoksuꞌ piponog nok Tuhan ok saraꞌ,
inuwakilin bu sinapahanin nong moimung og Bataꞌ in nok Kinotasan nog Gimam nong mga manusiyaꞌ solama-lama.