Ok Pomituwa nong Mobais
2
Sugaid ika,
Titus,
pomituwa a nog dumait song mologdong nok pituwa.
2 Tintuluoy nu ong mga mokogulang laki nok sumboy sandalan nilon ong napsu nilona.
Sumboy dumait ilon pogaddatan,
kosunan nilon moktimbang-timbang ong mobais bug molaton,
mologdong ok kotombaꞌ nilon,
bu ikhlas og lasa bug poktiggol nilon bisan olo ong mokobiyan dinilon.
3 Domikkiyan da sop ong mga mokogulang libun.
Tintuluoy nu ilon nok sumboy dumait og goyitan nilon song mga tow nok sukuꞌ nok Tuhan.
Sumboy kanaꞌ ilon pololibak bu mogoginum,
sugaid monintuluꞌ ilon nong mobais.
4 Dadi kopituwahan nilon ong mga kolibunan nong mokobataꞌ pa nok poglasahon nilon ong mga laki bug gumbataꞌ nilon.
5 Sumboy sop tintuluon nilon ong mobataꞌ nok kolibunan bagun ilon mosutsi,
motugos mogusiba sog baloy,
mahatul,
mokotimbang-timbang nong mobais bug molaton,
bu mokpobabaꞌ sog laki nilon bagun daꞌdun ong mokopoktaluꞌ nong molaat pasal sok Parman nok Tuhan.
6 Domikkiyan da sop,
tintuluoy nu ong mga mobataꞌ nok kolakihan nong mokpotubud ilon bug ponoy ilon moglokotubuꞌ.
7 Potongow nu sog lam nituꞌ og ginawa-baran nu nok solobuk suntuan song mga ginang mobais.
Bilaꞌ monintuluꞌ a,
sumboy sobonnal ong maksud nu,
bu tidu sog ikhlas nok pongatoyan nu.
8 Ok ponintuluꞌ nu sumboy mologdong nog daꞌdun mosilaꞌ dun,
bagun sumipog ong mga tow nok sumaggaꞌ dinita,
poꞌ daꞌdun molaat nong motaluꞌ nilon pasal dinita.
9 Ong mga gulipon sumboy tintuluan nu nok tumombaꞌ sog gamu nilon,
monginang nong mosulut dinilon,
bu ondiꞌ sumolap tumabal sok suguan dinilon.
10 Sumboy diꞌ ilon monakow,
sugaid potongowon nilon nok kopongandolan ilon,
bagun sog lam nituꞌ,
motongow ok kobaisan nok ponintuluꞌ ta pasal sok Tuhan,
ong Mogogawon dinita.
11 Poꞌ pitongow nok Tuhan ok kolasa-kololatin dinita dangan piangoyin dini si Isa Al-Masih bagun sima-sima manusiyaoy moawon.
12 Biyan sok kolasa-kololatin koyon,
pinituwahanin ita nok tolikudan ta na ok kotubuꞌ nok kanaꞌ molituhanoy bug pokpoduhul sok konapsuhan.
Na sog bon ta dini sog dunya sumboy ita mokosun moktimbang-timbang nong mobais bug molaton.
Bu sumboy ita mologdong bu moammal
13 soliyan ta mogbagad nong mobarakat nog gondow nog dinodamahan ta,
yonin na ok pokpuliꞌ nong Mokowasa nok Tuhan bu Mogogawon dinita niyu nok si Isa Al-Masih.
Pokpuliꞌ in,
motongow ok sahaya bug kotasin.
14 Piglillaꞌ in og ginawa nin para dinita niyu bagun molokatin,
bu mosutsi nin ita tidu sog lam nok kolaatan,
bagun moimungin ita nok sukuꞌ in nong migloliyag monginang nok kobaisan.
15 Na ong mga milabitu koyon,
Titus,
tonduꞌ nu dinilon,
polasig bu pogbinaan nu.
Gamit nu ok kopatut nog binogoy dinika.
Diꞌ nu malingon bisan babaꞌ-babaon ka nok kodumahan nu.