Ok Sulat ni Pol Posunguꞌ ni
TITUS
Ok Salam-duwaa ni Pol
1
1-4 Salam-duwaa dinika Titus,
og initungu nong motud nog bataꞌ u sok kotombaꞌ ta.a
Akon kini si Pol,
solobuku gulipon nok Tuhan bug mokpoposampoy ni Isa Al-Masih.
Kiwakilanin akon bagun moksipagon ok kotombaꞌ nong mga tow nok piniliꞌ nok Tuhan.
Sinuguꞌ in akon moktonduꞌ dinilon nok kosobonnalan bagun ilon moglokotubuꞌ nong molituhanoy.
Ok kosobonnalan kini ong mogbogoy dinilon nok kopongandol nok koongonan ilon nok kotubuꞌ solama-lama nog jinanjiꞌ nok Tuhan sog daꞌ pa imungoy og dunya,
bu ok Tuhan diꞌ mogloput.
Na pogdatong nog waktu nog ginantaꞌ in,
pitampalin na ok Parmanin pasal sog Al-Masih.
Yonin na ok Parman nok pingandolan ku mokposampoy mounut sok suguan nok Tuhan,
ong Mogogawon dinita.
Bung mayan modiyon dinika ok kolasa-kololat bug kosannangan tidu sok Tuhan,
og Gommaꞌ ta,
bu ni Isa Al-Masih,
ong Mogogawon dinita.
Ok Piinang diyon ni Titus sok Puluꞌ Kerete
5 Saan na binagaku ika sok Kerete bagun pohatulan nu ong mga ginang kituꞌ nog daꞌ kodoksuꞌ.
Dadi mamaꞌ nok sinuguꞌ u dinika,
pomilian nu ong mogmokogulang song mga jomaa nong mga moktotombaꞌ sok sosuku bonuwa.
6 Ong moimung mogmokogulang,
sumboy diꞌ kotuntutan,
bu solobuk da og libunin.
Bu ong mga gumbataꞌ in,
sumboy moktotombaꞌ,
diꞌ kotuntutan nog bulaug,
bu kanaꞌ motogas og gulu nilon.
7 Na pagga ok kounutan nong mga moktotombaꞌ,
inuwakilan nog ginang nok Tuhan,
sumboy diꞌ yanin kotuntutan,
sumboy kanaꞌ yanin moabbu,
bololokowon,
mogoginum,
mokpominasa,
bu kanaꞌ sop gibogon sok sin.
8 Tibuwa sumboy yanin mohurmat song mga tow nong mangoy diyanin,
loliyagon sok kobaisan,
mologdong,
sutsi,
kosunanin moktimbang-timbang ong mobais bug molaton,
bu kosaggaanin og ginawa nin.
9 Sumboy mogot ok kotombaꞌ in song motud nok pononduꞌ nok pinituwa diyanin,
bagun polasigonin ok pongatoyan nok kodumahanin biyan sok pononduꞌ in nok kosobonnalan,
bu bagun sop kopituwahanin og dinumugtul sok pononduꞌ ta.
10 Poꞌ modakol ong mga dinumugtul.
Inakkalan nilon ong mga duma biyan song mga pononduꞌ nog daꞌdun kopologunahanin,
lubaꞌ na ong mga tow nong mogdaawa nog diꞌ moawon ong manusiyaꞌ bilaꞌ ondaꞌ koislamb.
11 Na sumboy polotaon ilon monintuluꞌ,
poꞌ sinasow nilon ok kotombaꞌ nong mga moktolianak.
Monintuluꞌ ilon nong molikoꞌ bagun hadja ilon mokosin.
12 Bisan ok solokotow salu-bangsa nilon nong mokosun,
miktaluꞌ da nong moloput ok tow Kerete,
mobingis,
mololaꞌ bu gibogon.
13 Na motud ok tinaluꞌ in koyon.
Dadi pogbinaan nu tokodoy ilon bagun mologdong ok kotombaꞌ nilon,
14 bu bagun diꞌ na ilon tumombaꞌ song mga gimung-imung nong mga Yahudi bu song mga suguan nong mga tow nok tinumolikud na sok kosobonnalan.
15 Molonuꞌ og lam para song mga tow sinutsi nok Tuhan ok pongatoyan nilon,
sugaid daꞌdun ok sutsi para song mga tow moliksok bu daꞌ tombaꞌ.
Poꞌ molikoꞌ ok pikilan nilon,
bu diꞌ nilon na mobatik nong mokinang ilon nok kodusahan.
16 Inangkon nilon nok kiosunan nilon ok Tuhan,
sugaid og ginang nilon sinumuwoy sok tinaluꞌ nilon.
Mokobias-bias ok pongaddatan nilon,
dinumugtul ilon,
bu kanaꞌ ilon mokoinang nong mobais.